Sardor Rashidov - Osiyoning eng yaxshi futbolchisi bo'lishga nomzod o'n nafar futbolchi orasida. Bu xabar o'tgan hafta Qatarning «Al- Jaish» klubi tomonidan tarqatildi. Kimdir bunga jiddiy qaradi, boshqalar esa yo'q. Umuman, Sardor Osiyoning eng yaxshisi bo'lishiga ishonmaydiganlar orasida ushbu maqola muallifi ham bo'lsa, aybga buyurmaysiz. Rashidov - iqtidorli futbolchi, buni hech kim inkor etmaydi. Ammo qit'aning eng yaxshisi bo'lish uchun faqat buning o'zi kamlik qiladi-da. Shunday emasmi?
Ammo Osiyoda har narsa bo'lishi mumkin. Zero, ruslar «Sharq - nozik masala», deb bejizga aytishmagan. Masalan, Evropada hali birov tanib, birov tanimagan futbolchini eng yaxshi, deb tan oling-chi, balolarga qolib ketasiz. Bu o'rinda gap «ko'hna qit'a»da kuchli futbolchilar ko'pligida ham emas. U erda matbuot shunday ishlaydiki, istalgan futbolchini «piar» qilib, dunyoga tanitib yuborish hech gap emas. Marca, AS, El Mundo Deportivo, France Football, La Gazzetta de llo Sport, Daili Mail - bu nashrlar istaganini qilishi mumkin. Bir murabbiy yoki futbolchini maqtab, osmonga chiqarib qo'yish yoki tanqid qilib, er ostiga kiritib yuborish hech gap emas. Ammo hamma gap shundaki, hatto ular ham biror jamoaga chempionlik yoki EChL g'olibligini olib bera olmaydilar. Shu sababli jahonning yoki Evropaning eng yaxshi futbolchisi nomini faqat eng kuchlilar olishadi. Bizdachi?
Osiyoda bunday gazetalar yo'q. Kamiga teletranslyatsiyalarga qiziqish ham past. Ularga hamohang tarzda futbol rivoji ham oqsaydi. Biror futbolchini yaxshilab tanib olish uchun Evropada o'ynayotgan yoki o'ynab kelgan bo'lishi shart. Aks holda, mashhurlikka erishish ancha mushkul. Biz ularning o'yinini nari borsa O'zbekiston milliy terma jamoasiga qarshi kechgan bahslarda ko'rib, baho berishimiz mumkin. OChLda esa ko'pincha «birinchi skripka» rolini Janubiy amerikalik yoki afrikalik futbolchilar bajaradilar. Osiyo vakillari esa ularning soyasida qolib ketadilar. Shunday ekan, qit'aning eng kuchli futbolchisini qanday qilib aniqlab olish mumkin?
Agar biz Evropada bo'lganimizda, bu savolning javobi ancha oson topilardi - faqat va faqat qo'lga kiritilgan sovrinlarga qarab! Ammo hamma gap shundaki, biz - Osiyodamiz! Bu erda esa vaziyat shu qadar chigalki, eng yaxshi futbolchi qanday kriteriyalar asosida tanlanishini hech kim bilmasa ham kerak. Uzoqqa bormaylik, masalan, Server Jeparov qaysi xizmati evaziga ikki marta Osiyoning eng yaxshisi bo'lganiga ko'pchilikning aqli hamon etmaydi. Chunki 2008 yilda unga ilk marta shu nomni berishganda boshqalar tugul, o'zimiz ham hayron qolganmiz. O'sha yili «Bunyodkor» nimanidir qoyil qilmagan va nari borsa OChLda yarim finalga qadar etib borgan edi. To'g'ri, O'zbekiston chempionatida g'alaba qozongan, ammo oliy ligadagi g'oliblik uchun eng yaxshi futbolchi bo'laversa, qit'aning barcha yulduzlari O'zbekistondan chiqishi kerak, shunday emasmi? Ular esa nima uchundir faqat Server Jeparovni tanlashgan...
Davomi InterFUTBOL gazetasi blogida.
— deya xabar beradi uff.uz nashri.