JCh–2018 turniriga saralash bosqichi “A” guruhi 7-turidan o'rin olgan O'zbekiston – Qatar uchrashuvidan oldin o'tkazilgan matbuot anjumanining birinchi qismida O'zbekiston terma jamoasi bosh murabbiyi Samvel Babayan va yarim himoyachi Marat Bikmaev ishtirok etdi.
“Malayziyada qayd etilgan natijalar uchun muxlislar oldida uzr so'rayman. Deyarli barcha o'yinlar g'alaba va mag'lubiyat orasida turadi. Suriya bilan o'yinda qaerdadir men xato ham qilgandirman. Yigitlar oxirigacha kurashdi, ammo so'nggi daqiqalarda o'tkazib yuborilgan gol barchasini hal qildi.
Afsuski, hech qaysi o'yinda optimal tarkibda o'ynay olmayapmiz. Avvalgi o'yinlarda yo'qotishlar bo'ldi. Denisov ertaga maydonga tusha olmaydi. Bundan afsusdamiz.  To'xtaxo'jaev esa sariq kartochkalari to'planib qolgani tufayli o'yinni qo'yib yuboradi.
Bu guruhda kurash so'nggi turgacha davom etadi, chunki raqiblar ham ochko yo'qotmoqda. Asosiy maqsadimiz — erataga g'alaba qozonish va shu yo'l orqali JCh–2018 turniriga yo'l olish. Ayni vaqtda eng kuchli tarkibga ega ekanimiz haqidagi so'zlardan qochmayman. Bu haqiqatdan ham shunday. Balki erataga ham iste'foga chiqarman. Asosiysi, O'zbekiston terma jamoasi JCh–2018 turniriga yo'l olishi kerak.
Jamoa yaxshi o'ynaganda stadion to'ladi. Muxlislarga murojaat qilmoqchiman: stadionga qancha muxlis kelishidan qat'i nazar, ulardan dalda so'rab qolamiz va bizni qo'llab-quvvatlashlariga umid qilmamiz”, – dedi Samvel Babayan.  
“Suriyaga qarshi o'yindan keyin o'zimizga kelib oldik va ertaga g'alaba uchun barcha kuchimizni berishga tayyormiz. Muxlislarni stadionga kelib, qo'llab-quvvatlashlarini so'raymiz”, – dedi Marat Bikmaev.
Eslatib o'tamiz, O'zbekiston – Qatar uchrashuvi ertaga, 28 mart kuni Toshkentdagi “Bunyodkor” stadionida o'tkaziladi. O'yin 18:00 da start olishi rejalashtirilgan. 
— deya xabar beradi uff.uz nashri.