O'tgan hafta matbuotda Madridning “Real” klubi hujumchisi Karim Benzema haqida turli shou-shuvli xabarlar tarqaldi. Ularda yozilishicha, frantsuz futbolchisi hamyurti Mate Valbuenaga nisbatan tovlamachilik qilgani, giyohvand moddalar savdosida ishtirok etgani va haydovchilik guvohnomasiz avtomobomil boshqarganlikda ayblanmoqda. Xo'sh, Benzemaning keyingi taqdiri qanday kechadi, nahot u futbol yashil maydonidagi shon-shuhrat cho'qqisidan qamoqxonaning temir panjarasiga yo'l olsa? Sports.ru sayti muxbiri Vladislav Voronin vaziyatga oydinlik kiritishga urinib ko'rdi.
Aslida nima bo'lgan edi?
Karim Benzema 4 noyabr, chorshanba kuni ertalab Mate Valbuenaga nisbatan tovlamachilik ishida gumondor deb topilib hibsga olinadi. Undan tashqari yana uch nafar erkak ham politsiya tomonidan ushlanadi. Qo'lga olinganlar orasida Aksel ismli 39 yoshli Frantsiya fuqarosi jinoiy ish tashkilotchisi sifatida tahmin qilinmoqda.  
Surishtiruv ishlariga ko'ra Aksel va uning ikki sherigi ayni vaqtda Frantsiyaning «Lion» klubida to'p surayotgan Valbuenadan, uning shaxsiy hayotiga doir videoyozuvni ommaga e'tiboriga havola qilish tahdidi bilan, pul talab qilgan.
Benzemaga na buyurtmachi va na tashkilotchi aybi qo'yilmayapti, tahminlarga ko'ra tovlamachilar Karim bilan uning umumiy do'stlari orqali bog'lanib, Valbuenadan pul undirishda ko'mak so'ragan. Bundan tashqari “Real” forvardi aslida nima bilan shug'ullanganligi to'g'risida ikki faraz mavjud. Birinchisi – Karim Frantsiya terma jamoasining oktyabr oyidagi uchrashuvlari vaqtida nima qilib bo'lsa-da yarim himoyachiga bosim o'tkazishga uringan. Ikkinchi tahmin – u tovlamachilarga hayrixohlik qilmagan, ammo Valbuenaga hammasi tezroq yakunlanishi uchun pul to'lashni do'stona maslahat bergan.
Frantsiyaning M6 telekanali xabariga ko'ra, tergov ishlari birinchi tahminga tayanib olib borilmoqda. Politsiyaning aniqlashicha, pul to'lovi bo'yicha telefon suhbatlari vaqtida Karim Benzema ham ishtirok etgan. suhabtlardan birida Karim go'yoki shunday degan: “Havotir olmanglar. Uning pul to'lashdan boshqa chorasi yo'q”.
BFM telekanalining xabariga ko'ra esa tergov ikki futbolchi o'rtasida obro'sizlantiruvchi videoyozuv yuzasidan suhbat bo'lib o'tganini aniqlagan. Biroq, bu holatda Benzema tovlamachilarning vositachisi sifatida qatnashganmi yoki Valbuena bilan birga mazkur vaziyatni qoralaganmi — hozircha noma'lum.
O'sha videoyozuvda nima aks etgan?
Aniq ma'lumot sir saqlanmoqda. Faqat shunisi ma'lumki, Aksel qandaydir usul orqali Valbuenaning eski telefoniga yo'l topgan va u erda futbolchi va yosh qizning ishqiy munosabatlari tasvirini qo'lga kiritgan. Ayrim OAVlar ma'lumotlariga ko'ra, obro'sizlantiruvchi videoyozuv dastlab Benzemaning mobil telefonida bo'lgan, bu telefon esa frantsiyalik futbolchilarga xizmat ko'rsatuvchi uncha katta bo'lmagan firmalardan birining vakili qo'liga tushib qolgan. Katta ehtimol bilan, aynan shu odam Valbuenaga nisbatan tovlamachilik harakatini boshlagan.
Benzema aybiga iqror bo'ldimi?
AFP agentligining ma'lum qilishicha, Benzema sudda ushbu voqealarga aloqador ekanini tan oldi. Biroq uch nafar gumonlanuvchi o'zini futbolchining bolalikdagi do'stlari sifatida tanishtirgani uchungina ularni Valbuena bilan bog'lanishlariga yordam bergani, hatto ushbu begona shaxslar jamoadoshiga qandayir muammo keltirib chiqarishi mumkinligini xayoliga ham keltirmagani qayd etdi.
Silven Korme, Benzemaning advokati: “Karim o'zini aybdor deb bilmaydi va hech nimani bo'yniga olmadi. Meni tergov jarayoning yo'nalishi ajablantirmoqda: politsiya mening mijozimning “shantaj”da ongli ravishda qatnashgan degan yolg'on axborotni tarqatmoqda. Ajablanarlisi, politsiya Valbuenani so'roq qilishga hatto vaqt ajratgani ham yo'q. Biz hammamiz g'azabdamiz, atrofimizni yolg'on, uydirma gap-so'zlar o'rab olgan”.
Sud qanday hukm chiqardi?
Hozircha Benzemaga nisbatan faqatgina tovlamachilikda va jiinoiy guruhda ishtirok etganlik aybi e'lon qilingan. Shuningdek, unga Valbuena bilan uchrashish ham ma'n etilgan.
Biroq Benzema advokatining oqilona harakati tufayli muayayn hududni tark etish to'g'risidagi tilxatdan qutulib qolindi. Forvard payshanba kuni oqshomidayoq Frantsiyani tark etib, “Real” bazasida mustaqil tarzda mashg'ulot o'tadi va klub prezidenti Florentino Peres bilan uchrashdi.
Benzemaga nima xavf solmoqda?
Agar Karim tovlamachilikda aybdor deb topilsa, unga nisbatan 5 yilgacha ozodlikdan mahrum etish va 75 ming evro miqdorida jarima jazosi tayinlanadi. Bundan tashqari agar yaqin vaqt ichida ayblovlar olib tashlanmasa, Benzema asosiy homiylik kelishuvlaridan quruq qolishi mumkin.
Bu hali hammasi emas (mi?!)
Hamyurti Mate Valbuenani "shantaj" qilish borasida muammolar girdobiga tushib qolgan Karim Benzema yana bir muammoga aralashib qolganga o'xshaydi.
Frantsiyaning Le Point nashrining xabar berishicha, Benzema noqonuniy norkotik aylanmalari bilan shug'ullanuvchi Frantsiyadagi Air Cocaine nomi bilan mashxur og'ufurushlar guruhiga aloqador bo'lishi mumkin. Futbolchi kokain sotuviga mas'ul bo'lgan  Ali Bushareba bilan aloqasi borlikda gumon qilinmoqda.
2014 yil, 16 oktyabrda ushbu ish bo'yicha 8 nafar shaxs 400 kg kokain bilan hibsga olindi. Gumondorlardan biri Ali Bushareba uyidan Karimning surati va imzosi tushirilgan butsa topilgan.
“Mening bundan xabarim yo'q va hech qachon Benzemaning atrofidagilar kishilardan biri narkotik moddalar savdosi tufayli qamoqda o'tirib chiqqani haqida eshitmaganman. Bilasizlar, Karimning Facebookdagi sahifasida 20 milliondan ortiq o'quvchisi bor. Qaysidir ashaddiy fanat u bilan suratga tushishi mumkin. Ammo bu Karimning aybdorligiga dalil bo'la olmaydi”, - deydi Benzemaning agenti.
Valbuena qanday munosabat bildirdi?
Mate payshanba kuni “Lion” bazasiga keldi, ammo asosiy tarkibda maydonga tushgani yo'q. Qolaversa, u mahhaliy telekanal bilan belgilangan intervyuni bekor qilib, jurnalistlar ko'zini shamg'alat qilib klub bazasini tark etgan.
Manba: arena.uz
— deya xabar beradi uff.uz nashri.