Futbol ko'pgina qahramonlarni biladi. Klubga hayotlarini baxshida etgan faxriylar; o'yinning so'nggi daqiqasigacha o'z darvozasi dahlsizligini saqlash uchun jon fido qilgan darvozabonlar... Ularning barchasi bizning kumirlarimizdir. Ammo shundaylar ham borki, bu futbolchilar yana bir qancha fazilatlari bilan ajralib turishadi. Togo terma jamoasi va Chexiyaning «Slovatsko» klubi o'yinchisi  Fransis Kone - aynan shundaylardan. Futboldagi sakkiz yillik faoliyati davomida u to'rt nafar hamkasbining hayotini saqlab qolgan. Uning shiori: «Birorta yomon narsa sodir bo'lsa aslo qochma». Bundan bir necha hafta avval yuz bergan voqeani esa u uzoq vaqt yodida saqlab qolishi aniq, zero buni unutib bo'larmidi? «Slovatsko» Pragada «Bogemians 1905» jamoasiga qarshi maydonga tushgandi. Kone to'pni raqib jarima maydonchasiga yo'llash uchun o'qday oldinga otilgan pallada mehmonlar jamoasi sardori Daniel Krch bunga yo'l qo'ymaslik uchun hujumchi ortidan yugura boshlagan, darvozabon Martin Berkovets esa oshirilishi kutilayotgan to'pni ushlashga hozirlik ko'rayotgandi. Kutilmaganda himoyachi va darvozabon o'zaro to'qnashib ketishdi. Butun o'yingoh jiddiy ko'ngilsizlik yuz berganini anglab sukutga cho'mdi. O'sha lahzalarda  Konening o'zi ham gazonga qulagandi, ammo futbolchi himoyachidan farqli ravishda posbon qimirlamay yotganini ko'rgach, darhol o'rnidan turdi. - Darvozabon yo hushidan ketgan, yoki bo'lmasa bundan-da yomon voqea yuz bergandi. Darhol oyog'imni uning ko'kragiga - chap qo'lini ushlash uchun qo'ydim. Ba'zi hollarda inson tanasi karaxt holatiga tushib qoladi va bunda uni nazorat qilish qiyin bo'ladi. Berkovetsning og'zini ochishga uringanimda esa bu oson bo'lmasligini angladim. Ammo men taslim bo'lmadim va jabrlanuvchi tilini yutib yubormasligi uchun qo'limdan kelgan barcha narsani qilishga urindim. Vaqt esa o'tib borardi. Boshqa futbolchilar ham etib kelishdi va menga yordam berishga oshiqishdi. Hammamiz darvozabonni yon tomoni bilan yotqizib qo'yishga kirishdik. Va, nihoyat, uning og'zini ochishga muvaffaq bo'ldik ham, posbon esa hatto qo'limni tishlab oldi. Ammo bu endi muhim emasdi, muhimi unga tilini yutib yuborishga yo'l qo'ymadik. Bularning barchasi sanoqli soniyalarda ro'y berdi. Posbon menga nimadir demoqchi ekanligini ko'rgach esa, endi havotirga asos yo'qligiga amin bo'ldim, - deb xotirlaydi Kone. Ko'chilik tomoshabinlarning keyinroq tan olib aytishlaricha, o'sha ko'ngilsiz voqeaga qadar ular raqib jamoasi hujumchisini rosa mazax qilishgan, hatto uni «maymun» deb ham atashgan. Oradan 20 soniyaga yaqin vaqt o'tar-o'tmas Berkovets o'ziga kelgach tribunalarni fanatlarning qarsaklari va shodon hayqiriqlari tutib ketdi. Balkim kimlargadir Kone tavakkaliga ish tutganday ko'rinar, ammo «Bogemians» shifokori Martin Vavra hujumchining o'sha lahzalardagi hatti-harakatlarini maqtadi - hammasini soniyalar hal qiladigan pallada shifokorlarning jarima maydoniga etib kelishlariga oz bo'lsada vaqt ketishi aniq edi-da. «Men Useyn Bolt emasman», - tan olib aytadi Vavra, u ham butun maydon bo'ylab yordamga oshiqqandi. Himoyachilardan biri Martin Dostal esa minnatdorchilik ramzi sifatida Konening elkasiga qoqib qo'ydi. «Yaratganning yordamisiz dahshatli voqea yuz berishi aniq edi. Darvozabon o'lishi mumkin edi, men esa nima qilish kerakligini bilardim. Bunday voqeaning guvohi ham bo'lgandim». Bu hali hammasi emas, davomi: www.iff.uz InterFutbol.uz ning Telegram dagi sahifasiga ulaning – eng so'nggi yangiliklar, qiziqarli bloglar va tahliliy materiallar endi bir to'plamda.
— deya xabar beradi uff.uz nashri.