Bugun Toshkentdagi "Paxtakor" markaziy stadionida Oliy Liga 7-turining markaziy bahsi bo'lib o'tdi. Unda Toshkentning ikki klubi "Paxtakor" xamda "Lokomotiv" jamoalari maydonda kurash olib borishdi. Teng kurashlar ostida kechgan o'yin "temiryo'lchilar"ning 1:2 g'alabasi bilan yakunlandi.
Ushbu uchrashuvdan so'ng o'tkazilgan matbuot anjumanining ikkinchi qismida "Paxtakor" bosh murabbiyi Ravshan Haydarov ishtirok etdi va jurnalistlar savollariga javob berdi:
- Qiziqarli va shiddatkor o'yin bo'ldi. Barcha jabhalarda o'yin davomida "Lokomotiv" bilan teng kurash olib bordik. "Loko"ning zaxiradan tushgan futbolchilar o'yinni kuchaytira olishdi. Afsuski, uchrashuv so'nggida imkoniyatni boy berdik. Futbolchilarning qiziqqonligi bizga qimmatga tushdi.
Futbolchilarning intizomi borasida nima deya olasiz?
- Men hozir shu borasida ishlamoqdaman. Tashqaridan qaraganda bu masalalar hal etilayotgandek. Mashg'ulotlarda hammasi yaxshidek. Ammo o'yinda ko'rib turganingizdek ro'y bermoqda. Ko'rib turganingizdek, yoshlar bilan o'yin o'tkazmoqdamiz. Men ham xohlardim raqobat bo'la oladigan futbolchilarni ko'p bo'lishini. Ammo jamoada raqobat yo'q. Lekin yomon o'yin namoyish etmadik. Kuchimizni to'g'ri baholagandik. Penaltini urolmadik. Vaziyatlarni ijobiy yakunlay olmayapmiz. Yoshlarga imkoniyat berganimizda ular ham jarohat olyapti. To'g'ri, barchasiga murabbiy javob beradi. Ammo hozirgi holatimiz shu.
Ravshan aka sizni doim og'ir ahvolda taklif qilishadi. Bunga qanday qaraysiz?
- Bu menga ham og'ir. Ammo "Paxtakor"ning taklifini yo'q deya olmayman. Chunki bu erda men va jamoani ko'p narsa bog'liq. Albatta, birinchi davrada jamoada o'zgarishlar bo'ladi. O'shanda kim bu erda ishlashini bilmayman. Ijaradagi futbolchilarimizni ham qaytararmiz. Ammo buni vaqt ko'rsatadi. 
— deya xabar beradi uff.uz nashri.