Joriy yilning 10 fevral kuni O'zbekiston Respublikasi Adliya vazirligi tomonidan davlat ro'yxatidan o'tkazilgan O'zbekiston zamonaviy beshkurash federatsiyasi O'zbekiston chempionati qachon o'tkazilishini ma'lum qiladi.
Zamonaviy beshkurash bo'yicha ilk musobaqaga 31 mart kuni start beriladi. Mazkur bellashuvlar poytaxtmizning turli sport saroylarida o'tkazilishi rejalashtirilgan. Xususan, beshkurashchilar o'rtasidagi qilichbozlik bellashuvlari «Paxtakor» markaziy stadionining «Yoshlik» sport zalida soat 09:00 dan 11:00 ga qadar bo'lib o'tadi.
Shu kunning o'zida keyingi bellashuvlarni atletlar poytaxtimizdagi «Yoshlik» sog'lomlashtirish-sport kompleksi (sobiq NBU sport majmuasi)da davom ettiradi. Rejaga ko'ra, suzish bo'yicha bellashuv soat 12:00dan 14:00 gacha, o'q otish va yugurish bo'yicha ballarni jamlash esa 15:00-18:00 gacha bo'lib o'tishi ko'zda tutilgan.    
Zamonaviy beshkurash bo'yicha O'zbekiston chempionatining ot sporti bo'yicha o'takaziladigan bellashuvlari 1 aprel sanasiga   belgilangan. Ishtirokchilar «Ot sporti bo'yicha Respublika oliy sport mahorat maktabi»da soat 09:00 dan boshlab otni bo'ysundirish borasida o'z mahoratlarini namoyish etadilar. Musobaqa yakunlangach, O'zbekiston zamonaviy beshkurash federatsiyasining faoliyati taqdimoti va zamonaviy beshkurash bo'yicha mamlakat chempionatining ochilish marosimiga bag'ishlangan tantanali marosim bo'lib o'tadi. Unda ilk musobaqada g'oliblikni qo'lga kiritgan sportchilar munosib taqdirlanadi.   
O'zbekiston zamonaviy beshkurash federatsiyasi yurtimizdagi sport ishqibozlari va OAV vakillarini qizg'in va murosasiz o'tishi kutilayotgan mazkur bellashuvlariga taklif etadi. Musobaqalarga kirish bepul.
O'zbekiston zamonaviy beshkurash federatsiyasi axborot xizmati.
— deya xabar beradi uff.uz nashri.