Turkiyaning Antalya shahrida dzyudo bo'yicha Gran-pri turkumidagi xalqaro turnirda ishtirok etgan O'zbekiston terma jamoasi a'zosi Mirzohid Farmonov barcha raqiblarini mag'lubiyatga uchratdi va oltin medalga sazovor bo'ldi.
SPORTS.uz axborot portali ayni paytda Turkiyada bo'lib turgan Mirzohid Farmonovning fikrlari bilan qiziqdi.
- Mirzohid, g'alaba muborak bo'lsin!
- Rahmat, juda xursandman.
- Musobaqa haqidagi ilk fikrlaringiz qanday?
- Gran-pri musobaqasida barcha terma jamoalar kuchli dzyudochilarni olib keladi. Shuning uchun oson bellashuvning o'zi yo'q. Men musobaqaga yaxshi tayyorgarlik ko'rgandim. Shunga deyarli qiyinchilikka duch kelmadim. Bellashuvlarga ikkinchi davradan qo'shildim va ketma-ket ippon qayd etdim.
- Yarim finaldagi bahsdagi raqibingiz haqida nima deya olasiz?
- Kosovolik Akil Gjakova yarim final yo'llanmasi uchun bellashuvda jamoadosh do'stim G'iyosjon Boboevni mag'lub etdi. Aslida men finalga chiqish uchun G'iyosjon bilan kuch sinashmoqchi edim. Final yo'llanmasi uchun bo'lgan kurashda raqibni uchta vazari bahosi evaziga ortda qoldirdim. Yarim final doimo hayajonli bo'ladi. Men bu bosqichda yutqazib qo'ymaslik uchun bor kuchimni ayamayman.
- Finalda qo'rquv bo'lmadimi?
- Final oldidan biroz hayojon bo'ldi. Uchrashuv davomida biroz bosim ham bor edi. Chunki zaodagi muxlislarning barchasi mezbon dzyudochini qo'llab-quvvatlab turgandi. Bunda eng yaxshi usul atrofdagi voqealarga e'tibor bermaslik. Men ham shunday qildim. Natijada kuchli raqibni qo'shimcha vaqtda qo'lga kiritilgan ochko evaziga mag'lub etdim.
- Dzyudochiga omad kerakmi?
- Albatta. Bundan oldingi Tbilisidagi Gran-pri turniriga ham puxta tayyorgarlik ko'rgandim. Kuchim etardi. Lekin omadim kelmadi. Bu gal bor imkoniyatimni ishga soldim va omadam men tomonda bo'ldi.
- Mirzohid, suhbat uchun rahmat.
— deya xabar beradi uff.uz nashri.