Piter Birdsli (1991 yilda «Everton»ga o'tgan). Piter Birdsli «Liverpul» tarixida alohida o'rin tutadi. U Jon Barns bilan birgalikda jamoaga kelib qo'shilgan va Kenni Dalglish qo'l ostida muxlislar yoqimtoyiga aylangan. O'zining texnikasi va aqlliligi bilan hujumlarning keskin tus olishi hamda yakunlanishida juda katta ahamiyatga ega bo'lgan. Piter «Qizillar» tarkibida 150 o'yinda 59 ta gol kiritadi. Keyinchalik Dalglish ketib, jamoada murabbiylar almashdi. «Qizillar» yangi ustozi Grem Suness o'z o'yin uslubiga Birdslining mos kelmasligini aytadi. O'sha damda ketishdan boshqa iloj topa olmagan hujumchi «Liverpul» ning ashaddiy raqibi «Everton» safiga ko'chib o'tadi. 1992-yil 30 yoshida Mersisayd derbisida g'alaba to'pini kiritgan hujumchi, Sunessning katta xatoga yo'l qo'yganini barchaga isbotlaydi. Keyin esa u «Nyukasl» safiga o'tib, Endi Koul bilan bir qancha yorqin mavsumlarni o'tkazadi. Nikolya Anelka (2002 yilda  «Manchester Siti»ga o'tgan).   Nikolya Anelkaning «Liverpul» dagi 2001-2002 yilgi mavsumdagi ijara faoliyati omadli chiqdi. To'g'ri, 22 o'yinda kiritilgan atigi 5 ta gol uning klubdagi faoliyati juda yorqin chiqqanligini anglatmaydi, biroq fransuz futbolchisi o'shanda hujum chizig'iga sog'lom raqobatni olib kiradi. Jerar Uleda uni mavsum yakunlanganidan keyin futbolchini sotib olish huquqi bor edi, biroq negadir murabbiy bundan bosh tortdi. U Anelkaning o'rniga «Lans» hujumchisi El Haji Diufni olib kelishni ma'qul ko'rdi. Aksiga olib, uning klubdagi faoliyati u qadar yorqin kechmadi, Anelka esa faoliyati davomida «Chelsi»ga o'tib, bir qancha yirik sovrinlarni o'z hisobiga yozdirib qo'ydi. Yon Arne Riise (2008 yilda  «Roma»ga o'tgan). «Monako» bilan Liga 1 g'olibligini qo'lga kiritgan Riise saviyasi yuqori bo'lgan chempionat va klubda o'ynash ishtiyoqiga tushib qoldi. Futbolchi uchun kurashda bir necha ingliz jamoalari kurashishdi va bu kurashda «Liverpul» g'olib chiqdi hamda 4 mln funt evaziga norvegiyalik himoyachini o'z safiga qo'shib oldi. Riise uzoq vaqt davomida «mersisaydlik» muxlislar qalbida chuqur o'rin egalladi. U juda kuchli va aniq zarbalari, oldinga va ortga tezda borib-qaytishlari bilan barchani lol qoldirardi. Futbolchi 2005-yil «Milan» ustidan qozonilgan g'alabadan so'ng, klub bilan shartnomasini uzaytiradi. 2007/2008-yilgi mavsumning birgina Chempionlar Ligasida «Chelsi»ga qarshi bahsdagi avtogoli, Riisening «Liverpul» dagi faoliyatida «qora davr»ga aylandi. Shundan keyin u Fabio Aurelioga raqobatda imkoniyatni boy berdi. Riise «Roma»ga ketganidan so'ng, «qizillar» hozirga qadar u singari kuchli chap qanot himoyachisi topa olmayapti: na Aurelio, na Koncheski va na Enrike norvegiyalik futbolchining o'rnini bosa olishdi. Denni Myorfi (2004 yilda  «Charlton»ga o'tgan). Ba'zi bir muxlislar bu ro'yhatda nima sababdan Myorfining ism-sharifi bor ekanligi xususida savol berishlari tabiiy. Klub tarixini yaxshi biladiganlar esa bu nomdan ajablanishmaydi. Denni Myorfining asosiy tarkibga kirish harakatlari juda qiziqarli tus olgan. Dastlab, futbolchi katta raqobat tufayli bir qancha qiyinchiliklarga duch kelgan. Ijara sarguzashtlaridan keyin esa Jerrard va Hamannga markazdagi o'rnini boy beradi, murabbiylar oxir-oqibatda uni qanotga qo'yishga qaror qiladi. O'zining bor salohiyatini ishga solgan Myorfi «Oltin trebl» qayd etadi hamda Old Traffordda «Manchester Yunayted» darvozasiga 3 ta to'p kiritishning uddasidan chiqadi. Bunday futbolchilarni har doim qadrlaydigan muxlislar uni mavsum yakunlanganidan so'ng «yilning eng yaxshi futbolchisi»ga aylantiradi. Rafael Benites klubni qabul qilib olganidan so'ng, Denni jamoaga kerak bo'lmay qoladi. Oqibatda u «Fulxem»ga o'tib ketadi. Futbolchi u erda bir necha yillar mobaynida muvaffaqiyatli to'p suradi va aynan «Liverpul»ni mag'lub etib, Evropa Ligasi finaliga yo'l oladi. Xabi Alonso (2009 yilda «Real Madrid»ga o'tgan). Aynan Xabi Alonsoning ketishi Benitesning «Liverpul»dagi faoliyati og'irlashishiga, Hojson va Dalglishning esa biror nima qila olmaganligiga sababchi bo'ldi. Hali-hamon Rafa Xabini so'nggi soniyalarga qadar olib qolishga uringani haqida gaplar bor. «Liverpul»ning Alonso-Maskerano-Jerrarddan iborat «metin yarim himoya»si haligacha Angliya Premer-ligasida eng kuchli, deya e'tirof etiladi. Lekin endi Maskerano «Barselona»da, Alonso «Bavariya»da, Jerrard esa «maydon tashqarisi»da... «Mersisaydlik» muxlislar ko'pincha shu savolni takror berishadi: « markazda shunday trio yana paydo bo'ladimi»? Rahim Sterling (2015 yilda «Manchester Siti»ga o'tgan). Katta iqtidor sohibi Rahim Sterling o'zining rang-barang harakatlari, tezkor driblingi evaziga «Liverpul» muxlislari qalbiga uchqun olib kira olgandi. Ammo u jamoaga ko'proq olqishlardan ko'ra, pullarni olib kira oldi. Ishqibozlarni norozi qilgan Sterlingning o'tgan mavsum «Siti»da omadi chopmaganidan keyin, bor umidi yangi murabbiy  Xosep Gvardiolaga qaratildi. Ispaniyalik mutaxassis esa uni joriy mavsumda qaytadan kashf etdi. Balki, Yurgen Klopp qo'l ostida u bugun jahonning eng kuchli hujumchilari qatorida bo'larmidi, kim biladi... Luis Suares (2014 yilda  «Barselona»ga o'tgan).
Tasavvur qiling, agar Suares «Liverpul»da qolganida, klub bugun qanday kuchli bo'lar edi-ya? So'zsiz, jamoa chempionlikka eng asosiy nomzod deb tilga olinardi. Luisni jamoada olib qolish juda ham qiyin bo'lgan. U esa har doim klubga sodiqligini ko'rsatgan. Har transfer bozorida bir necha marotaba «qizillar»ni «tark etgan» hujumchi, yana qayta «qaytib kelgan». U ham APL chempioni bo'lish uchun borini berdi. Ammo bu maqsadga erisha olmagan urugvaylik futbolchi «Barselona»ga katta mablag' evaziga ko'chib o'tdi. «Liverpul»ning aksariyat ixlosmandlari haligacha Suaresni qo'yib yuborgan Jon Genri (klub egasi)dan nafratlanib keladi. Suares Messi va Neymar oldida yo'qolib qolmadi. Eng muhimi esa, 4 oylik diskvalifikatsiyadan keyin ham u «yirtqich Suares» bo'lib qaytdi. Bugungi kunda Luis o'z davrining eng kuchli hujumchilari sifatida e'tirof etiladi.
— deya xabar beradi uff.uz nashri.