1news.uz — Joriy yilning 30 aprel – 7 may kunlari poytaxtimizda boks bo'yicha Osiyo chempionati bo'lib o'tadi. Qit'a boks olamining yulduzlari ishtirok etadigan mazkur musobaqada 1977 yildan 1998 yilgacha tug'ilgan charm qo'lqop ustalari o'nta vazn toifasida (49 kilogrammdan 91 va undan yuqori) ringda kuch sinashadi. Bundan oldingi Osiyo chempionati (2015 yil, Tailand) da Qozog'iston terma jamoasi 5 oltin, 1 kumush va 1 bronza medal bilan umumjamoa hisobida birinchi o'rinni egallagan edi. Hamyurtlarimiz esa 2 oltin, 5 kumush va 1 bronzani qo'lga kiritib, ikkinchi bo'ldi. Mezbon mamlakat bokschilari 2 oltin medal jamg'argan holda kuchli uchlikka yakun yasagan. Xitoy, Koreya Respublikasi sportchilari ham turnirda yaxshi qatnashgan. Umuman olganda, so'nggi yillarda Osiyoda boks tobora rivojlanib borayotganiga guvoh bo'lyapmiz. O'z nufuzi va obro'siga ega O'zbekiston va Qozog'iston terma jamoalaridan tashqari, Hindiston, Xitoy, Janubiy Koreya, Mo'g'uliston, Tailand, Yaponiya, Filippin, Qirg'iziston, Eron, Tojikiston, Xitoy Taypeyi va yana ko'plab mamlakat sportchilari bugungi kunda sovrinli o'rinlarga da'vogarlik qila oladi. Shu bois Toshkentdagi Osiyo chempionati har jihatdan keskin va murosasiz ruhda o'tadi, deyishga asoslar etarli. Janglar hayajonli lahzalarga boy bo'lishi turgan gap. Ta'kidlash joizki, Osiyo chempionatida Rio olimpiadasining g'olib va sovrindori bo'lgan charm qo'lqop ustalarimiz — Hasanboy Do'smatov, Shahobiddin Zoirov, Murodjon Ahmadaliev, shuningdek, yana bir nechta iste'dodli va nomdor bokschilarimizning ham ishtirok etishi kutilmoqda. Turnirning eng ahamiyatli tomoni, u shu yili Germaniyaning Gamburg shahrida 25 avgust — 4 sentyabr kunlari o'tkaziladigan jahon chempionatiga saralash turniri vazifasini ham o'taydi. Jahon chempionatida Osiyo uchun 60 ta o'rin ajratilgan. Har bir vazn toifasida 6 nafardan eng yaxshi bokschi unda ishtirok etish huquqini qo'lga kiritadi. Uchta oltin naqdmi? Ta'kidlash kerakki, o'tkazilgan so'nggi uchta Osiyo chempionatida (2011, 2013, 2015) qozog'istonlik bokschilarning umumjamoa hisobida qo'li baland kelmoqda. Bu safar-chi? Qozog'iston terma jamoasi bosh murabbiyi Mirzagali Aytjanov chempionat oldidan o'zining mahalliy saytlariga quyidagicha intervyu berdi: «Bizda Osiyo chempionatida o'zini ko'rsatishi kerak bo'lgan uch-to'rtta bokschi bor. Ularning yaxshi natija qayd etishiga umid qilyapmiz. Umuman, har bir vaznda — kuchli bokschi. Ishtirokimiz qanday bo'lishini ko'ramiz, ammo kamida uchta «oltin» olishimiz kerak. O'n nafar bokschimizning to'rttasida, aniqrog'i, 69 kilogramm va undan yuqorilarda o'ziga bo'lgan ishonch yuqori. Albatta, asosiy raqiblarimiz — O'zbekiston bokschilari. Lekin bizning murabbiylar shtabi har qanday raqibni uning o'z uyida bo'lsa ham mag'lub etish uchun etarli malakaga ega». «Maqsadimiz — Jahon chempionatiga to'liq tarkibda borish» Ha, qozog'istonliklarning Osiyo chempionatidagi maqsadlari ulkan. Xo'sh, bunga bizning murabbiylar shtabi nima deydi? Bokschilarimizning turnirga tayyorgarligi qanday kechmoqda? Xabarning tafsilotlari bilan 1news.uz saytida ushbu havola orqali tanishishingiz mumkin.
— deya xabar beradi uff.uz nashri.