Kutilganidek, amaldagi jahon chempioni - Germaniya termasi Evro-2016 saralash bosqichini 1-o'rinda  yakunladi. Biroq nemislar guruh bosqichida Braziliya mundialidagi kabi shiddatkor, yorqin o'yinlarni namoyish etolmadilar. Shu bois, muxlisu-mutaxassislarning boshlari qotgan: «Yoaxim Lyov jangchilaridagi jasorat, mohirlik, hamjihatlik, eng muhimi, yuksak samaradorlik qaerga g'oyib bo'ldi?» Qizig'i, bundestim shunday sust ishtirokni Evro-84 (u ham Frantsiyada bo'lib o'tgan) arafasida ham qayd etib, 2 marta mag'lubiyatga uchragandi. Xo'sh, «nemis mashinasi»ning qaysi murvati ta'mirga muhtoj? «SE» nashri shu masalada 6ta jiddiy kamchilikni aniqladi.
Birinchi muammo: jangovorlik talab darajasida emas
Germaniya termasiga odatiy jangovar ruh etishmayapti. Zero, Frantsiya-2016 yo'llanmasi uchun kurash chempionlikni nishonlash tantanalari nihoyasiga etmay turib, boshlanib ketdi - turli tadbir va marosimlarda ishtirok etgan jamoa saralashning qat'iy tartibiga etarli tayyorgarlik ko'rolmadi. Shu bois, startda Polsha (0:2) va Irlandiya (1:1) termalariga qarshi kechgan bahslarda qimmatli ochkolar boy berildi. To'g'ri, keyinchalik chempion o'zini qo'lga olib, peshqadam bo'lib oldi. Ammo sustkashlik (ehtimol, bu o'z kuchiga ortiqcha baho berish natijasidir) deyarli barcha o'yinlarda sezilib turdi. Oqibatda Irlandiya termasi nemislarni muhim 3 ochkoni tortib olish bilan jazoladi, gruzinlarga qarshi bellashuvda va'da qilingan yirik g'alaba qayd etilmadi. Amalda minimal ustunlik ham katta qiyinchilik bilan qo'lga kiritildi.
Ikkinchi muammo: kadrlar etishmasligi
Bunga ishonish qiyin, lekin mundialdan so'ng bundestim tarkib borasida jiddiy muammolarga duch keldi. Lam, Kloze va Mertezaker terma jamoadagi faoliyatlarini yakunlashdi, Shvaynshtayger, Xedira, Xyovedes, Gyottse, Roys jarohat tufayli safdan chiqishdi. Uzoq vaqt etakchi rollarni bajarishgan bu futbolchilar o'rnini to'ldirish oson emasligi o'z-o'zidan tushunarli. Misol tariqasida birgina Shvaynshtaygerni olaylik. Ha, u hozirda yuksak sport formasida emas. Ammo so'nggi 2ta turda Shvaynining nazoratisiz qolishgan yoshlar birdaniga yaqqol susayishdi. Xullas, ayni payt nemislarning «amaki»siz qiynalishlari ko'rinib qoldi.
Uchinchi muammo: «killer» - hujumchining yo'qligi
Chindan ham, hozir jamoada raqib himoyachilarini qaltiratadigan «jallod» hujumchi yo'q. Deylik, Klozega o'xshagan. Nemislar hozirda polshaliklarga havas (balki qisman hasad ham yo'q emasdir) bilan qarashayotgani aniq. Chunki ular uchun suyukli hisoblangan Levandovski bundestim tarkibida emas. Shu bois, jamoa muntazam ravishda soxta «9-raqam»dan foydalanishga majbur. Boshqacha aytganda, bundestim ko'p sonli qisqa va ko'ndalang to'p uzatishlar yordamida raqiblar darvozasiga yaqinlashmoqda. Hatto uzatmalarning nafis va aniq ekanligi ham bu kamchilikni yuvolmaydi - vaqt boy berilmoqda. Boz ustiga, xavfli vaziyatlardan unumli foydalanish foizi juda past, uddaburon hujumchi yo'q...
Shaxsan Yoaxim Lyovning o'zi jamoani nokautchilik qobiliyati yo'qolgan bokschiga qiyoslagandi. Shu tariqa Germaniyada «Nokautchi qidirilmoqda!» shiori paydo bo'ldi. Muxlislar «Beshiktosh»dagi Gomes, «Ayntraxt» safida o'tgan mavsumni bundesliganing eng yaxshi to'purari sifatida yakunlagan Ma­yerni tilga ola boshladilar. Murabbiyning bu yigitlarga nisbatan adovati yo'q. Biroq ular Lyovning taktik sxemasiga mos tushmaydilar. Xullas, Klozening vorisini qidirish davom etmoqda.
Davomi InterFUTBOL gazetasi blogida.
— deya xabar beradi uff.uz nashri.