Shu yilning 24-26 mart kunlari Namangan shahridagi “Pahlavon” sport majmuasida qo'l jangi sport turi bo'yicha o'smirlar, yoshlar, qizlar va professional sportchilar o'rtasida O'zbekiston chempionati o'tkazildi. O'zbekiston huquqni muhofaza qilish organlarining qo'l jangi federatsiyasi tashabbusi bilan tashkillashtirilgan “Oltin vodiy” bahslarida Qoraqalpog'iston Respublikasi, barcha viloyatlar va Toshkent shahridan kelgan 500 nafardan ziyod sportchi 24 kilogrammdan 90 kilogrammgacha bo'lgan 27 ta vazn toifasida g'oliblik uchun ringga ko'tarildi. Musobaqaning tantanali ochilish marosimida Namangan viloyati hokimi Xayrullo Bozorov so'zga chiqib, mamlakatimizda o'sib kelayotgan yosh avlodni jismonan sog'lom, ruhan tetik va aqlan barkamol ruhda tarbiyalashda sportning o'rni alohida ahamiyat kasb etayotganini ta'kidladi. Darhaqiqat, mana shunday ommaviy sport tadbirlari va musobaqalari kelgusida ona yurtimiz mudofaasi uchun mard, jasur, vatanparvar yoshlarni kamolga etkazishda, qolaversa huquqni muhofaza qilish idoralari xizmatlariga munosib bo'lgan nomzod kadrlar zaxirasini shakllantirishda ham muhim o'rin tutmoqda. Musobaqa tashkilotchilari murosasiz va qizg'in kechgan bellashuvlarda ayni shu jihatlarga e'tibor qaratishganini aytib o'tish joiz. Chempionatning eng kichik, ya'ni 10-11 yoshdagi jajji ishtirokchilari orasidagi bahslarda Andijon viloyatidan Shahboz Shavkatov, Muhammadqodir Olimov, Abdulaziz Tursunov, Namangan viloyatidan Ibrohim Ismoilov, Ulug'bek Mirzo Jaloliddinov, Rahimjon Mahmudov, Farg'ona viloyatidan Muhammadbilol Rustamov g'alaba nashidasini surdi. 12-13 yoshdagi o'g'il bolalar o'rtasidagi raqobatlarda andijonlik Muhammadamin Komilov, Sardor Erkinov, Rahmatullo Mirzaolimov, namanganlik Asadbek Yusufjonov, Nasibullo Habibullaev, Otabek Abduhalimov, farg'onalik Zokir Valijonov, Asror O'rinov, Toshkent viloyatidan Asliddin Tillahamatov, buxorolik Yorqinbek Olimovlarga teng keladigani topilmadi. Tomoshabinlarda katta qiziqish uyg'otgan qizlar ishtirokidagi janglarda Qoraqalpog'iston Respublikasidan Komola Amangeldieva, Manzura Ahmedova, Andijon viloyatidan Nozima Husanova, So'g'diyona Jamoliddinova, Farg'ona viloyatidan Marjona Tolipova, Toshkent shahridan Oygul Valievalar g'olib deb e'tirof etildi. Professional sportchilar qatnashgan janglar shunga monand keskin va murosasiz tarzda o'tdi. Unda barcha raqiblarini engan qashqadaryolik Ramazon Temirov, farg'onalik Javohir Mirzashonov, Navoiy viloyatidan Bunyod Shokirov, xorazmlik Quvondiq Yusupov chempionlik unvoniga ega chiqishdi. Musobaqada eng ko'p medallarga sazovor bo'lgan Namangan viloyati qo'l jangi ustalari umumjamoa hisobida faxrli birinchi o'rinni qo'lga kiritdilar. Andijon viloyati jamoasi ikkinchi, farg'onalik sportchilar esa uchinchi pog'onadan joy olishdi. Tantanali taqdirlash marosimida O'zbekiston huquqni muhofaza qilish organlarining qo'l jangi federatsiyasi raisi o'rinbosari Baxtiyor Mirzaqulov, Bolalar sportini rivojlantirish jamg'armasi Namangan viloyati filiali direktori Akmalxon Mamadumarov, Namangan viloyati ichki ishlar boshqarmasi boshlig'i muovini, podpolkovnik Dilmurod Xo'jaqulov “Oltin vodiy”ning g'olib va sovrindorlariga diplom, medallar, qimmatbaho sovg'alarni topshirdilar. Shuni qayd etish lozimki, g'olib sportchilar may oyida Tojikiston Respublikasining Xo'jand shahrida bo'ladigan Osiyo birinchiligida Vatanimiz sharafini himoya qiladilar. Oqilxon DADABOEV, Rahmonjon MAMADALIEV olgan suratlar vodiymedia.uz
— deya xabar beradi uff.uz nashri.