Madridning "Real" klubi hujumchisi Krishtianu Ronaldu Chempionlar ligasi chorak finalida "Bavariya"ga qarshi kechgan javob o'yini (4:2) haqida fikr bildirarkan, muxlislarga murojaat qildi.
"Agar yaxshi o'ynamasak "Bavariya" gol urishi mumkinligini bilardik. Ular bu ishni uddalashdi va ajoyib jamoa ekanini isbotlashdi. Ammo Madrid baribir Madrid bo'lib qoladi.
Shubhasiz biz yaxshiroq o'ynadik. "Bavariya"ga oltita gol urdik va bu oson ish emas. Biz g'alabaga munosib edik va keyingi bosqichga chiqdik.
Muxlislardan faqat bir narsa so'rayman, menga xushtak chalishmasin. Men har doim qo'limdan kelgan barcha ishni qilganman va bor ishtiyoq bilan to'p surganman", - deydi Ronaldu.
Eslatib o'tamiz, Krishtianu Ronaldu "Bavariya"ga qarshi kechgan ikki o'yinda umumiy hisobda 5 ta gol urdi. Madridda kechgan javob bahsida esa har ikki oyog'i va boshi bilan gol urib, "ideal xet-trik" qayd etdi.
— deya xabar beradi uff.uz nashri.