Andijon shahrida O'zbekiston futbol Federatsiyasi taqvimiga asosan mamlakatimizdagi professional futbol klublari qoshidagi bolalar va o'smirlar futbol maktablarining 2004-yilda tug'ilgan yoshlari o'rtasida 3 noyabr kuni boshlangan Respublika birinchiligi o'z yakuniga etdi.
Musobaqaning olti kuni davomida “Paxtakor”, “Nasaf”, “Dinamo”(Samarqand), “Sho'rtan”, “Navbahor”, “Neftchi”, “Andijon” Buxoro viloyatidan ikkita “Buxoro” hamda “BO'FM” jamoalarining yosh futbolchilari maydonda o'z mahoratlarini namoyish qildilar.  
Murosasiz bahslarga boy tarzda o'tgan turnir yurtimizda ko'plab yosh iqtidor egalari voyaga etib kelayotgani ko'rsatib berdi. Musobaqaning final bahsida mezbon “Andijon” futbol maktabi tarbiyalanuvchilari Farg'onaning “Neftchi” klubi yoshlariga qarshi to'p surdilar. O'yin so'ngi daqiqalarda kiritilgan yagona gol hisobiga mezbonlar foydasiga hal bo'ldi.  
Turnirning tantanali yopilish marosimida so'z olgan viloyat futbol federatsiyasi vitse-prezidenti Bekzodbek Karimov, Andijon shahar futbolga ixtisoslashgan maktab-internati direktori Nasibullo Madrahimov, “Andijon” futbol klubi qoshidagi futbol maktabi direktori Muhammadqosim To'htasinovlar jamoalarga ajoyib ishtiroki uchun tashakkur bildirib, ularga kelgusi ishlarida muvaffaqiyatlar tiladilar. Shundan so'ng mos ravishda 1, 2 va 3 o'rinni egallagan “Andijon”, “Neftchi” hamda “Nasaf” jamoalariga Andijon viloyati hokimligi, viloyat futbol federatsiyasining diplom va medallari, esdalik sovg'alari topshirildi. G'olib “Andijon” jamoasi Kubok bilan taqdirlandi.
-Musobaqa davomida barcha jamoalar tomoshabinlar yodida qoladigan o'yinlarni namoyish qildi,-deydi viloyat futbol federatsiyasi vitse-prezidenti Bekzodbek Karimov. O'ylaymanki, ushbu iqtidorli yoshlarimiz orasidan kelajakda yurtimiz futboli nufuzini yanada yuksaltiradigan o'yinchilar etishib chiqadi. Elmurod ERMATOV, Andijon   Musobaqadan olingan fotolavhalar:
— deya xabar beradi uff.uz nashri.