Ayni avj nuqtasiga ko'tarilgan mavsum-2016|2017 ayniqsa, bundesliga ixlosmandlarini mamnun etayotgan bo'lsa, ajabmas. Agarda «RB Leyptsig» ajabtovur o'sish natijasida anchagacha duch kelgan raqiblarni xasdek supurib tashlamaganida, mavsum kashfiyoti maqomi yana bir oddiy klub - «Ayntraxt»ga nasib etarmidi? Taajjubki, frankfurtliklar bir yil avval elitada zo'r-bazo'r «jon» saqlab qolishgandi. Endi esa kamtarlikni yig'ishtirib qo'yib, evrokuboklar yo'llanmasiga chang solishmoqda. Harqalay, klubning ishtahasi chakki emas. Marhamat, «Ayntraxt»ning ajabtovur tabiatiga dalolat beruvchi ayrim o'yinlari tafsiloti bilan tanishishingiz mumkin. «Nyurnberg» - «Ayntraxt» - 0:1 (26.05.2016). Albatta, bugungi «Aynt-raxt» 90-yillarda muntazam evrokuboklarda qatnashgan o'sha «qopag'on» jamoaga sira o'xshamaydi. U anchadan buyon o'rtamiyonalar qatorida. Deylik, frankfurtliklar mavsum-2012|2013da 6-pog'onaga ko'tarilgan bo'lsalarda, keyingi chempionatda 13-o'ringa tushib qolishgandi. Shundan so'ng «burgutlar» ahvoli ancha og'irlashdi. Jamoaga 5 yil ustozlik qilgan Armin Fe futbolchilar bilan uzviylikni yo'qotib qo'ydi. Boz ustiga, jamoa sardori Marko Russ saraton xastaligi tufayli safdan chiqdi, uning o'rnini egallagan Aleksandr Mayer esa avvalgidek samaradorlik ko'rsatolmadi. Shu tariqa «Ayntraxt» autsayderga aylangach, mutasaddilar aka-uka Miko va Robert Kovachlarni taklif etishdi. Yaqin o'tmishda bundesligada ishonchli to'p surgan yosh mutaxassislar bir amallab, «Ayntraxt»ni «o'tish» o'yinida qatnashish huquqini beruvchi 16-o'ringa olib chiqishdi. Raqib - «Nyurnberg». Frankfurtda kechgan dastlabki bellashuvda Marko Russ avtogol muallifiga aylandi, keyin mezbonlar hisobni tenglashtirishdi. Javob uchrashuvida esa Russ diskvalifikatsiya tufayli maydonga tushmadi. Shunday bo'lsada, futbolchilar sardor familiyasi tushirilgan futbolkalarda harakatlanib, ortga g'alaba bilan qaytishdi va  «Ayntraxt» elitada qoldi. «Ayntraxt» - «Bavariya» - 2:2 (15.10.2016). Katta qiyinchiliklar bilan kuchlilar safida qolgan jamoadan hech kim shiddatli parvoz kutgan emasdi. Oktyabr oyi oxirigacha ham qandaydir uchqun sezilmadi - «burgutlar» chempionatda eng qo'pol va zerikarli futbol namoyish etishdi. «Bavariya»ga qarshi uchrashuvni esa faqat ashaddiy muxlislargina kuzatishdi. «Nyurnberg» 15 oktyabr oqshomi  o'z uyida Myunxen superklubini qabul qilib, dastlabki 10 daqiqadayoq deyarli «sindi». Hujum ketidan hujum uyushtirgan mehmonlar hisobda oldinga chiqib olib, tanaffusga qadar shunchaki, mashg'ulot o'tkazishdi, go'yo. Ularning shu xotirjamliklari natijasida Sabolch Xusti bo'lim oxirida gol urdi. 62-daqiqaga kelib, Evro-2016 kashfiyotlaridan biri - Joshua Kimmix mehmonlarni hisobda yana oldinga olib chiqdi. Bunga asablari dosh berolmagan Xusti gol muallifiga qo'pollik ishlatdi va maydondan chetlatildi. Qarangki, «Ayntraxt» 10 kishi bo'lib qolganiga qaramay, hujumkor o'yin ko'rsata boshladi. Ya'ni qudratli raqibni o'z jarima maydonchasi ichiga «qamab» qo'ydi. Oxir-oqibat, mezbonlar ikkinchi golni nishonlab, peshqadamni muhim 2 ochkodan mahrum etishdi. O'shanda jangovar durang tasodifiy natijaga yo'yilgan va faqat «Bavariya»ning ayanchli holati ta'kidlangandi. Zero, myunxenliklar bundan avval «Kyoln»ni engolmay, karvonboshilikni «Leyptsig»ga berib qo'ygandilar. Xullas, «Ayntraxt» tezda unutildi... «Ayntraxt» - «Borussiya» D. - 2:1 Bu hali hammasi emas, davomi: www.iff.uz InterFutbol.uz ning Telegram dagi sahifasiga ulaning – eng so'nggi yangiliklar, qiziqarli bloglar va tahliliy materiallar endi bir to'plamda.
— deya xabar beradi uff.uz nashri.