Shu kunlarda Rotterdamning “Feyenoord” klubi vakillari yurtimizda bo'lib turishibdi.
Bugun “Bunyodkor” stadioniga “Feyenoord” futbol klubi menejeri Gido Daniel Vader hamda halqaro aloqalarni rivojlantirish mutaxassisi Boel Melvin Julian tashrif buyurdi. Gollandiyalik mehmonlar dastavval “Bunyodkor” futbol maktabida yaratilgan sharoitlar bilan tanishishdi. Ularga Sergey Lushchan xamrohlik qildi.
Shundan so'ng “Feyenoord” vakillari “Bunyodkor” stadionini ko'zdan kechirishdi. “Alvon lolalar” yurtidan tashrif buyurgan mehmonlar ulkan sport inshooti bilan tanishar ekanlar, ochig'i bu kabi yirik sport majmuasi Evropaning ko'zga ko'ringan joylarida ham yo'q ekanligini ta'kidlab o'tishdi. Shuningdek, “Bunyodkor” suvini ichishib, uning shirin va musaffo ekanligiga yuqori baho berishdi.
- Qishki yig'inlarimiz doirasida “Bunyodkor” jamoasi bilan Dubay shahrida nazorat uchrashuvi o'tkazgan edik. O'sha uchrashuv 1:1 hisobida yakun topgani esimda. Bu erda yaratilgan sharoitlar bilan tanishar ekanmiz, kelajakda yana o'rtoqlik uchrashuvi o'tkazish bo'yicha hamma imkoniyatlar borligiga amin bo'ldim. “Bunyodkor” stadioni dizayni va undagi imkoniyatlarni ko'rib hayratlandim, - deydi “Feyenoord” klubi menejeri Gido Daniel Vader.
Gollandiyalik mehmonlar “Bunyodkor” stadioni dasthatlar kitobiga o'zlarining dil izhorlarini yozib qoldirishdi.
— deya xabar beradi uff.uz nashri.