Ertangi o'yin oldidan o'zbek futbolidagi eng taniqli shaxslaridan biri, O'zbekiston sharhlovchilik maktabini asoschisi hamda el sevgan ustoz jurnalist Axbor Imomxo'jaevning fikrlari bilan qiziqdik. U kishi ham hammamiz kabi birdek hayajonda ekanliklari va termamizdan faqat g'alabalar kutayotganlari haqida gapirib o'tdilar.
"Suriya bilan o'yindan keyin ancha asabim buzildi. Bilishimcha, nafaqat meniki. O'yindan keyin juda ko'plab qo'ng'iroqlar bo'ldi menga. Tanishlar ham, notanishlar ham kuyinib gapirishdi.
Janubiy Koreyada mag'lub bo'lganimizda ham bunchalik kuyunmagandim. Raqib qit'adagi eng kuchli jamoalardan biri edi. Biroq, Suriya termasidan biz har qanaqasiga kuchli edik. O'z uyingda devorlar ham yordam beradi deyishadi. Suriyaning o'z uyi ham yo'q edi.
Ochig'i, muxlislarsiz neytral maydondan futbolchilarimiz yirik hisobdagi g'alaba bilan qaytishadi, deb umid qilgan edim. Afsuski, juda qimmatli 3 ochkodan mahrum bo'ldik. Oxirida aynan shu ochkolar etmay qolsa undan-da achinarli bo'ladi.
Biroq hali umid chiroqlari so'ngani yo'q. Rossiyaga borishga hali ham imkonimiz bor.
Ertaga Qatarni mag'lub etsak, final yo'llanmasi uchun kurashni davom ettiramiz. Mana ko'rsasiz, ertaga yigitlar ko'zlari yonib maydonga tushishadi va nasib qilsa, muxlislar ishonchini qaytarishadi.
Hozir biz ishqibozlarning madadi ular uchun har qachongidan muhim. Keling, futbolchilarimizni baralla qo'llab-quvvatlaylik. Biz qariyalar, erta-yu kech duoda bo'lamiz. Ertaga kechqurun barchamizning xonadanimizda shodlik hukmron bo'lsin! Olg'a O'zbekiston!", - dedilar ustoz jurnalist Axbor aka Imomxo'jaev. Foto manbasi: www.championat.asia
— deya xabar beradi uff.uz nashri.