Interfutbol.uz sayti ijodkorlari hakamlar faoliyatiga bog'liq turli voqealarni yoritib borishni juda xush ko'rishadi. Mana, JCh-2018 saralash o'yinlarida kuzatilgan va referilarga bevosita daxldor bo'lgan kutilmagan voqeliklar ularni yaqin o'tmishga qarab, bu mavzuda yana bir maqola chop etishga undadi. Rossiya mundialidan mosuvo Jozef Lampti (Gana). Afrikalik past bo'yli referi 2016 yilning 12 noyabr kuni JCh-2018 saralashi doirasida JAR va Senegal terma jamoalari o'rtasida kechgan bahsni boshqarib bordi. O'shanda Jozef senegalliklar darvozasi tomon penalti belgiladi. Aslida esa to'p mehmon jamoa himoyachisi Kalidu Kulibalining qo'li emas, balki tizzasiga tekkandi. «Napoli» vakili jon holatda qoidaga xilof ish tutmaganini qanchalik ta'kidlamasin, referi o'z qarorini o'zgartirmadi - penalti!  Yakunda JAR termasining 2:1 hisobida g'alaba qozonganini e'tiborga olsak, Lampti yo'l qo'ygan xato natijaga bevosita ta'sir o'tkazgan. FIFAda esa hozir mehribon Yozef Blatter emas, Janni Infantino rahbarlik qilayotgani barchaga ma'lum. Xullas, futbolning oliy organi mutasaddilari mazkur voqeaga jiddiy yondashishdi va maxsus tekshiruv-tahlil ishlaridan so'ng ganalik referini umrbod hakamlikdan chetlatishdi. Ammo bir narsa qiziq, Jozef Lampti darhaqiqat, JAR termasiga yordam bergan bo'lsa, buning ortida qanday manfaat turgan? Agar gap bukmekerlik masalasiga taqalsa, hammasi tushunarli. Lekin hakamni janubiy afrikaliklar yo'ldan urgan bo'lsalar-chi?! Unda Senegal termasiga nega 3 ochko qaytarib berilmadi? Ha, haqiqiy «topishmoq»... Hukm: umrbod diskvalifikatsiya Mastlik «G'olib» chiqqanida... Sergey Shmolik (Belarus). Tabiiyki, bu hakam ko'pchilik uchun notanish. Ammo Sergey Shmolikning qanday «hunar» ko'rsatganini bilib olish qiyinchilik tug'dirmaydi. Deylik, buning uchun internet tarmog'iga murojaat qilib, bundan 9 yil avval «Vitebsk» va «Naftan» klublari o'rtasida o'tkazilgan bahs videoyozuvini qidirsangiz, bas. Gap shundaki, Sergey o'yindan oldin ozgina «xursandchilik» qilib olgan va bu butun 90 daqiqa davomida yaqqol sezilib qolgandi. Referining o'zini g'alati tutayotgani ishqibozlarda katta qiziqish uyg'otgani ham rost. Shu sababmi, o'yin lavhalari darhol internetga joylashtirilgan. Xullas, uchrashuvni mast holda boshqargan Shmolik bir zumda «qahramon»ga aylandi. Ammo shunisi borki, bu «qahramon»lik oqibatida uning hakamlik faoliyati darhol to'xtatildi. To'g'ri, Sergey anchagacha o'zini oqlashga urindi. Deylik, ingliz yoki nemis hakamlari ham «qittak-qittak» qilib turishlarini ta'kidladi. Ammo... Boz ustiga, eskpertiza ham Shmolikning o'sha kuni qattiq mast bo'lganini tasdiqladi. Oqibat nima? Xayr, hushtak, xayr futbol... Hukm: umrbod diskvalifikatsiya O'rtaga qimor aralashsa... Andranik Arsenyan (Armaniston). Mazkur voqea 2013 yili ro'y berdi. Evropa Ligasi doirasida «Inter» (Finlyandiya) va  «Vikingur» (Farer orollari) klublari o'rtasidagi o'yinni boshqargan Armaniston vakili atayin bir tomonga yon bosdi. Qisqasi, u «Vikingur»ning g'alaba qozonishi uchun qo'lidan kelganicha harakat qildi va yakunda maqsadiga erishdi ham - Finlyandiya klubi mag'lub. Ke-yinroq o'tkazilgan tergov-muhokamalar davomida Arsenyan o'yinning 3-daqiqasida yo'l qo'ygan qo'pol xatosini tan oldi va mahalliy federatsiya tomonidan umrbod futboldan chetlatildi. Lekin UEFA mutasaddilari bu bilan tinchimadilar. Zero, ular bukmekerlik idoralarida o'yin natijasi uchun tikilgan summalar miqdoriga qarab, hammasi qimorga bog'liq ekanlinini pay-qab qolishgandi. Axir bunday «oddiy» o'yinga 300 ming evro tikilgani chindan ham, shubha uyg'otadi. Yakunda Arsen-yan va uning yordamchilarining sud qora kursisida javob berishlariga to'g'ri keldi. To'g'ri, baxtlariga sud muhokamasi Finlyandiyada emas, bosh-qa joyda bo'ldi. Aks holda, bechora hakamlar u erdagi «shinam» qamoqxonada ancha  qiynalishlari hech gap emasdi. Hukm: umrbod diskvalifikatsiya Germaniyada xorvat mafiyasi Robert Xoytser (Germaniya). Hakamning pora olishiga bog'liq eng shov-shuvli mojarodan biri Robert bilan yuz berdi. Chunonchi, uning 2005 yili ikkinchi bundesliga o'yinida «buyurtma» natijani ta'minlash evaziga xorvatiyalik firibgarlardan 67 ming evro miqdorida pora olgani oshkor bo'ldi. Xoytserning xizmat vakolatini suiste'mol qilgani aniqlangach, Germaniya futbol ittifoqi uni jazolashni paysalga solmadi - umrbod diskvalifikatsiya. Lekin bechora referi shu bilan qutulgani yo'q. Zero, oradan ko'p o'tmay, hakamlik ishi yuzasidan sud jarayoni boshlandi va yakunda Robert 25 oy muddatga panjara ortiga jo'natildi. To'g'ri, u qamoqda o'zini yaxshi tutgani, ya'ni ijobiy xulq-atfori uchun 14 oydan so'ng ozodlikka chiqdi. Lekin qamoq - qamoqda, baribir... Darvoqe, olg'ir xorvatlar Xoytser vositasida chamasi 2 million evro foyda ko'rishgan ekan. Harqalay, G'arb OAVda shu mazmunda xabarlar berilgandi. Hukm:umrbod diskvalifikatsiya Baqir-chaqir va adashtirish Bu hali hammasi emas, davomi bu erda InterFutbol.uz ning Telegram dagi sahifasiga ulaning – eng so'nggi yangiliklar, qiziqarli bloglar va tahliliy materiallar endi bir to'plamda.
— deya xabar beradi uff.uz nashri.