«Bavariya» klubining sobiq yarim himoyachisi Mario Basler o'ziga xos xarakterga ega. Mana, u yaqinda bergan intervyusida sevimli jamoasidan qanchalik hayratlanishini yaqqol namoyon etdi. Ya'ni klubni 3ta jumla bilan ta'riflab, yana raqiblarga achinish hissini bildirdi. Harqalay, Baslerning aytishicha, faqat 4ta holatda «Bavariya»ni to'xtatish mumkin ekan.
Baslerning «Bavariya»ga bergan 3ta ta'rifi
1. «Hozirgi «Bavariya» - orzudagi hurliqo ayol. Uning diydori, ya'ni o'yiniga hech qachon to'ymaysan».
2. «Hozirgi «Bavariya» - bu jo'shqin soy. U hech qachon to'xtamaydi».
3. «Hozirgi «Bavariya» - bu yil davomidagi 300 kunlik ta'til».
«Bavariya»ni Qanday to'xtatish mumkin?
Mario Baslerning aytishicha, 4ta holatda myunxenliklarni to'xtatish ilojini topish mumkin ekan:
- Qaysidir raqib hozirgi «Bavariya»ga bas kelishi mumkin-mi? Ha, lekin buning uchun o'ziga xos shartlar kerak.
1. «Bavariya»ning har bir golidan so'ng myunxenliklardan kimdir maydonni tark etadi - almashtiruv huquqisiz. Shunday holatda deylik, «Borussiya» 1:5 hisobidan so'ng qandaydir imkoniyat hosil qilardi. Harqalay, nazariy tomondan...
2. «Bavariya»ning boshlang'ich tarkibida har doim XX asrda dovrug' qozongan va familiyasi «B» harfi bilan boshlanadigan faxriylardan biri maydonga tushishi kerak: Bekkenbauer, Braytner, Breme, Bayerlortser, Bernardo, Bummenigge... Shunday qiziqarli qariyalar guruhi raqiblarga oz-moz ustunlik beradi va ular maydonda nisbatan erkinroq to'p surishadi.
3. «Bavariya»ning sobiq futbolchilari va TV-ekspertlar - Kan, Sholl, Shtrunts, Xelmer, Matteus, Xamann, Bekkenbauer, Bertold, Ton va Basler har bir o'yinni stadionning o'zida sharhlab borishlari kerak. Bu myunxenliklarga xalaqit beradi, chunki ularning quloqlaridan qon oqadi. Hattoki, Duglas Kosta, Koman va boshqa yangi futbolchilar ham, garchi nemis tilini tushunishmasada, aqldan ozishadi.
4. Bunisi eng osoni - shunchaki, Klinsmanni bosh murabbiy lavozimiga qaytarish lozim.
Basler va uning xarakteri haqida nimalarni bilish kerak
1. Basler 1996-1999 yillar oralig'ida «Bavariya»da to'p surgan va o'z davrining eng baquvvat yarim himoyachilaridan biri sanalgan. U Myunxenga ko'chib o'tgunicha «Verder»da etakchilik qilgan va bir mavsumda 20ta gol urib, yana 12tasiga assistentlik qilgancha Germaniya terma jamoasida o'ynash darajasiga etgan. Bundestim tarkibida esa, Evro-96 g'olibiga aylangan. Basler ayniqsa, standart vaziyatlarning mohir ijrochisi edi. Deylik, mavsum-1994|1995da burchak zarbasidan 2 marta to'g'ridan-to'g'ri darvozani ishg'ol etgan. 1998 yili esa 89-daqiqada jarima zarbasini qoyilmaqom darajada bajarib, «Bavariya»ga Germaniya kubogini tortiq etgan. ChL-99ning buyuk finalida «Bavariya»ning yagona golini ham aynan Basler urgandi, yana jarima zarbasidan.
2. Baslerning abadiy yulduz bo'lishiga uning murosasiz xarakteri va salbiy odatlari xalaqit bergan. Mario - kashanda, ichuvchi, qimor o'yinlari ustasi... Shu bois, mudom klublari rahbariyati bilan kelisholmasdi. Hattoki, navbatdagi «hunar»laridan biri tufayli terma jamoadan ham haydalgan. Deylik, 1998 yilning bahorida «Bavariya» alohida xodim (xuddi shaxsiy detektiv)ni ishga yollab, unga Baslerning o'yin va mashg'ulotlardan keyingi yurish-turishini nazorat qilib borishini tayinlaydi. Bu haqdagi xabar Bild nashrining 1 aprel kuni chiqqan sonida yoritiladi va hazilga o'xshagandi. Biroq klubning bosh menejeri Uli Xyoness barchasini tasdiqlaydi: «Ha, rost xabar. Ba'zan yosh kishilarni kuzatuv ostiga olish talab qilinadi - bunda hech qanday g'ayritabiiy tomoni yo'q».
Davomi InterFUTBOL gazetasi blogida.
— deya xabar beradi uff.uz nashri.