Chimkentning "Ordabasi" klubi yana ikki legionerni qo'shimcha ro'yxatdan o'tkazish uchun qo'shimcha pul to'laydi.
Qozog'iston chempionati reglamentiga ko'ra har bir klub 30 dan ortiq futbolchini ro'yxatdan o'tkaza olmaydi. Ushbu ro'yxatdan o'rin olgan 8 futbolchi klub tarbiyalanuvchisi bo'lmasligi mumkin. Agar klub o'z tarbiyalanuvchisi bo'lmagan yana ikki futbolchini qo'shimcha ro'yxatdan o'tkazishni istasa har bir futbolchi uchun 35 million tenge to'lashi lozim.
Ayni vaqtda "Ordabasi" tarkibida 10 nafar legioner bor: Pablo Fontanello (Italiya/Argentina), Zoran Rendulich (Serbiya), Abdulla Diakate (Senegal), Nikita Bocharov (Rossiya), Kirill Kovalchuk (Ukraina/Moldova), Otar Martsvaladze (Gruziya), Preslav Yordanov (Bolgariya), Aleksandr Geynrix (O'zbekiston), Aleksandr Simchevich (Serbiya) va Gogita Gogua (Gruziya). "Ordabasi" ulardan faqat 8 nafarini ro'yxatdan o'tkazish huquqiga ega.
Yana qo'shimcha ikki legionerni ro'yxatdan o'tkazish esa klubga 70 million tengega tushadi. Bu huquqdan joriy mavsum faqat "Ordabasi" foydalandi. Boshqa klublar limitdan oshiq legionerni ro'yxatdan o'tkazmagan.
— deya xabar beradi uff.uz nashri.