Xalqaro havaskor bokschilar uyushmasi – AIBA tomonidan tashkil etilgan The World Series Boxing (WSB) - Butunjahon boks seriyalarida O'zbekistonning "Uzbek Tigers" jamoasi sharafini himoya qilgan Ulug'bek Haqberdiev professional bokschilik faoliyatini boshladi.
Samarqandlik bokschi 3 mart kuni Rossiyada tashkil etilgan birinchi jangida professionalda 27 ta jang o'tkazgan rossiyalik Karen Avetisyanni ochkolar hisobida mag'lub etgandi.
Ulug'bek Haqberdiev 25 mart kuni Rossiyaning Sankt-Peterburg shahrida o'tkaziladigan professional boks kechasida ikkinchi marotaba ringga ko'tariladi.
Hamyurtimiz bu gal professional boks bo'yicha Uganda chempioni - Mustafo Katende bilan jang qiladi. O'z vazn toifasida Ugandaning birinchi raqamli bokschisi hisoblangan Mustafo Katende professsional ringjagi faoliyatini 2008 yilda boshlagan va shu kungacha 12 ta jangda g'alaba qozongan va to'rt marta mag'lubiyatga uchragan.
Mutaxassislarning ta'kidlashicha, afrikalik bokschi o'ta kuchli zarbaga ega. U sakkizta uchrashuvda raqiblarini muddatidan oldin mag'lub etgan.
— deya xabar beradi uff.uz nashri.