Karate bo'yicha O'zbekiston terma jamoasi a'zosi Sadriddin Saymatov Birlashgan Arab Amirliklarining Dubay shahrida bo'lib o'tgan “Premer-liga Karate 1 – 2017” nufuzli xalqaro turnirida ham oltin medalga sazovor bo'lib, Premer Liganing ketma-ket uchta bosqichida zafar quchishni uddaladi. 31 mart - 2 aprel kunlari bo'lib o'tgan mazkur musobaqada dunyoning 76 mamlakatidan 900 nafarga yaqin sportchilar ishtirok etishdi.
60 kg vazn toifasida kumite bahslarida ishtirok etgan hamyurtimiz finalga qadar David Gchebugava (Gruziya), Bexnaman Maxzavi (Eron), Daniel Barkinda (Shvetsiya), Stepan Efimenko (Rossiya), Angelo Krementso (Italiya) va Samdan Eray (Turkiya)larni mag'lub etgandi. Hal qiluvchi bahsda esa Sadriddinga turkiyalik yana bir sportchi Aykut Kayya ro'baro' keldi. Final uchrashuvida raqibini 8:5 hisobida mag'lub etgan Sadriddin Saymatov oltin medalni qo'lga kiritib, musobaqa g'olibiga aylandi. Ushbu vazn toifasida bronza medallari eronlik Amir Mahdizoda va turkiyalik Samdan Eraylarga nasib qildi.
E'tiborli jihati, O'zbekiston milliy terma jamoasining katta murabbiyi O'ktam Bekpo'latovning shogirdi, termizlik 19 yoshli Sadriddin Saymatov o'zining bu natijasi bilan “Premer Liga Karate 1 -2017” turnirida ketma ket uchinchi oltin medalini qo'lga kiritdi. Bunga qadar hamyurtimiz yil boshidan beri Parij va Rotterdam shaharlarida o'tkazilgan Premer Liga bosqichlarida ham birinchi o'rinni egallagandi.
Ma'lumot uchun, Premer Liga turniri jahon kubogi darajasidagi musobaqa bo'lib, beshta bosqichdan iborat bo'ladi. Joriy yilda ushbu musobaqalarga Parij (Frantsiya), Rotterdam (Gollandiya), Dubay (BAA), Rabot (Marokash) va Leyptsig (Germaniya) shaharlari mezbonlik qiladi. E'tiborlisi, Premer Liga bosqichlari 2020 yili Tokio mezbonlik qiladigan yozgi Olimpiya o'yinlariga qimmatli reyting ochkolarini taqdim etadi. Hozirda o'zbek karatesi tarixida birinchi marta vatandoshimiz jahon reytingida birinchi o'rinda bormoqda va ushbu natijasini saqlab qola olsa Tokio 2020 Olimpiya o'yinlari litsenziyasiga ega bo'lishi shubhasiz.
Ta'kidlash kerakki, kelasi oyda O'zbekiston karate Milliy federatsiyasi Prezidenti Alamjon Mullaevning taklifiga ko'ra Butunjahon karate federatsiyasi (WKF) Prezidenti Antonio Espinoza poytaxtimizga tashrif buyuradi. O'z navbatida bu uning Markaziy Osiyoga uyushtiradigan ilk safari bo'ladi.
O'zbekiston Milliy olimpiya qo'mitasi
matbuot xizmati
— deya xabar beradi uff.uz nashri.