Bilasiz, ketma-ket 2 yil birdaniga 4ta jamoamiz Osiyo Chempionlar Ligasi guruh bosqichida qatnashdi. Joriy mavsum esa turnirdagi vakillarimiz soni naq 50 foizga kamaydi - 4ta jamoa o'rniga 2ta... Bir qarashda, biz uchun Osiyo klub futbolining asosiy musobaqasi ahamiyati pasayib ketgandek. Mana, kecha OChL-2017  guruh bosqichi ikkinchi davrasi ham boshlandi. Endi savol: qit'a klublari uchun asosiy turnir sanalgan OChL chindan ham, birinchi raqamga yarasha nufuz va obro'ga egami? Musobaqa faqat arab olami va Xitoydagi biznes hamkorlari istagini bajarish bilan cheklanib qolmayaptimi? Turnir geografiyasi qanday bo'lishi kerak? Osiyo futbol konfederatsiyasiga a'zo 46ta assotsiatsiyaning hammasida ham futbol talab darajasida rivojlanmayotgani birovga sir emas. Yanada soddaroq ifodalasak, barcha mamlakatlarda futbol birinchi raqamli sport turi sanalmaydi. Kriketni har narsadan afzal ko'ruvchi Bangladesh, Hindiston yoki Pokistonni bir chetga qo'yib turaylik, qit'a futbolida katta o'rin tutuvchi Yaponiyada ham so'nggi paytlarda figurali uchish ommaviylik bobida millionlar o'yinini ortda qoldira boshladi. Vaholanki, mamlakat terma jamoasi bir oyog'i bilan JCh-2018da bo'lib turibdi. Shunga qaramay, JCh-2002 mezbonlik vazifasini zo'r dabdaba bilan bajargan «kunchiqar yurt»da stadionlar to'lmayapti. To'g'ri, u erdagi o'rtacha ko'rsatkich nisbatan yaxshi - har bir o'yinni 18 ming muxlis bevosita stadionda kuzatyapti. Ammo aholi soni (130 million atrofida)ni e'tiborga olsak, bu natija past hisoblanadi. OChLning joriy mavsumi startidan avval jami 39ta uyushma («G'arb»da - 12ta va «Sharq»da - 27ta) vakili guruh bosqichi yo'llanmalari uchun kvalifikatsion raundlarda o'ynashi rejalashtirilgandi. Biroq Iroq, Livan va Suriya klublari OFK talabiga muvofiq o'tkazilgan litsenziyalash jarayonida muammolarga uchradi. Indoneziya va Quvayt futboli esa FIFA tomonidan diskvalifikatsiya qilingani bois, bu mamlakat klublari ham chetga surildi. Natijada turnir georgafiyasi yana ancha qisqardi. Bilasiz, OFK reytingiga ko'ra, BAA, Saudiya Arabistoni, Eron, Janubiy Koreya va Yaponiyaga guruh bosqichining 3tadan yo'llanmasi kurashsiz taqdim etildi. Hozirda Osiyo klub futbolining ikkinchi darajali musobaqasi - OFK kubogi g'olibiga asosiy turnir guruh bosqichi chiptasini to'g'ridan-to'g'ri berish shunchaki, aqlga sig'maydi. Axir Quvayt klublari «gegemon»ligi ma'lum sabab, uzilib qolgach, bu musobaqada hattoki, Hindiston va Malayziya vakillari ham finalga chiqishmoqda. Mana, OChLning amaldagi g'olibi - «Chonbuk Xyunday Motors»ning chetlatilishi tufayli guruh bosqichiga chiqqan Gonkong chempioni joriy mavsum biror karomat ko'rsatolmayapti. OChL guruh bosqichi tizimi islohotga muhtoj emasmi? Ayni payt musobaqa 2ta geografik hudud («G'arb» va «Sharq»)da alohida-alohida o'tkazilmoqda. Hattoki, «pley-off» raund­larida ham shu holatni ko'rish mumkin. Ya'ni «G'arb» va «Sharq» vakillari finalgacha o'zaro to'qnash kelishmaydi. Tabiiyki, bu hol turnir o'yinlariga qiziqishni birmuncha pasaytiradi. Eng achinarlisi, Osiyo futboli ikkiga ajralib qolayotgandek. Natijada hududlar futbolining o'zaro uyg'unlashuviga putur etmoqda, tajriba almashish kuzatilmayapti. Ha, 2ta lager tashkil qilinganini tushunish ham mumkin qaysidir ma'noda. Zero, jamoalarning moliyaviy imkoniyatlari va jismoniy yuklamalar vajidan kelib chiqib, shunday qaror qabul qilingan. Lekin bir narsani unutmaylik, hozir 2017 yil davom etyapti. Boshqacha aytganda, yangi asrning dastlabki 20 yili ham o'tib ketdi, hisob. Osiyo futboli esa hamon moliyaviy masalalarga o'ralashib yuribdi. Vaholanki, klublar tomonidan dunyo miqyosida katta-katta transferlar amalga oshiril­yapti, yulduz futbolchilarga misli ko'rilmagan darajada ko'p maosh beril-yapti. Xullas, kelgusi 2-3 yil ichida guruh bosqichi tizimiga bog'liq umumiy holatni yaxshilab o'rganib chiqish zarur. Mohiyatan olganda, OChL butun Osiyoning yagona turniri ekan, guruhlarni shakllantirishda klublarni ikki hududga ajratmaslik kerak. Oddiy aytganda, Osiyo futboli globallashuvga ehtiyoj sezmoqda. Reyting ochkolari qanday hisoblanishi kerak? OFK yangi mavsumdan e'tiboran koeffitsientlar jadvalini hisoblashda saralash bosqichi natijalarini ham inobatga olishni lozim topdi. Shu o'zgarish evaziga OChL saralashida ishtirok etgan «Nasaf» va «Bunyodkor» klublari O'zbekiston hisobiga 1,05 ball keltirdi. Umuman, kvalifikatsion raundlar yakuni bo'yicha eng ko'p ochko aynan bizning nomimizga yozildi. Guruh bosqichida jamg'ariladigan ochkolar esa faqat shu raundda ishtirok etadigan klublar soniga bo'linadi va o'rtacha ball chiqariladi. Shu joyda yana bir taklifni o'rtaga tashlash mumkin: OFK bu borada UEFA tomonidan amalga kiritilgan yangi o'zgarishni sinab ko'rsa bo'ladi. Misol uchun, turnirda oldin g'olib chiqqan jamoalar koeffitsientiga qo'shimcha ball hisoblanishi kerak. Misol uchun, uning bitta g'alabasiga 1 ball, durangi uchun esa 0,5 ball yozilsa, bu o'ziga xos rag'bat bo'ladi. Legionerlarga munosabat. Bilasiz, ayni payt OChLda xorijlik futbolchilarga nisbatan «3}1» limiti joriy etilgan. Buni ortiqcha izohlab o'tirishning hojati yo'q. OFK musobaqa nufuzini yuksaltirishni istar ekan, aynan shu cheklovni bekor qilish bo'yicha ish olib borishi va bunga birlamchi vazifa sifatida qarashi shart. Chunonchi, muxlislar kuchli futbolchilar harakatlarini  tomosha qilishni istaydilar. Legionerlar masalasidagi cheklov qit'amizda futbolning gurkirab rivojlanishiga xalaqit berayotganini ko'pchilik fahmlab turgan bo'lsada, bu borada dadil gapiradigan kishi topilmayapti. Tushunarliki, limitdan ko'zlangan asosiy maqsad - mahalliy futbolchilarga ko'proq imkoniyat taqdim etish va shu orqali milliy terma jamoalarni yangi darajaga olib chiqish. Balki bu to'g'ri yondashuvdir, ammo masalaning yana bir tomonini hisobga olish joiz. Xo'sh, mahalliy yigitlar kimlardan o'rganishadi? O'zlariga o'xshagan va saviya bo'yicha farqlanmaydigan futbolchilardanmi? Axir futbolchining barqaror ravishda o'sishi uchun kuchli raqobat kerak emasmi? U engilroq sharoitda ma'lum saviya bilan cheklanib qolmaydimi? Misol uchun, Avstraliyaning etakchi klublaridan biri «Brisben Roar»ni olaylik. Uning safida Gretsiya, Angliya, Ispaniya, Daniya va germaniyalik futbolchilar bor. Shunga qaramay, jamoa ixtiyoridagi mahalliy yigitlardan 3 nafari Avstraliya milliy jamoasida o'ynamoqda. Endi o'zingiz ayting, legionerlarning ko'pligi ularga xalaqit beryaptimi yoki naf? Umuman, ayni holat o'zgarmasa, OChL shiddati oshmaydi, oshgan taqdirda ham, rivojlanish sur'ati haminqadarligicha qoladi. Shu joyda bitta taqqos: «Brisben» bilan bitta guruhda o'ynayotgan va 2-o'rinda borayotgan «Muangtong Yunayted» safida Tailand terma jamoasining naq 9 nafar futbolchisi bor. Endi Avstraliya va Tailand termalari natijalariga boqing... Xarajatlar va mukofot puli jamg'armasi.  Bu hali hammasi emas, davomi bu erda InterFutbol.uz ning Telegram dagi sahifasiga ulaning – eng so'nggi yangiliklar, qiziqarli bloglar va tahliliy materiallar endi bir to'plamda.
— deya xabar beradi uff.uz nashri.