Futbol muxlislari boshlagan aktsiyaga ko'zim tushib qoldi. Suriyaga bilan o'yindagi mag'lubiyatni og'ir olganliklarini ko'rinib turibdi va ular bugun bo'lib o'tadigan Qatarga qarshi uchrashuvga bormaslik masalasini targ'ib qilish bilan ovora.
Ularni tushunsa bo'ladi. Bir-biriga o'xshash xatolarni bir necha bor takrorlaydigan federatsiyaning kasriga bir necha yillardan buyon ruhan azob chekadi.
Shu o'rinda shoshmaslikni so'rardim. Agar bugun “Bunyodkor” yoki “Lokomotiv” maydonga tushganida, bu boshqa masala edi. O'zbekiston terma jamoasi esa butunlay boshqa masala. Samvel Babayan men uchun hech kim (jamoasini JChga olib chiqqan taqdirida ham). Biroq bosh jamoa hammamizniki. Futbolchilar unda to'p surish uchun har qanday muammosini tashlab etib kelganidek, biz ham ularni yolg'iz qoldira olmaymiz.
Futboldagi o'zgarishlarni umuman boshqa usulda ham so'rash mumkin (garchi bir marta “Babayan v otstavku” degan banner ko'targan muxlisni uyidan olib ketgan bo'lishsa ham). Faqat bugun emas. Bugun futbolchilarni qo'llab-quvvatlash, ularga dalda bo'lish, birlashish talab etiladigan kun. Bugungi g'alaba Babayan yoki federatsiyani emas, hammamizniki bo'ladi. Iste'fo, norozilik va jahlni bugungi o'yinga aralashtirishlarini istamasdim.
Propagandachilarni yana bir bor tushunaman. Ammo ular ham tushunishsinki, Babayan saviyasi qanday ekanini endi hamma bilib bo'ldi. Hayotda shunday insonlar bo'ladiki, ularning ishi hatto asab buzishga ham arzimaydi. Asabni saqlang va muhabbatingizga ishoning. Olg'a, O'zbekiston!
Manba: imean.uz
— deya xabar beradi uff.uz nashri.