Allaqachon mashhurlikka erishgan italiyalik yosh, iqtidorli golkiper Janluiji Donnarumma yaqindagina balog'at yoshiga etdi. Ya'ni «Milan» darvozasini ishonch bilan himoya qilayotgan yigit 18 bahorni qarshi oldi. Soccer.ru portali shu bahona uning jahon futbolidagi eng iste'dodli tengdoshlariga zimdan nazar tashlab, o'ziga xos ramziy terma jamoa shakllantirdi. Darvozabon. Janluiji DONNARUMMA (Italiya) - «Milan» Taxminiy bahosi: 20 million evro Evropadagi kuchli 5ta milliy chempionatda bugungi qahramonimizdan tashqari, yana bir nafargina 18 yoshli posbon muntazam o'yin amaliyotiga ega bo'lmoqda - Alban Lyafon («Tuluza»). Albatta, Albanning kelajagiga ham katta umid bilan qaralmoqda, ammo ayni payt Donnarummaning saviyasi ancha baland, baribir. Negaki, Jijo «Milan»dek mashhur klub sharafini munosib himoya qilyapti, qolaversa, u mashhur adashi - Buffon bilan yaqin do'st hisoblanadi. O'ng qanot himoyachisi. Feliks PASSLAK (Germaniya) - «Borussiya» D. Taxminiy bahosi: 3 million evro Rur havzasida tug'ilib-ulg'aygan bolakay 14 yoshida taqdirini Dortmund «Borussiya»si bilan bog'ladi. U o'tgan yili jamoaning asosiy tarkibi mashg'ulotlariga qo'shildi. Passlak muntazam ravishda Germaniyaning turli yosh toifasidagi terma jamoalariga chaqirilgani va shu asnoda etarli darajada xalqaro tajriba to'plagani uchunmi, klub o'yiniga tezda kirishib ketdi. Alohida ta'kidlash kerak, Feliks 2015 yili Frits Valter nomidagi medalga munosib ko'rilgandi. Ya'ni Germaniya futbol ittifoqi tomonidan har yili mamlakatning eng iqtidorli yosh futbolchisiga beriladigan sovrin laureatiga aylangandi. Markaziy himoyachi. Dayotchankul (Dayo) UPAMEKANO (Frantsiya) - «RB Leyptsig» Taxminiy bahosi: 5 million evro Germaniyaning transfermarkt.de sayti ma'lumotlariga ko'ra, Dayoning transfer narxi ayni payt taxminan 5 million evroga teng. Lekin fakt shuki, yanvar oyida «Red Bull» nomli klublardan biri yosh himoyachi uchun ikkinchisiga 10 million to'ladi: Upamekano Zaltsburgdan Leyptsigga ko'chib o'tdi. Albatta, yigitchaning yangi jamoada o'z  o'rnini topishiga ma'lum vaqt ketishi tayin. «RB Leyptsig»ning Upamekano uchun 10 «limon» bergani bejiz emas - u markaziy himoyachilarga xos fazilatlar va ustunliklari bilan tengdoshlari orasida yaqqol ajralib turadi. Markaziy himoyachi. Malang SARR (Frantsiya) - «Nitstsa» Taxminiy bahosi: 3,5 million evro Dayoning  tengdoshlari orasida ajralib turishi ayni haqiqat, ammo unga munosib raqobat taqdim etishga qodir yigit ham yo'q emas. Gap Upamekanoning vatandoshi, ayni payt «Nitstsa» tarkibida Frantsiya chempionligi uchun kurashayotgan Malang Sarr haqida ketyapti. E'tiborlisi, klub ustozi Lyusen Favr yosh yigitchani qo'rqmay muhim o'yinlarda o'ta mas'uliyatli pozitsiyada maydonga tushir-yapti. Malang esa tabiiyki, uning ishonchini oqlashga astoydil intilmoqda. Chap qanot himoyachisi. Luis OLIVERA (Argentina) - «River Pleyt» Taxminiy bahosi: 1,5 million evro Shubhasiz, okean ortida, xususan, Janubiy Amerikada iqtidorli yosh futbolchilar safi ancha keng. Deylik, argentinalik tezkor himoyachi Luis Oliveraning o'yinlari shu darajada chiroyli chiqmoqdaki, uni tez orada Evropaning biror-bir top-klubida ko'rsak, ajabmas. Markaziy yarim himoyachi. Tomas DEVIS (Angliya) - «Everton» Taxminiy bahosi: 1,5 million evro Davomi: www.iff.uz InterFutbol.uz ning Telegram dagi sahifasiga ulaning – eng so'nggi yangiliklar, qiziqarli bloglar va tahliliy materiallar endi bir to'plamda.
— deya xabar beradi uff.uz nashri.