ChL chorak finalining dastlabki bellashuvlari olam-olam taassurotlar uyg'otgani ayni haqiqat. Vajohatli «Barselona»ning yana bir bora mutlaq «tiz cho'kishi», ayovsiz «Bavariya»ning bosh egishi, «sensatsiya»chi «Monako»ning dadilligi... Xullas, kutilmagan natijalar kutilganidan ko'p. «SE» nashri ayni shu o'yinlar yuzasidan suhbatlashish maqsadida «Barselona»ning sobiq yarim himoyachisi Aleksandr Glebni bezovta qildi. Marhamat, quyida Belarus futbolining eng sara vakillaridan biriga tegishli fikr-mulohazalar bilan tanishib chiqishingiz mumkin. - «Barsa»ning Turindagi omadsizligiga asosiy sabab Busketsning maydonga tushmaganligimi? - Menimcha, buning mag'lubiyatga aloqasi yo'q. Harqalay, Buskets maydonga tushganida ham, jamoaga yordam berolmasdi... - Nima uchun? - Aslida «Barselona» safar uchrashuvlarini ko'pincha ancha sust o'tkazadi. Hattoki, o'rtamiyona jamoalarga qarshi o'yinlarda ham rosa qiynalganini ko'p ko'rganmiz. Shu tufayli «PSJ»dan tarsaki qabul qilib olgandi, endi «Yuventus» ham jamoani «nasiba»siz qoldirmadi. - Kataloniya klubining inqirozga yuz tutganini ta'kidlashga asos bormi? - Ha, «Barsa» darhaqiqat, avvalgidek emas. Rahbariyat yangi mavsum oldidan ayniqsa, himoya chizig'ini kuchaytirishi shart. Aks holda, hech narsaga erisholmaydi. Yana shuni e'tiborga olish kerakki, raqiblar «tiki-taka» uslubiga moslashib ulgurishdi. Qarang, kataloniyaliklar uchun hujum uyushtirish tobora qiyin kechmoqda. Zero, ularga qarshi o'yinda ochiq futbol namoyish etadigan raqib qolmadi, hisob. Xullas, ko'plab jamoalar «Barsa»ga qarshi zich, uyushqoq o'yin ko'rsatishni o'zlashtirib oldi. - Sizningcha, Dortmundda yuz bergan portlash «Monako»ga qarshi uchrashuvning birinchi bo'limida «Borussiya» futbolchilariga ruhiy ta'sir ko'rsatmadimikan? - Bu kabi yoqimsiz xatti-harakatlar ta'siri bilinmasligi qiyin, menimcha. Nafaqat «Borussiya», balki «Monako» vakillariga ham ruhan og'ir edi. Aslida menga dortmundliklar ijrosidagi o'yin yoqdi, lekin omad ulardan yuz o'girdi. Boz ustiga, mezbonlar ko'plab vaziyatlarda gol urolmaslik barobarida  himoyaviy harakatlarda ham xatolarga yo'l qo'yishdi va shunga yarasha jazolanishdi. - Mbappe jahon darajasidagi yangi yorqin yulduzmi? - To'g'rirog'i, porlay boshlagan yulduz, u noyob iqtidor. Mavsum tugagach, qaysidir grand tarkibidan joy olsa, ajabmas. Hozircha kelajagini bashorat qilish noo'rin. Yosh bo'lishiga qaramay, «Monako»da etarli o'yin amaliyotiga ega, murabbiy unga to'liq ishonmoqda. Yangi jamoada esa qanday munosabatga duch kelishi noma'lum. Kuchli raqobatga dosh berolmasa, zaxirada qolib ketishi hech gap emas. - Xavi Martines maydondan chetlatilgunga qadar «Bavariya» ham, «Real» ham kosmik darajada futbol namoyish etdi. Bu fikrga qo'shilasizmi? - Yuksak saviyali futbol, bu xususda ortiqcha gapga hojat yo'q. Agar Martines maydonni barvaqt tark etmaganida, «Bavariya» g'alaba qozonardi. Myunxenliklarga asossiz qoidabuzarliklar pand berdi. Axir «Real»dek grandga qarshi ozchilik bo'lib to'p surish oson-mi? Madridliklar bu kabi ustunlikdan samarali foydalanishni juda yaxshi bilishadi. - Hakam Martinesga ikkinchi sariq kartochkani ko'rsatgan vaziyatda biroz oshirib yubormadimi? - Aslida futbolchini og'zaki ogohlantirish bilan cheklanishi mumkin edi. Lekin u «Real» darvozasiga penalti belgilashda ham katta xatoga yo'l qo'ydi - takroriy lavhada to'p qo'l bilan o'ynalmagani yaqqol ko'rindi. Vidal «nuqta»dan zarba berishda adashmaganida, «Bavariya» ehtimol, yakuniy natijani 3:0ga etkazardi... Albatta, endi yaqqol favorit tayin - «Real». - Uchrashuvda «dubl»ga erishgan Krishtianu Ronaldu dunyoning eng yaxshi futbolchisi ekanligini isbotlay oldimi yoki hamon sobiq jamoadoshingiz - Messini kuchliroq, deb bilasiz...? Bu haqda bilmoqchi bo'lsangiz maqola davomiga o'ting. Davomi InterFutbol.uz ning Telegram dagi sahifasiga ulaning – eng so'nggi yangiliklar, qiziqarli bloglar va tahliliy materiallar endi bir to'plamda.
— deya xabar beradi uff.uz nashri.