O'zbekiston – KXDR terma jamoalari o'rtasida kechadigan o'yin oldidan tashkil etilgan matbuot anjumanining ikkinchi qismida mezbon jamoa bosh murabbiyi Samvel Babayan ishtirok etdi. Murabbiy avvalo ertaga bo'ladigan o'yin haqidagi fikrlarini bildirib o'tdi.
- Ertaga juda og'ir va mas'uliyatli o'yin bo'ladi. Raqib KXDR ekanini nazarda tutsak, bu jamoa hurmatga loyiq. Biz o'yinga astoydil tayyorgarlik ko'rganmiz, raqibning kuchli va kuchsiz tomonlarini o'rganib chiqqanmiz. Ertaga yaxshi o'yin namoyish etishga harakat qilamiz.
- Ertaga bo'ladigan o'yinda omad tilaymiz. Ammo o'zbek futboli muxlislari orasida Lobanov va Andreev borasida kuchli e'tirozlar bildirilmoqda. Bu futbolchilar nima sababdan termaga chaqirilganini tushuntira olasizmi?
- Bu mavzuning siyqasi chiqib ketdi. Muxlislar shuning uchun ham muxliski, ular termani muhokama qiladilar. Terma jamoani tashkil etishda uchta jihatga e'tibor qaratamiz: ayni vaqtdagi formasi, terma manfaatiga bo'lgan ishtiyoq va insoniylik hislati. Mana shu uchta jihat terma jamoaga chaqirilishiga sabab bo'ladi.
- Ertaga bo'ladigan o'yinda necha nafar hujumchi maydonga tushadi?
- Ertaga bo'ladigan o'yinda necha nafar nominal hujumchi maydonga tushishi ahamiyatsiz. Biz imkon qadar jamoa uslubini amalga oshirishga harakat qilamiz.
- Yomg'irli havo uchun alohida uslub ishlab chiqqanmisiz?
- Biz har qanday holatda ham o'z uslubimizga mos qolishga harakat qilamiz.
- KXDRning kuchli tomoni, qanotlardan tezkor o'ynaydi va jarima maydonchasiga to'pni aniq etkazib beradi. Bunday o'yinga qarshi turishga tayyormisiz?
- Biz raqibni to'liq o'rganganmiz va bu fikringiz asosga ega. KXDRning kuchli tomonlaridan yana biri, ularning futbolchilari katta ishtiyoq va vatanparvarlik bilan o'ynaydilar. Har bir futbolchi ikki yuz foiz kuch bilan o'ynaydi. Bizning esa o'z yashirin qurolimiz bor va uni ertaga qo'llashga urinib ko'ramiz.
- Denisov va Ahmedov Rossiya chempionati va Evromusobaqalarda katta kuch yo'qotishgan. Ular ertaga o'z saviyasida o'ynay oladimi?
- Professional futbolchi shuning uchun ham professionalki, u har qanday sharoitda o'ynay olishi lozim. Ular ertaga maydonga tushib, bor kuchini ko'rsatadi, deb o'ylayman.
Anjumandan so'ng Samvel Baban qisqacha tilak bildirdi: Ertaga juda muhim o'yin bo'ladi, bu o'yinda stadionga kelib, jamoani qo'llashingizni so'rayman.
— deya xabar beradi uff.uz nashri.