Joshua Kimmix va Leoni Mayer - Bavariyaning ikki futbol jamoasi a'zolari. Har ikkisi bitta hududda ulg'aygan, Germaniya milliy jamoalarida «Bavariya» klubi vakili sifatida o'ynay boshlagan. Ma'lumki, nemislar tabiatan reja bo'yicha ish tutishni xush ko'rishadi. Ular shuningdek, o'zgachalikka ham moyillar. Quyidagi intervyu bunga yana bir isbot. Xullas, germaniyalik kasbdoshlarimiz erkaklar va ayollar futboli vakillarini bitta stol atrofiga chaqirib, ular bilan turli-tuman masalalar yuzasidan suhbatlashishdi. Joshua va Leoni o'z navbatida, futbolning ikki yo'nalishi o'rtasidagi farqli hamda o'xshash jihatlar xususida mulohaza yuritishdi. - Sizlarni bitta stol atrofida ko'rish yoqimli. Qiziq, kundalik hayotda yo'llaringiz nechog'li tez-tez tutashadi? Mayer: - Ochig'i, juda kam ko'rishamiz. Hozir hattoki, oxirgi marta qachon uchrashganimizni eslolmayman ham. Adashmasam, Joshuani so'nggi marta Marienplatts maydonida tashkillangan tantanada ko'rgandim. Shu ma'noda aytsam, jamoalarimizning bu yil ham chempionlik unvonini himoya qilishi muhim. Shunda hokimiyat binosi oldida yana birga bayram qilardik (kuladi). Jiddiy gapirsam, «Bavariya» ayollar jamoasi asosan Ashxaymdagi bazada shug'ullanadi. Shuning uchun ham, Joshua bilan ko'rishib turishim imkoniyati ancha past.  - Vaholanki, ikkingiz bitta hududda yashagansizlar. Nima, yoshligingizdan tanish emasmisizlar? Ehtimol, umumiy tanishlaringiz yoki do'stlaringiz bordir... Kimmix: - Yo'q, biror marta uchrashgan emasdik, garchi Leoni ham Shtuttgartda tug'ilgan bo'lsada. Mayer: - Ha, men Kanshtatt rayonida dunyoga kelganman. Kimmix: - Mening jonajon shahrim esa Shtutgartdan chamasi 100 kilometr uzoqda joylashgan. Ha, vaqtida «Shtutgart» klubida to'p surganman, ammo uning ayollar jamoasi yo'q edi. Shuning uchun bo'lsa kerak, Leoni Zindelfingendagi futbol maktabida tahsil olgan, adashmasam... Mayer: - To'ppa-to'g'ri! Qoyil, Joshua men haqimda bilar ekan, bu yoqimli. Lekin menda ham ma'lumotlar bor. Tizzamga bog'liq jarohat sabab, Shtutgartdagi klinikada davolanganimda Robin Yalchin sen haqingda gapirib bergandi. Kimmix: - Ha, u bilan maktab yoshida bitta jamoada to'p surganmiz, futbol internatiga ham birga borgandik. Esimda, o'sha oxirgi chempionlik oqshomida ham Yalchinni esga olganding. Demak, aytish mumkinki, ikkimizda umumiy tanishimiz yo'q emas.  - Leoni, Shtutgartda qizlar jamoasi bo'lmaganini nazarda tutib aytsak, boshida o'g'il bolalar davrasida o'ynagandirsiz... Mayer: - 3 nafar akam bor. Aynan ularga ergashib, futbolga oshno tutinganman. Vaqt o'tishi bilan bu o'yindan zavqlanishni o'rgandim, keyin unga shunchaki, bog'lanib qoldim. Darhaqiqat, yoshlar toifasiga ko'tarilguncha o'g'il bolalar jamoasida to'p surganman va bu katta tajriba vazifasini o'tagan. Zero, jismonan baquvvat jamoadoshlarimdan ortda qolmaslikka urinib, ko'proq mashq qilardim. Umuman, yoshlikda bolalar bilan o'ynaganim futbolchi sifatida shakllanishimda muhim ahamiyat kasb etgan - bu ayni haqiqat.  Kimmix: - Men esa qizlar bilan ham o'ynaganman. Aniqrog'i, o'z shaharcham jamoasi tarkibida 2 nafar qiz bola shug'ullangan. Tasavvur qiling, har ikkisi bundesliga klubi safidan joy olish salohiyatiga ega edi. Ulardan biri - Maksimilianna Rall ayni payt «Xoffenxaym» sharafini himoya qilmoqda. Tabiiyki, sen bilan birga shug'ullangan qizaloqlarning shu darajada yuksalishini ko'rish yoqimli.  - Kelinglar, endi erkaklar va ayollar futboli o'rtasidagi farq-li hamda o'xshash jihatlar xususida gaplashamiz. Tushunarliki, yig'lash asosan ayollarga xos hilqat sanaladi. Joshua, rostini aytingchi, maydonda ko'z yoshi to'kkanmisiz? Kimmix: - Bolalikda deyarli har bir mag'lubiyatdan so'ng yig'lardim. Nafaqat futbol, balki boshqa o'yinlarda ham engilishni sira ko'tarolmasdim. To'g'ri, endilikda o'zimni ancha bosim olganman va bo'lar-bo'lmasga ko'z yoshi to'kmayman. Ha, alamli mag'lubiyat yoki muhim g'alaba onlari ehtiroslarni jilovlash oson emas. Xayriyatki, «Bavariya»da o'ynayapman va klubim uchun dahshatli mag'lubiyatlar noyob hodisa sanaladi (kuladi). Xursandchilik ko'z yoshlariga kelsak, bunisi boshqa masala. Deylik, dramatik tus olgan finaldan keyin ulkan zafar ta'sirida o'z-o'zidan yig'lab yuborishingiz mumkin va ayollar buning uchun bizni ayblamasalar kerak, menimcha.  - Leoni, murabbiyingiz - Tomas Vyorle vaqtida futbolchi bo'lgan. Uning aytishicha, ayollar jamoasi murabbiyi umuman boshqa kasb sanaladi. Ya'ni qizlar bilan mutlaqo o'zgacha munosabatda bo'lish, «yomshoq»roq ishlash lozim. Yurgen Klinsmann esa JCh-2006da Polsha termasiga qarshi uchrashuv oldidan shunday ko'rsatma bergan: «Shunchalik kuchli bosim o'tkazinglarki, raqib o'z devorini buzib yuborganini bilmay qolsin...». Xo'sh, ayollar jamoasi oldiga shunday vazifa qo'yish o'rinlimi? Kimmix: - Menimcha, bunday ko'rsatma har joyda o'z samarasini beradi. Mayer: - Bizning murabbiy keskin ko'rsatmalar berishdan tiyiladi. Aksincha, ba'zida maydonda ham ayol ekanligimizni unutmagan holda, harakatlanishimizni tayinlaydi. Shuning barobarida bor kuch bilan to'p surish va kurashishni talab qiladi. Harqalay, katta sport ortiqcha muloyimlikni xush ko'rmaydi. Kimmix: - Tan olish kerak, ayollar futbolini kuzatsangiz, o'yinchilardagi ishtiyoq va harakat-intilish erkaklarnikidan kam emasligini to'liq anglaysiz.  - Xo'sh, shaxsan siz ayollar jamoalari ishtirokidagi nechta o'yinni tomosha qilgansiz? Bu hali hammasi emas, davomi: www.iff.uz InterFutbol.uz ning Telegram dagi sahifasiga ulaning – eng so'nggi yangiliklar, qiziqarli bloglar va tahliliy materiallar endi bir to'plamda.
— deya xabar beradi uff.uz nashri.