Futbol kutilmagan sovg'alarga boy. Har yili qaysidir chempionatda qandaydir «sensatsiya»lar kuzatiladi. O'zbekiston milliy chempionati ham bundan mustasno emas, albatta. Ammo 5-tur o'yinlari bu qadar ko'p «sovg'a» ulashishini hech kim kutmagan bo'lsa kerak. Barcha etakchilar mag'lubiyatni tan olgan va buning natijasida turnir jadvali 1-2-qatorlariga vodiyning ikki klubi - «Qo'qon-1912» hamda «Navbahor» ko'tarilgan turga qanday ta'rif berish mumkin? Odatda tur «sensatsiya»si sifatida 1ta, nari borsa, 2ta o'yin­ni ko'rsatardik. O'tgan hafta esa «sensatsiya» maqomiga tort­maydigan o'yinlardan tortadiganlari ko'proq bo'ldi... Yana Otaqo'ziev va Rayevats (Qo'qon-1912-Dinamo. To'liq sharh) 5-turdan so'ng turnir jadvalida qo'shhokimlik yuzaga keldi. Chempionlik uchun asosiy da'vogarlar qatorida tilga olingan «Lokomotiv», «Bunyodkor» va «Nasaf» jamoalarining birin-ketin mag'lubiyatga uchrashlari vodiyning ikki jamoasi - «Qo'qon-1912» va «Navbahor»ga qo'l keldi. Hozirda ular hisobida 10tadan ochko bor. E'tiborli tomoni, No''mon Hasanov qo'l ostidagi qo'qonliklar bu turda chempionatning start qismida katta shov-shuv ko'targan «Dinamo»ni ortga ochkosiz qaytarishdi. Alohida aytish kerak, o'yin ancha qiziqarli va jonli tus oldi. O'zi ushbu bahsga qiziqish juda kuchli edi. «Dinamo» ortidan Samarqanddan ko'plab muxlislarning Qo'qonga tashrif buyurishgani esa qiziqish darajasini yanada oshirib yubordi. O'yinni hujumkor ruhda boshlagan mezbonlar 15-daqiqadayoq faxriy Nosir Otaqo'ziev goli evaziga hisobni ochishdi va bo'lim oxiriga qadar 1:0 natijasi boshqa o'zgarmadi. Tanaffusdan keyingi ilk daqiqalar ham «Qo'qon-1912» uchun omadli keldi. Aniqrog'i, 49-daqiqada Filipp Rayevats o'z nomini tabloga yozdirib qo'ydi. E'tiborli fakt, avvalgi turda aynan Otaqo'ziev va Rayevats tomonidan urilgan 2ta gol vodiy klubiga g'alaba taqdim etgandi. Ya'ni Hasanov shogirdlari mehmonda «Neft­chi»ni 2:1 ko'rinishida engishgandi. Qarangki, bu safar ham yakunda 2:1 hisobi qayd etildi. Chunonchi, «Dinamo» vakillari keyingi daqiqalarda hujumkorlikni oshirishdi. Bu harakatlar 78-daqiqada samara berib, Sardor Sulaymonov hisobdagi farq­ni qisqartirdi. Biroq mehmonlar bundan ortig'iga ulgurishmadi. «Dinamo»ga o'yin oxirida Sulaymonovning qo'polligi uchun maydondan chetlatilgani ham malum darajada pand berdi. Xullas, oxirgi 3ta o'yinda 9 ochko olgan  «Qo'qon-1912» to'plar nisbatiga ko'ra, turnir peshqadamiga aylandi. O, qo'qonlik muxlislar uchun naqadar farahbaxsh onlar... «QO'QON-1912» - «DINAMO» - 2:1 (1:0) 7 aprel. Qo'qon. 8578 tomoshabin. Hakamlar: V.Kovalenko (Toshkent)-8,5; A.Rasulov (Toshkent)-9,0; J.Saidov (Toshkent)-9,0; A.Shukurullaev (Toshkent)-9,0. Gollar: N.Otaqo'ziev (15), F.Rayevats (49) - S.Sulaymonov (78). «Qo'qon-1912»:  21. M.Abdullaev, 4. B.Akramov, 5. J.Kimsanov, 9. N.Otaqo'ziev (97. O.Rustamov, 46), 10. J.Siddiqov, 19. S.Berdiev, 23. A.Merzlyakov, 24. I.Rahimov (11. A.Sidorov, 57), 26. A.Xolmurodov, 77. M.Xolmuhammedov, 99. F.Rayevats (8. S.Hamidov, 90Q1). «Dinamo»: 1. M.Naumov, 2. M.Lokaev, 3. B.Isroilov, 6. A.Bozorov, 8. J.Azimov, 9. S.Sulaymonov, 10. J.Qahramonov, 14. R.Rogak, 18. D.Nizanov (20. A.Safarov, 53), 22. A.Isroilov, 23. K.Sharofutdinov (11. A.Abdullaev, 52). Ogohlantirishlar: A.Xolmurodov (77) - D.Nizanov (4). Chetlatish: S.Sulaymonov (88, D.). Eng yaxshi o'yinchilar: F.Rayevats - A.Bozorov. Nazoratchi: R.Serazetdinov (Toshkent). Komissar: A.Frolov. Oleg Tyulkin («Dinamo» bosh murabbiyi): - Avvalo, «Qo'qon-1912»ni g'alaba bilan tabriklayman. Bugungi bahsda jangovar ruh sezilib turdi. Shogirdlarimni ruhlantirish yo'li bitta - yoshlarga xos ishtiyoqni kuchaytirish. Futbolda har doim ham pul muhim rol o'ynamaydi. Buni «Dinamo» misolida ko'rishimiz mumkin. Shogirdlarim yosh bo'lishlariga qaramay, ishtiyoq evaziga yaxshi natijalar qayd etishyapti. Xatolarga kelsak, ularsiz millionlar o'yinining qizig'i yo'q... No''mon Hasanov («Qo'qon-1912» bosh murabbiyi): - O'yinni ko'rdinglar, ancha jangovar ruhda o'tdi. Samarqand­liklar ham shiddat bilan to'p surishdi. Biz birinchi bo'limda talab darajasida o'ynay olmadik. Lekin gol urdik. Ikkinchisida esa vaziyatni o'zgartirib, g'alaba qozondik. «Dinamo» menda yaxshi taasssurot qoldirdi. Tarkibimizda saviya bo'yicha teng 3 nafar darvozabon bor va ularning har biriga imkoniyat berishimiz kerak. Qo'yib yuborilgan golda kiperimizni ayblolmayman. Aksincha, u bir necha bor jamoamizni muqarrar goldan qutqarib qoldi. O'yindan oldin shogirdlarim raqibni biroz mensimasliklari mumkinligini o'ylab, xavotirga tushgandim. Chunki o'rtoqlik uchrashuvida «Dinamo»ni 6:1 hisobida mag'lubiyatga uchratgan edik. Quvontiradigan tomoni, futbolchilar bugun maydonda bor kuchlarini ishga solishdi. ------------------------------------------------------------------ Majburiy o'zgarish va gol (Navbahor-Mash'al. To'liq sharh) Oliy liganing 5-turi shov-shuvli natijalar bilan boshlandi va bu vodiy klublari uchun ayni muddao bo'ldi. «Qo'qon-1912» o'z maydonidagi g'alabadan so'ng peshqadamga aylanib oldi, «Navbahor» esa «Mash'al»ni engib, qo'qonliklar «sherigi»ga aylandi. Xullas, turnir jadvalida vodiycha qo'shhokimlik yuzaga keldi. Bevosita Namangandagi o'yinga to'xtalsak, deyarli 16 mingdan ko'p muxlis ko'z o'ngida murosasiz kurash bordi. Chunonchi, g'alaba qozongan tomon oliy liga peshqadamligini qo'lga olishi mumkin edi. Avvalgi turda «Paxtakor»ni yirik hisobda enggan muborakliklar tabiiyki, vodiyga ko'tarinki kayfiyatda kelishdi. O'z navbatida, Samarqanddan 3 ochko bilan qaytgan «Navbahor» ham o'z maydonida faqat yutuqni ko'zlagandi. Birinchi bo'limda ikki jamoa ham ehtiyotkorona to'p surib, asosiy e'tiborni darvoza daxlsizligini saqlab qolishga qaratdi. To'g'ri, «lochinlar» birinchi raqam ostida o'ynab, ko'proq oldinga o'tishga intilishdi, «gazchilar» esa o'z omadlarini qarshi hujumlardan izlashdi. Biroq futbolchilar kamsonli xavfli vaziyatlardan unumli foydalana olishmadi - tanaffusga qadar hisob ochilmadi. Keyingi 45 daqiqalikda «Navbahor» tashabbusni qo'lga oldi va bu holat ko'p o'tmay, hisobda o'z aksini topdi. Bunda Ilhom Mo'minjonovning majburiy holda o'yinchi almashtirish bobidagi qarori ish berdi: jarohat bilan maydonga tushgan Mirzohid G'ofurovning o'rnini egallagan Hasanboy Ergashev oradan 5 daqiqa o'tar-o'tmasdan jamoasiga g'alaba keltirgan gol muallifiga aylandi. Shundan so'ng mehmonlar hisobni tenglashtirish maqsadida oldinga tashlanishdi, ammo hujumda ishlari yurishmadi. Boz ustiga, «Mash'al»ning etakchisi va sardori Zafar To'raevning maydondan  chetlatilishi ham o'z ta'sirini o'tkazdi. «NAVBAHOR» - «MASh'AL» - 1:0 (0:0) 7 aprel. Namangan. 16280 tomoshabin. Hakamlar: T.To'xtasinov (Andijon)-7,9; A.Marajabov (Andijon)-7,6; Z.Abdurahmonov (Andijon)-8,0; D.Klepikov (Toshkent)-9,0. Gol: H.Ergashev (69). «Navbahor»: 30. A.Omonov, 2. A.Samatov, 4. A.Otaxonov, 5. G'.Komilov, 9. D.Jabborov, 10. M.Saidov (22. R.Ahmedov, 55), 19. M.G'ofurov (3. H.Ergashev, 64), 21. A.Aliev, 32. J.Mehmonov, 33. T.Shamsiddinov (77. A.Turg'unboev, 55), 84. N.Yovanovich. «Mash'al»: 35. J.Ilyosov, 2. I.Shoyqulov, 3. S.Rahmonov, 8. M.Kamolov (63. U.Sharipov, 72), 10. H.Murtazoev, 13. Sh.Shaymanov, 18. A.Shodmonov, 22. B.Qosimov (31. I.Timanyuk, 85) 44. A.Begimqulov, 77. A.Olimov (19. Z.Qo'ziboev, 78), 90. Z.To'raev. Ogohlantirishlar: G'.Komilov (43) - Z.To'raev (70), J.Ilyosov (70), S.Rahmonov (76), A.Begimqulov (88). Chetlatish: Z.To'raev (73, M.) Eng yaxshi o'yinchilar: N.Yovanovich - A.Begimqulov. Nazoratchi: A.Arutyunov (Toshkent). Komissar: Sh.Rajabov. Aleksandr Xomyakov («Mash'al» bosh murabbiyi): - Ancha jonli o'yin guvohiga aylandik. Maydonda keskin kurash bordi. Bizni Namanganda nimalar kutayotganini yaxshi bilardik. Shundan kelib chiqib, ruhiy tayyorgarlikka katta e'tibor qaratdik. Zero, namanganlik muxlislarning «Navbahor»ni tinmay  hujumga undashlari kutilgandi. Umuman olganda, o'yinimiz chiqmadi, deyolmayman. Meni faqat natija qoniqtirmadi, xolos. Birinchi bo'limda munosib himoyalanish uddasidan chiqdik. Tanaffusdan keyin ham ayrim vaziyatlarni inobatga olmaganda, chakki himoyalanmadik. Lekin qarshi hujum masalasidagi harakatlarimiz ko'ngildagidek chiqmadi. Bundan tashqari, burchak zarbasi amalga oshirilgan holatda hushyorlikni biroz yo'qotdik. Xullas, natijani inobatga olmaganda, jamoamiz yomon taassurot qoldirmadi. Xususan, futbolchilarimizda ishonch hissi yuqoriligi sezildi. Chempionatning 5ta turi ortda qolgan bir paytda yaqqol etakchi ko'zga tashlanmayapti. Barcha ishtirokchilar deyarli teng kuchga ega. Tenglik yuzaga kelishiga birinchi navbatda, o'zbekistonlik bir guruh futbolchilarning xorijga yo'l olishganini sabab sifatida tilga olish mumkin. Bunday sharoitda chempionat saviyasi tushib ketishini o'ylab, umumiy holatga tanqidiy munosabat bildirgandim. Lekin amalda bunday bo'lmayapti. Xorijga ketgan futbolchilar o'rnini legionerlar to'ldirishdi. Chempionatning bu tarzda borishi muxlislarda katta qiziqish uyg'otishi turgan gap. Mavsumning qolgan qismida ham shu holat kuzatiladimi yoki yo'q - buni vaqt ko'rsatadi. Ilhom Mo'minjonov («Navbahor» bosh murabbiyi): - Futbolchilarimiz bilan faxrlanaman. Ularga o'yin va g'alaba uchun rahmat. Yigitlar bor kuchlari va mahoratlarini ishga solishdi. Sababi, «Mash'al»ni o'rganib chiqish jarayonida uning jiddiy raqib ekanligi oydinlashgandi. Oxirgi mashg'ulotlarda ayrim futbolchilarimiz jarohat tufayli qatnasholmadilar. Bugun ertalabki badantarbiya mashqlari chog'i jarohatlangan yigitlar maydonga tushishga tayyorliklarini ma'lum qilishdi va buning uchun ham rahmat. Umuman, turdan- turga futbolchilarimiz o'yinni kuchaytirmoqdalar. Bu holat har qanday murabbiyni quvontiradi. E'tibor bergandirsiz, oxirgi 2ta o'yinda tarkibda bir qator o'zgarishlarni amalga oshirdik. Masalan, «Dinamo»ga qarshi bahsda maydonga tushgan ikki futbolchimiz o'rnini boshqa o'yinchilar to'ldirishdi. Ayni payt ixtiyorimizda asosiy tarkib uchun 11 emas, 23 nafar futbolchi bor. Rahbarlar deyarli teng kuchga ega ikki tarkib shakllantirishimiz uchun barcha sharoitlarni yaratib berishdi. Ko'plab jamoalarimizda bir xil kuchga ega 2ta tarkib tuzish qiyin masala. YoPPASIGA ENGILISh Bu hali hammasi emas, davomi bu erda InterFutbol.uz ning Telegram dagi sahifasiga ulaning – eng so'nggi yangiliklar, qiziqarli bloglar va tahliliy materiallar endi bir to'plamda.
— deya xabar beradi uff.uz nashri.