Madridning "Real" klubi sardori Serxio Ramos EChL chorak finalida "Bavariya"ga qarshi kechgan javob o'yini (4:2) haqida fikr bildirarkan, Pikega javob qaytardi. Eslatib o'tamiz, "Barselona" himoyachisi o'yindan so'ng tvitterdagi sahifasida ko'p nuqta qoldirgan va bu bilan hakam xato qilganiga ishora bildirgani aytilmoqda.

"Final haqida gapirishga hali erta, biz endi yarim finalga chiqdik. Ammo EChLda g'olib chiqishni istashimiz turgan gap. Asosiy raqobatchilarimizdan bo'lgan "Bavariya"dan ustun kelganimizdan mamnunmiz.

EChLda 100 ta o'yin o'tkazish - chiroyli raqam. Umid qilamanki hali uzoq yillar "Real"da o'ynayman.

Pikening munosabati? U yaxshisi "PSJ" bilan bo'lgan o'yinni qaytadan tomosha qilsin. Balki o'shanda hakamlar haqidagi fikrini o'zgartirar. Keling, yaxshisi "Barselona"ning "Yuventus"ga qarshi javob o'yinini kutaylik, nimalar bo'lar ekan.

U yog'ini so'rasangiz, men videotexnologiya hakamlikka joriy etilishiga qarshi emasman", - deydi Ramos.
— deya xabar beradi uff.uz nashri.