2-3 aprel kunlari Tailand poytaxti Bangkok shahrida Xalqaro Og'ir atletika federatsiyasining navbatdagi Kongressi bo'lib o'tdi. Unda O'zbekiston Og'ir atletika federatsiyasi raisining birinchi o'rinbosari Shahrullo Mahmudov ham ishtirok etdi. Kongress ertaga, 4 aprel kuni start oladigan o'smirlar o'rtasidagi jahon chempionati arafasida tashkil etildi va so'nggi Olimpiya tsikli, ya'ni 2013-2016 yillarda qilingan ishlarga mantiqiy yakun yasab berdi. Ma'lumot uchun, Shahrullo Mahmudov Osiyo Og'ir atletika federatsiyasining vitse-prezidenti, Xalqaro og'ir atletika federatsiyasi texnik qo'mitasi a'zosi hisoblanadi.
Kongressda bir qator masalalar muhokama etildi. Jumladan, aytib o'tganimizdek 2013-2016 yillar mobaynida Xalqaro Og'ir atletika federatsiyasi tomonidan qilingan ishlar, o'tkazilgan musobaqalar, sarflangan mablag'lar xaqida hisobot berildi. Shuningdek, navbatdagi Olimpiya tsikli 2017-2020 yillar uchun mo'ljallangan istiqbol rejasi, marketing masalalari, doping nazorati masalalaridayam fikr almashildi.
Ertadan endi Bangkokda o'smirlar o'rtasidagi jahon chempionati start oladi. Musobaqada 57 ta davlatdan 445 nafar sportchilarning ishtirok etishi kutilayapti. O'zbekiston terma jamoasi ham musobaqada to'liq tarkibda qatnashadi. Bugun kechurun, 16 ta sportchi, 4 ta murabbiy va bitta hakamdan iborat delegatsiyamiz a'zolari Toshkent xalqaro aeroportidan jahon chempionatida ishtirok etish Tailand safariga jo'nab ketishadi. 10 aprelga qadar davom etadigan musobaqada quyidagi sportchilarimiz yurtimiz sharafini himoya qilishadi:
1. Saidmuxtor Saidaxrorov         94 kg
2. Azamat Ramazanov                      62 kg
3. Asadbek Narimanov                   62 kg
4. Muhammadqodir Toshtemirov   69 kg
5. Aleksandr Li                             94 kg
6. Sarvar Toshtemirov                   69 kg
7. Dilmurod Salimov                    77 kg
8. Azimjon Xodjiev                     85 kg
9. Dolera Davronova                      75 kg
10. Gulnoza Axmadova                    75 kg
11. Zuxra Otajonova                      48 kg
12. Shaxloxon Abdullaeva             58 kg
13. Tursunoy Jabborova               69 kg
14. Kumushxon Fayzullaeva           58 kg
15. Shodmonoy Ochilova                 75 kg
16. Zarnigor Abduraxmonova        63 kg
Biz uchun e'tiborga molik jihati shundaki mazkur jahon chempionatida 2018 yilda Argentinada bo'lib o'tadigan III o'smirlar Olimpiya o'yinlariga litsenziyalar o'ynaladi. Ma'lumotlarga ko'ra, jahon chempionatida 1-7 o'rinni egallagan terma jamoalar 2+2 ko'rinishida litsenziyalarga ega bo'lishadi. Ya'ni umumjamoa hisobida kuchli ettitalikka kirgan davlatlar uchun 2 ta o'g'il bolalar va 2 ta qizlar uchun o'smirlar Olimpiya o'yinlari yo'llanmasi ajratiladi. 8-17 o'rinlarni band etgan terma jamoalarga esa 1+1 ko'rinishida yo'llanmalar taqsimlanadi.
Biz bo'lajak jahon chempionatida terma jamoamiz a'zolariga omad va zafarlar tilab qolamiz va albatta yurtimizga yorug' yuz bilan qaytishlariga tilakdoshmiz.
O'zbekiston Milliy olimpiya qo'mitasi
matbuot xizmati
— deya xabar beradi uff.uz nashri.