1news.uz — Xabaringiz bor, 28 mart kuni Toshkentdagi ­«Bunyodkor» stadionida O'zbekiston hamda Qatar milliy terma jamoalari o'rtasidagi JCh-2018 saralash uchrashuvi millionlab muxlislarda, oz bo'lsa-da, umid uyg'otdi. Unda O'zbekiston termasining 1:0 hisobidagi g'alabasi o'z guruhida 2-o'rin uchun imkoniyatlarini saqlab qoldi. Xo'sh, Suriyaga mag'lub bo'lib, butun futbol muxlislarining haqli e'tirozini uyg'otgan, Qatarni ba'zo'r engib, ishqibozlar ehtirosini sal bosgan terma jamoamizning keyingi taqdiri qanday bo'ladi? Jahon chempionatiga chiqishidan umid qilsa bo'ladimi? Yoki termamiz taqdiri va imkoniyatlari doimgiday yana boshqa jamoalarning natijalariga bog'liq bo'lib qolaveradimi? Ushbu savollar kun tartibidagi eng dolzarb masala sifatida qizg'in bahslarni uyg'otmoqda. Muxlisu mutaxassislar, jurnalistlar bu borada o'zaro muhokamaga kirishib ketgan. Aslida tan olish kerak, terma jamoamiz oldiga jiddiy vazifa ko'ndalang qo'yilgan. Shunday ekan, ular qolgan uchta uchrashuvning barchasida g'alaba qozona oladimi? Taniqli jurnalist Shuhrat Shokirjonov o'zining «Kelajak uchun taklif: shokoterapiyaga tayyormisiz»? sarlavhali maqolasida shunday deydi: «Ishonmayman! Chunki murabbiyga yaqin ishlovchilar, terma jamoalar markazi xodimlari ham ijtimoiy tarmoqlarda bizning Osiyodagi o'rnimiz shu, borimiz,  bo'lganimiz shu, deya saralash guruh bosqichida 3-o'ringa loyiq ekanimizni pisanda qilishmoqda. Futbolimiz ichida yurgan odamlar ishonmagach, muxlislar nima qilishsin?! Inson o'z imkoniyatlari darajasidan bir kalla yuqori sakray olishni ham bilishi kerak. Imkoniyatga chegara qo'yilgan joyda o'sish bo'lmaydi, tanazzul bo'ladi. Buni anglab etish uchun qalin kitoblarni o'qish shart emas. Mutaxassislarki, guruhda joyimiz aniq 3-o'rin, deb turgan ekanki, demak…» Tarkib haqiqatda kuchlimi? Terma jamoamiz bosh murabbiyi Samvel Babayandan tarkib haqida savol berishganda u: «Ayni vaqtda eng kuchli tarkibga ega ekanimiz haqidagi so'zlardan qochmayman. Bu haqiqatdan ham shunday»,  deb javob berdi. Demak, bosh murabbiy nazdida hammasi joyida. Lekin Sh.Shokirjonov bu haqda to'xtalarkan: «Yoshlarimiz, o'smirlarimiz muntazam qatnashib kelayotgan Jahon chempionatlaridan mosuvo, klublarimizda ham shu ahvol. Xalqaro maydonda tajriba oshirmayotgani vaji bilan yosh futbolchilarimizning milliy terma jamoa tarkibiga jalb qilinishini mutlaqo ko'rayotganimiz yo'q. Terma jamoamiz esa saralashda qatnashayotgan 12 terma ichida eng qariya jamoa. Haligacha Qatar — 2011 qahramonlari terma jamoamiz asosini tashkil etishmoqda…» Muxlislar nima deydi? Terma jamoamizning so'nggi o'yini va keyingi taqdiri ijtimoiy tarmoqlarda ham qizg'in muhokama qilinmoqda. Ularda shunday deyiladi: S.BOZOROV: — Qatar bilan o'yinda Odil Ahmedovdan tashqari, Eldor Shomurodov, Sardor Rashidov, Davron Hoshimov, Anzur Ismoilov boshqa o'yinchilarga nisbatan faolroq harakat qilib ajralib turdi. Sardor Rashidov asosiy tarkib o'yinchisiga loyiq. O'yinda uni nega zaxiraga olib, o'rniga Marat Bikmaevni tushirgani tushunarsiz holat. Axir, Sardor Rashidov eng faol harakat qilib turgan o'yinchi edi… E.MADOROV: — Keyingi turda termamiz Xitoyni yutishi shart. Janubiy Koreya Eronni yutgan taqdirda yana bir ochkolik farq saqlanib qoladi. Oxirgi turda koreyaliklar bilan uyda o'ynaymiz. Ana shu o'yin hayot-mamot jangi bo'ladi. D.MAShRABOV: — O'zbekiston terma jamoasining o'yini borgan sari zaiflashib bormoqda. Yaqin o'tmishda «Fair play» sovrinini yutib olgandik. Oxirgi paytlarda qoidabuzarliklar, vaqt cho'zishlar juda chuqur singib bormokda. Futbolchilarimizga ba'zan uyushqoqlik, sovuqqonlik etishmayapti. Hujum chizig'imiz hamon oqsamoqda. Agar so'nggi, hal qiluvchi turlarda Osiyoning grand jamoalariga qarshi ham vaziyatlardan unumli foydalana olmasak, yana mundial armonga aylanishi hech gap emas. M.NABIEV: — Qatar bilan bo'lgan uchrashuvda milliy terma jamoamiz xuddi Suriya bilan bellashuvdagi o'yinni ko'rsatdi. Ikki o'yindan buyon golga tortadigan birorta vaziyat qilolmayapti yigitlarimiz. Bu ketishda mundial yo'llanmasini qo'lga kiritish masalasi yanada murakkablashishi aniq. Axir, oldinda kutayotgan jamoalar bizning bu kabi kamchiliklarimizni kechirmaydi. A.BOTIROV: — Nazarimda, Igor Sergeev ko'chadan kelib, maydonga tushgan ishqibozga o'xshaydi. Birgina vaziyat bo'ldi, uni ham qo'pol qilib aytganda, to'pga birinchi bor tegayotgan odamdek ko'kka sovurdi. Taktikani yangilab, tezkor futbolchilarni tushirmas ekanmiz, bu o'yin bilan uzoqqa borolmaymiz. F.DORIPOV: — Jamoaning o'yini Odil Ahmedovga bog'liq bo'lib qolmoqda. Bu yaxshi emas. Uning o'rnini bosa oladigan futbolchilarni tarbiyalab etishtirish zarur. Afsuski, hozir bunday o'yinchi yo'q. Agar vaziyat shu taxlit davom etsa, bu bizning faqat zararimizga ishlaydi. Axir, Odil ham jarohat olishi mumkin-ku! Maqolaning tafsilotlari bilan 1news.uz saytida ushbu havola orqali tanishishingiz mumkin.
— deya xabar beradi uff.uz nashri.