Avval xabar berib o'tganimizdek, Rossiyaning Sochi shahrida “Kuban kubogi-2015” xalqaro turniri o'tkazilmoqda.
2004 yilda tavallud topgan futbolchilardan iborat musobaqada “Bunyodkor” futbol maktabi tarbiyalanuvchilari 24ta jamoa ichida muvaffaqiyatli ishtirok etishib, turnirning hal qiluvchi final uchrashuviga yo'llanma olishgani haqida xabar berib o'tgandik.
Bugun Mirkamol Qosimov va Temur Boboxonov ustozligidagi tarbiyalanuvchilarimiz finalda Samaraning “Krilya Sovetov” futbol maktabi vakillari bilan kuch sinashishdi. Qiziqarli va murosasiz o'tgan final o'yini taqdirini Azimjon Xusanov tomonidan kiritilgan yagona gol hal qildi. Shu tariqa, “Bunyodkor-2004” Sochida o'tgan “Kuban kubogi-2015” VII xalqaro turniri bosh sovrinini qo'lga kiritishdi.
Ushbu muvaffaqiyat bilan “Bunyodkor-2004” murabbiylari Mirkamol Qosimov, Temur Boboxonov va yosh futbolchilarimizni tabriklaymiz.
— deya xabar beradi uff.uz nashri.