Oliy liganing navbatdagi tur uchrashuviga tayyorgarlikni davom ettirayotgan "Lokomotiv" bu safar "Paxtakor"ga qarshi maydonga tushadi. "Temiryo'lchilar" 21 aprel kuni mehmonda "Paxtakor" bilan kuch sinashishadi. "Paxtakor" markaziy stadionida kechadigan bahs 18:00da boshlanadi. Bu o'yin "Lokomotiv" uchun juda muhim ahamiyat kasb etadi. Negaki Toshkent derbisi maqomiga ega o'yinda "temiryo'lchilar" faqat g'alabani ko'zlab maydonga chiqishadi. "Lokomotiv" o'tgan yil va undan avvalgi yili safarda "Paxtakor"ga bir xil 1:2 hisobi bilan mag'lub bo'lgan. 2014 yilgi mavsumda durang qayd etilgan bo'lsa, 2013 yil "Loko" safarda 2:1 hisobida zafar quchgan. Va bu g'alaba "Loko" uchun hozircha yagona bo'lib turibdi. Agar "Lokomotiv" juma kuni bo'ladigan o'yinda uch ochkoni qo'lga kiritsa, o'z tarixida ikkinchi bor mehmonda "Paxtakor"ni mag'lub etgan bo'ladi. Bungacha jamoamiz faqat bir marta - 2013 yil safarda "Paxtakor" ustidan g'alaba qozongan xolos. Ayni paytda oliy liga turnir jadvalida "Loko" beshta o'yindan so'ng 12 ochko bilan peshqadamlik qilmoqda. "Paxtakor" esa 7 ochko jamg'argan va 11-o'rinni egallab turibdi.
— deya xabar beradi uff.uz nashri.