Bugungi maqolamiz orqali Angliya terma jamoasi va «Liverpul» klubining mahoratli futbolchisi Adam Lallanaga tegishli bo'lgan qiziqarli faktlar bilan tanishib chiqamiz. - Adam 1988 yili Londonning shimolidan 30 km uzoqlikda joylashgan Sent Albans nomli kichik shaharda tavallud topgan,. Ushbu uncha katta bo'lmagan shahar Xertfordshir grafligida joylashgan. - U 5 yoshga to'lganida esa oilasi bilan Bornmut shahriga ko'chib o'tadi va aynan mana shu shaharda futbolning sir asrorlarini o'zlashtira boshlaydi. - Adam yoshligida otasi bilan birgalikda «Everton» klubiga muxlislik qilgan: «Men esimni taniganimda otam «Everton» jamoasiga muxlislik qilar edi. O'sha vaqtlarda jamoa Garri Lineker boshchiligida yaxshi natijalar qayd etib kelayotgan edi. Aynan mana shu sabab men ham ushbu jamoaning muxlisiga aylanganman!" - deydi Lallana. - Adam Lallana 12 yoshga to'lganida «Sautgempton» jamoasining skautlari nazariga tushadi va jamoaning akademiyasiga taklif qilinadi. Ushbu akademiyada o'sha vaqtda Adam bilan birgalikda Garet Beyl («Real Madrid»), Aleks Oksleyd-Chemberlen («Arsenal») va Teo Uolkott («Arsenal») kabi futbolchilar shug'ullanishar edi. - «Sautgempton» Lallanani o'z safiga qo'shib olish uchun «Bornmut» jamoasiga dastlab, 3 000 funt sterling miqdoridagi summani o'tkazib beradi. Keyinchalik, klub rahbarlari «Bornmut» klubi hisob raqamiga Adam uchun jami 18 000 ming funt sterlingni o'tkazib bergan. - Lallana o'smirlik chog'ida yuragidagi kasallik sababli operatsiya qilingan ekan. - «Sautgempton» klubi akademiyasida oldinga qarab o'sishga erisha boshlagan edi. Adam asosiy jamoa safida 2006 yiling 23 avgust sanasida Angliya Kubogi doirasida «Yovil Taun» (5:2) jamoasiga qarshi debyut o'yinini o'tkazadi. U «Sautgempton» safidagi debyut golini esa ikki yildan so'ng «Vest Bromvich» darvozasiga kiritadi. O'sha damlarda «Sautgempton» Premer-ligaga chiqish uchun kurash olib borayotgan edi. - 2010 yilda Adam «Sautgempton» tarkibida Mett Le Tisse (1994/95 yilgi mavsum)dan so'ng bir mavsumda 20 marotaba gol kiritgan dastlabki futbolchiga aylanadi. - Yarim himoyachi 2011/12 yilgi mavsumda Chempionshipda 11 ta gol kiritadi va «Sautgempton»ning Premer-ligaga chiqishida katta xissa qo'shadi. - Lallana o'zining Premer-ligadagi debyutini 2012 yilning 19 avgust sanasida «Manchester Siti» jamoasiga qarshi o'tkazadi va o'z hisobiga bitta golli pas yozdirib qo'yishga erishadi. - 2014 yilning yozida esa Adam Premer-liganing TOP darajadagi jamoalarining biriga o'tishi xaqida mish mishlar «bolalay» boshlaydi. Keyinchalik, u Brenden Rodjers boshqaruvidagi «Liverpul» jamoasi safiga borib qo'shiladi va «Sautgempton» jamoasidagi kabi 20 raqamni tanlaydi. - Bugungi qahramonimiz 2014/15 yilgi mavsum boshidagi jarohati sababli mavsumoldi o'yinlarni o'tkazib yuboradi. Lallana «qizillar» safida «Enfild Roud»da bo'lib o'tgan Pol Lambert boshchiligidagi «Aston Villa» jamoasiga qarshi bahsda debyut o'yinini o'tkazadi. Afsuski, o'sha bahsda «Liverpul» 0-1 hisobida mag'lub bo'ladi. O'yinda Lallana 61 daqiqa maydonda harakat qiladi va uning o'rniga Rahim Sterling maydonga tushiriladi.  Lallana «Liverpul» safidagi ilk golini esa «Enfild»da bo'lib o'tgan «Vest Bromvich»ga qarshi o'yinda kiritishga muvaffaq bo'ladi. O'sha matchdagi Adamning ajoyib goli evaziga «Liverpul» 2-1 hisobida zafar quchadi.  - Lallana Angliya terma jamoasiga ilk bor 2012 yilning 10 sentyabr kuni Ukraina terma jamoasiga qarshi jahon chempionati saralash o'yini uchun chaqiruv oladi. Ammo o'sha  o'yinda u ishtirok etmaydi. - Adam Angliya terma jamoasidagi ilk o'yinini Chili terma jamoasiga qarshi bahsda nishonlagan. - Adam Lallana 2016 yili Angliya terma jamoasida yilning eng yaxshi futbolchisi deb topiladi. - Devid Moyes «Manchester Yunayted» jamoasining bosh murabbiyi bo'lgan vaqtida Lallanani o'z jamoasida ko'rishni juda xohlagan ekan. Ammo bu transfer amalga oshmay qolgan. - Lallana allaqachon ota bo'lish baxtiga muyassar bo'lgan. Uning 5 yoshli Artur ismli o'g'ilchasi bor. - Adam Lallana futboldan tashqari hozirgi va sobiq jamoadoshlari Daniel Starrij va Rahim Sterling («Manchester Siti») bilan birgalikda model sifatida ham faoliyat yuritib kelmoqda va  Esquire jurnali uchun fotosessiyada qatnashishga ham ulgurgan. - Adamning transfer narxi transfermarkt.com saytida 22 million evro etib belgilab qo'yilgan. Sunnat Raupov tayyorladi
— deya xabar beradi uff.uz nashri.