Xabaringiz bor, Samarqandning “Dinamo” jamoasi safida ko'rsatgan mazmunli o'yinlari bilan muxlislar olqishiga sazovor bo'lgan futbolchi Sirojiddin Sayfiev 2014 yilgi mavsumda og'ir jarohat olgandi va natijada futbolchilik faoliyatini yakunlagandi. “Lokomotiv” jamoasiga qarshi kechgan bahsda oyog'idan juda jiddiy jarohat olgan Sayfiev ayni paytda og'ir hastalikka chalingan. Unga ham ruhan, ham moddiy jihatdan dalda bo'lish maqsadida championat.asia sayti tashabbusi bilan o'zbek futboli jamoatchiligi maxsus aktsiya tashkil etmoqda. “Lokomotiv” futbol klubi ham ushbu hayriya aktsiyasidan chetda turish niyatida emas. Jamoamiz ishtirokida 11 aprel kuni Osiyo Chempionlar Ligasi guruh bosqichi doirasida “Lokomotiv” stadionida o'tadigan Eronning “Istiqlol” jamoasiga qarshi uchrashuv chiptalari sotuvidan tushgan mablag' Sirojiddin Sayfievga yordam sifatida taqdim etiladigan bo'ldi. Qolaversa, jamoamiz a'zolari ham bugungi mashg'ulot boshlanishi arafasida Sirojiddinni qo'llab-quvvatlash maqsadida ekanliklarini ma'lum qilishdi va unga sog'lik tilagan holda moddiy yordam berishlarini ta'kidlashdi. #BizSenBilanSirojiddin #TaslimBo'lmaSirojiddin
— deya xabar beradi uff.uz nashri.