Ertaga O'zbekiston chempionati 7-turining markaziy bahsida "Paxtakor" va "Lokomotiv" o'zaro kuch sinashishi lozim. Uchrashuv Toshkent vaqti bilan soat 18.00da boshlanishi rejalashtirilgan. "Sport" telekanali esa o'yinni yozib olingan holda kechroq efirga uzatishi haqida ma'lumotlar paydo bo'ldi.
Xo'sh, bunga nima sabab bo'ldi? Xabaringiz bor, ayni vaqtda yurtimizda badiiy gimnastika bo'yicha xalqaro musobaqa bo'lib o'tmoqda. Ushbu musobaqa yaxshi saviyada o'tishida teletranslyatsiyaning o'rni ham katta. Har qanday xalqaro musobaqa mezbon mamlakat yuzi hisoblanadi. Yaxshi mezbonlik butun mamlakat obro'siga xizmat qilgani kabi, arzimagan nuqson salbiy taassurotlar keltirib chiqarishi ham mumkin. Shu bois "Sport" telekanali xalqaro musobaqani jonli efirda va yuqori saviyada yoritib berish majburiyatini o'z zimmasiga olgan.
Biroq shu bilan birga "Sport" telekanali xodimlari futbol muxlislarining talabini ham inobatga olgan va "Paxtakor" - "Lokomotiv" o'yinini imkon qadar ertaroq namoyish etish bo'yicha ish olib borilmoqda. Sportning badiiy gimnastika turida o'tkazilish muddatini oldindan aniq aytish qiyin. Shu bois teledasturda maksimal vaqt ajratilgan. Biroq xalqaro musobaqa belgilangan vaqtdan erta yakuniga etgan taqdirda "Sport" telekanali to'g'ridan-to'g'ri "Paxtakor" - "Lokomotiv" o'yiniga ulanishi ham mumkin.
"Sport" telekanali xodimlari yuzaga kelgan vaziyat mas'uliyatini to'liq his qilmoqda va xalqaro musobaqa bilan birga Oliy liga bahsini ham efirga sifatli uzatish uchun imkon qadar ish olib boryapti.
— deya xabar beradi uff.uz nashri.