JCh-2018 saralashi uchinchi raundi ikkinchi davrasining ilk o'yinlariga nazar solib, beixtiyox o'yga cho'masan: «Nahotki, hammasi boshidan boshlanyapti?» Lekin yaqqol favoritlar ham ajralib qoldi. Deylik, Eron va Yaponiya termalari navbatdagi turda ham g'alaba qozonsa, yo'llanma masalasini 80 foizga hal qilgan hisoblanadi. Boz ustiga, har ikki guruh etakchisi 7-turda quyiroqda turgan jamoalarni qabul qiladi. Demak, ularda ta'qibchilardan yanada olislab ketish imkoni bor. Xullas, bugungi uchrashuvlar natijasi ko'p narsalarni oydinlashtirib berishi mumkin, bizningcha! «A» guruhi J.Koreya - Suriya Seul. «Vorld Kap» stadioni J.Koreya termasi bosh murabbiyi Ulrix Shtilike xitoyliklarga qarshi bahsda asosiy tarkibda Ji Dong Von - Li Jong Xeop hujum juftligiga tayandi. Biroq birinchi bo'limdayoq 4-4-2 taktikasi hamda hujum dueti noto'g'ri tanlangani sezilib qoldi. Tanaffusdan keyin maydonga tashlangan Kim Shin Vuk ham gol urish uchun yaqqol vaziyatga chiqqani yo'q. Suriya terma jamoasi esa siyosiy sabablar tufayli tarkibni to'liq yig'ish imkonini topolmayapti. Lekin Ayman al Hakim hujum va darvoza chizig'idan xavotir olmasa ham bo'laveradi. Mahmud al Mavas va Xolid al Mobayd hisobiga yarim himoya ham ancha ishonchli ko'rinmoqda. Ha, ko'z o'ngimizda Osiyo futbolida yangi kuch bosh ko'taryapti. Uning shakli 2007 yilgi Iroq termasini esga solyapti... IF taxmini: 45 (J.Koreya termasi g'alaba qozonadi) - 30 (durang bo'ladi) - 25 (Suriya termasi g'alaba qozonadi). Eron - Xitoy Tehron. «Ozodi» stadioni O'tgan turda o'yinning eng yaxshi futbolchisi sifatida tan olingan xitoyliklar posboni Zeng Cheng terma jamoada asosiy posbon maqomi o'ziga tegishli ekanligini Marchello Lippi va butun Chin yurtiga isbotlab qo'ydi. Aslida Lippi tanlagan 4-4-2 taktikasi tez-tez 6-4 shakliga ham aylanib turdi. Maydon markazini qo'riqlash roli Ren Xang­dan Jiang Zipengga olib berilgani Lippining naqadar mohir strateg ekanligiga dalolat. Shunday holatlarda jahon darajasidagi murabbiyga ega bo'lishni xohlaysan beixtiyor. Eron termasiga kelsak, Qatardagi bahsda jamoa sardori Ehson Hojisafining chap qanotdan uyushtirgan 2ta yurishi va ularning yakuniga etmay qolish jarayoni ko'pchilikda o'zgacha taassurot uyg'otdi. Jamoa sardorining gol talab qilib, jon kuydirishi Eron futboliga xos jihat. Yodingizdami, 2007 yili Osiyo kubogi guruh bosqichida terma jamoamiz bilan o'yinda ham forslarda shunday ehtiroslar barq urgandi. 27 yoshli Hojisafining sardorlikka tanlanishi barcha raqib jamoalar bosh murabbiylari uchun haqiqiy bosh og'rig'i qaysidir ma'noda... IF taxmini: 50 - 20 - 30. O'zbekiston - Qatar Toshkent. «Bunyodkor» stadioni Muxlislar tomonidan «Orqaga «pas» berish bo'yicha jahon chempioni» unvoniga loyiq ko'rilayotgan terma jamoamiz masalasi qandaydir tushunarsiz. Qatarliklarga qarshi bahsda g'alabadan o'zga natija vakillarimizni sira qanoatlantirmaydi. Marat Bikmaev - Temurxo'ja Abduxoliqov bog'lami «Lokomotiv»da effekt bergandir, aniqrog'i, bu Sanjar Shoahmedov orqali ta'minlangandi. Bugun jamoamiz tavakkal qilib, 3 nafar hujumchi taktikasini qo'llashi kerakmikan...? Bu hali hammasi emas davomi: www.iff.uz InterFutbol.uz ning Telegram dagi sahifasiga ulaning – eng so'nggi yangiliklar, qiziqarli bloglar va tahliliy materiallar endi bir to'plamda.
— deya xabar beradi uff.uz nashri.