Jahon mundiali saralash bahslarida ma'suliyatsiz uchrashuvning o'zi bo'lmaydi. 12 - noyabr kuni  Shimoliy Koreya vakillari bilan bo'lib o'tadigan o'yin oldidan yurtimiz futbol ixlosmandlarining yana yuraklari  taka-puka... Barchaga ma'lum  ushbu to'qnashuv - guruh bosqichi peshqadamini aniqlab beradi. Muhim o'yinga muxlislar tomonidan berilgan  fikrlarni sizlar bilan o'rtoqlashishni niyat qildik.
Alisher Norboboev (“ALBARS”), Termiz
Milliy terma jamoamizning KXDR bilan o'tkaziladigan o'yini qanchalik muhimligini futbolimizga befarq bo'lmagan barcha - barcha muxlislar juda yaxshi tushunib turishibdi.  Samvel Babayan boshchiligidagi murabbiylar shtabi oldida turgan eng muhim vazifalardan biri, aynan shu vaqtda eng yaxshi holatda bo'lgan 11 futbolchini to'g'ri tanlay bilish va ularni ruhan ushbu uchrashuvga tayyorlay bilishdir.
Ruhiy tayyorgarlik eng muhim jihatligini zinhor va zinhor yoddan chiqarmaslik kerak. Matbuotda futbolchilarimiz berayotgan intervyularning ko'pligi biroz xavotirga solayotgani ham, bor gap. Eng yaxshisi o'yinni yaxshi o'tkazib olib, ana keyin intervyular berishsa, nur ustiga nur bo'ladi.
Begali Azimov, Andijon
Eng avvalo, har qanday vaziyat yoki har qanday holatda ham, har bir muxlis o'z  milliy terma jamoasidan doimo g'alaba va chiroyli o'yin, nufuzli halqaro musobaqalar finalida ishtirok etishini kutadi.
Xalqimizdagi ibratli iboralar juda ko'p. Shunlardan biri  “Har kim o'z qarichi bilan o'lchaydi” degani. Bu hikmatning bizni futbolimizga aloqasi shuki, bizning qarichimiz hozircha birgina, u ham bo'lsa - termamizning “mundial”da ishtirok etishidir.
Shu kungacha terma jamoamiz saralash bahslarida ishtirok etib, JCh ostonasigacha etib bora olgan. Ammo, futbol muxlislarimizning fikricha biz allaqachon JChda ishtirok etishimiz kerak edi.
Hozirgi kunda,  muxlislar terma jamoamizga kim murabbiy bo'lishidan qattiy nazar, mutaxassisdan suyuklilarimizni JChga olib chiqishni kutadi. Qay tartibda, qanday o'yin ko'rsatishi, tarkib va boshqa sabablar, menimcha ikkinchi o'rinda. Samvel Babayan kelgach, terma jamoada darz ketgan ichki muhitni yaxshilashga, barchani - muxlislar, jurnalistlar, futbol klublarimip, qo'yingki, futbolga aloqador barcha insonlarni  terma jamoa atrofida jisplashtirish payida bo'ldi. Albatta, bu narsa juda muhim, ammo bundan keyingi yurish Babayan uchun qiyin kechishi aniq.
Terma jamoamiz birinchi o'yinda ochko yo'qotib, muxlislar nazdida birinchi bosqichdayoq butunlay JCh-2018 dan umidini uzib bo'lgandi. Ammo yangi murabbiy boshchiligida jamoamiz ishonchli g'alabalar bilan muxlislarni terma jamoaga bo'lgan ijobiy munosabatni yana jonlantira oldi.
Aniqki, termamiz juda qiyin o'yinlar davriga kirib kelyapti. Babayan bu yog'iga terma jamoaga yanada jiddiy munosabatda bo'lishi lozim. Eng avvalo, munosib nomzodlarni termaga chaqirish kerak. Qandaydir shaxsiy munosabatlariga ko'ra terma jamoaga futbolchi jalb qilsa, buni natijasi oxirida alamli bo'lishi mumkin. Bir paytlar Abramovning jamoasida nominal himoyachilar qolmagandi. Yurtimizdagi yuzlab futbolchilar orasidan termaga mos himoyachilarni jalb qila olmaganligi bu Abramovni katta aybi bo'lgan. Aynan shuning natijasida Eron bilan o'yinning so'ngida alamli mag'lubiyat qabul qilib olganmiz.
Qaysidir futbolchini o'zi o'rgangan ampuladan terma jamoada boshqa ampulada sinash bu xato deb hisoblayman. Sababi, klubda bunday “rokirovka”lar o'zini oqlashi mumkin. Ammo, qisqa davr ichida yig'ilgan futbolchilarda bunday holat o'zini oqlamasligi ehtimoli, katta. Nima bo'lgan taqdirda ham yurtimizda iqtidorli futbolchilar son mingta. Munosiblarni termada o'ynatish murabbiyni ishi. Murabbiyimizga omad tilayman!
Bahromjon Isoqov (“Bahromjon-88”) , Farg'ona
Bo'lajak raqib KXDR - o'zi qanday jamoa?.. Sodda va qo'polroq aytganda Koreya termasi - "ko'rpasiga qarab oyoq uzatadigan", ya'ni raqib kuchiga tashxis qo'yib, shunga qarab harakat qiladigan jamoa. Ularni futboli - xuddi dim ob-havoga o'xshaydi. Ular juda yopiq o'ynashadi. Go'yoki, ularda tushunib bo'lmaydigan taktika bordek. Lekin, natija shunga yarasha... Tarixni kavlash shart emas. Ularning natijalari kelsak misollar talaygina... Ayniqsa, hozircha bizga armon bo'layotgan mundial borasida!
Ho'sh, bo'lajak o'yindan nima kutishimiz mumkin? Uch ochko yo'lida Babayan nima ishlar qildi? FIFA kunlaridan unumli foydalanmagan murabbiy oldida juda muhim o'yin turibdi. Balki u taktik, texnik jixatdan bolalarni tayyorlay olar? Ruhiy jihat hamda jamoaviy o'yin borasida muammo bo'lishi mumkin. Rashidovning ishtahasiga qarab,  o'yin olib borish ham yaxshi emas...
Boburjon Ikromov, Andijon
Termamizning mehmondagi g'alabali uchrashuvlari yana KXDRning o'z maydonida Filippin bilan durang o'yngani biz uchun ajoyib imkoniyatlar eshigini ochib berdi. Menimcha, yigitlar ham buni yaxshi tushunib turibdilar. Endi, KXDRni mag'lub etib bosimni engish kerak.
Men termamizdan o'tgan uchrashuvdagi (KXDR-O'zbekiston 4:2) xulosa qilib, o'zimizga kerakli ochkolarni qo'lga kiritishimizni kutyapman. Legionerlarimizning barchasi MTJga yaxshi holatda kelayotganligi kishini quvontiradi.
Agar, “Paxtakor” stadioni  muxlislar bilan to'lib-toshsa, ularning daldasi yigitlarni yanada ruhlantirgan bo'lardi. Fikrimcha,  ortiqcha qiyinchiliksiz KXDRni mag'lub etib, o'zimizga mos o'ringa qaytamiz.
Hayotillo Temirov (“UEFACOM”), Namangan
Bosh murabbiy xolisona tarkib tushirishini istaymiz. Maydonga o'yin amaliyotiga ega futbolchilar tushgani ma'qul. KXDRni ojiz qoldirishni yo'li - ulardan maydon markazini tortib olish kerak. Mayda paslar o'ynaydigan raqiblarimizga jarima maydonimizga yorib kirishga yo'l bermasak barchasi ijobiy yakun topadi, deb o'ylayman.
Muallifdan:
Menimcha, KXDR bilan o'yinni ilk daqiqalaridan maydonga Aleksandr Geynrix  va tushirilsa, maqsadga muvofiq bo'lar edi. Sashani avvalgi saralash bahslarida Koreya darvozasiga urgan goli hali ham ko'z oldimizda turibdi.   Elmurod ERMATOV
— deya xabar beradi uff.uz nashri.