Uysizlarga boshpana, yangi tug'ilgan chaqaloqlarga shifoxona, nochorlarga ko'mak... Aholining moddiy qiyinchiliklardan aziyat chekayotgan turli qatlamlariga yordam qo'lini cho'zayotgan sportchilar hamisha hurmatga sazovor ko'rilganlar. Bugungi mavzu ixtiyoridagi mablag'larni xayriya yo'lida sarflashga odatlangan futbolchilarga bag'ishlanadi.
Statistik ma'lumotlarga ko'ra, aksariyat ishqibozlarning nazdida futbolchini natijadan boshqa narsa qoniqtirmaydi. «Natija» deganda nafaqat bir o'yinda qo'lga kiritilgan g'alaba, balki ushbu yutuq evaziga topiladigan pul mablag'i ham nazarda tutilmoqda. Qaysidir ma'noda muhimlik jihatidan maosh masalasi hamisha birinchi o'rinda qayd etilsa kerak. Futbol o'ta noyob xislat, insoniylik tamoyillariga xos jihatlardan mosuvo bo'layotgandek, go'yo. Xuddi millionlar o'yini «Natija har narsadan ustun!» shiori evaziga tirikdek. Shunday ekan, ishqibozlarning yuqoridagi kabi fikr yuritishlarini to'g'ri tushunish mumkin.
QUTQARUV XIZMATI
Yaqinda manchesterlik boshpanasiz daydilar shahardagi hashamatli mehmonxonaga noqonuniy tarzda joylashib oldilar. Gap shundaki, o'zini «Manchester farishtalari» deb atovchi tartibbuzarlar 1906 yili qurilgan birja binosining boshqa maqsadlarda foydalanilayotganidan norozi ekanliklarini bildirishgan. Odatda, bunday vaziyatlarda ko'chmas mulk egasi birgina yo'l orqali muammoni bartaraf etishga kirishadi: politsiyaga murojaat qilib, namoyishchilarni quvish. Oxir-oqibat, daydilar etakchisi Uesli Xoll mehmonxonadan qishning sovuq kunlarida foydalanishga ruxsat oldi. Uning maqsadi uysizlarni boshpana bilan ta'minlash edi. Xoll bino xo'jayini bilan telefon orqali suhbatlashgach, ko'z yoshlarini tiya olmadi. E'tiborlisi, Gari Nevill hamda Rayan Giggz ushbu mehmonxonaning egasi hisoblanishadi.
Ha, zamonaviy futbolda hotamtoylik - noyob xislatga aylangan. Ham maydonda, ham uning tashqarisida. Lekin insoniylik tamoyillarini umuman yo'q, deyish o'zimizni aldashdan boshqa narsa emas. Futbolchilarning keraksiz buyumlarga yirik mablag' sarflashayotgani inkor etib bo'lmas haqiqat. Non xarid qilish uchun vertolyotda borish, shartnoma tuzish uchun shaxsiy plyaj talab qilish, brillantlar bilan bezatilgan butsalarda to'p surish - tan olaylik, shunday xabarlar tez-tez uchrab turadi. Aksariyat futbolchilarning o'zgalar muammosiga befarq qarashlari bilan bog'liq faktlar bunday yangiliklar to'lqinida yo'q bo'lib ketgandek tasavvur uyg'onadi. Shunday pallada vaziyatni biroz yumshatishga harakat qilamiz.
Gari Nevill haqidagi suhbatga qayt­sak, «Manchester Yunayted»ning sobiq sardori anchadan buyon xayriya ishlari bilan shug'ullanadi. Xususan, qadrdon shahridagi uysiz nochorlarga yordam qo'lini cho'zadi. Shunday ekan, «Xavfsiz qish» (aktsiya ishtirokchilari shunday nom berishgan) tadbiri Gari uchun ilk tajriba emas.
Jumladan, Rossiyada ham pulni isrof qilishga ustamonlar bisyor. Mahalliy aholi ularni turli yo'llar bilan tanqid qilishdan aslo charchashmaydi. Ayrim futbolchilar uyida divanga yastangancha televizor tomosha qilayotgan bir pallada boshqalar hamyurtlarining ko'nglini ovlashda faollik ko'rsatishadi. Denis Glushakov hamyonidan pul sarflab, o'zi tug'ilib o'sgan shahar - Millerovo (Rostov oblasti)da 2000 tomoshabinga mo'ljallangan mo''jazgina stadion qurdirib, tantanali ochilish marosimida qatnashdi.
Aleksandr Kerjakov sog'lig'ida muammosi bor chaqaloqlarga mo'ljallangan shifoxonaga homiylik qiladi. Hujumchi ajratgan pulga qimmatbaho uskuna sotib olinishi natijasida ko'plab go'daklarning hayoti saqlab qolindi. Shuningdek, Kerjakov boshqa xasta bolalarning murojaatiga ham doimo «labbay», deb javob qaytaradi.
IShQIBOZLAR KO'NGILGA YaQIN
E'tiborga molik yana bir voqea ikki yil avval Rotterdamda sodir bo'ldi. Malla Mark nomi erediviziya muxlislariga yaxshi tanish. Ikki yil avval «Feyenoord»ning 41 yillik muxlisiga o'lim tashxisi qo'yildi: shifokorlarning aytishicha, uning yana bir oylik umri qolgandi. Malla Markning so'nggi istagi - sevimli jamoasining mashg'ulotiga tashrif buyurish bo'lgan. 2013 yilning 26 iyun sanasida uning xohishi qondirildi. «De Kuip» stadionidagi odatiy mashg'ulot jarayonini ko'rish uchun 6000 kishi tashrif buyurdi. Lekin ularning e'tibori futbolchilarga qaratilmagandi. Klub va fanatlarning avvaldan tuzgan rejalariga binoan, mashg'ulotlarning 12-daqiqasida Markni nogironlar aravachasida maydon chetiga olib tushishdi. Arenaga to'plangan 6000 kishi «You will never walk alone» qo'shig'ini gollandcha talqinda baralla kuylashdi. Malla Mark o'zini tutib turolmadi, uning ko'zlaridan shashqator yosh oqdi. Keyin oxirgi kuchini jamlab, o'rnidan turdi va qadrdon stadionidagi maysaga so'nggi bor oyoq qo'ydi. Deyarli butun umrini bir klubga bag'ishlagan fanatni futbolchilar ehtirom bilan qarshilashdi. Oradan uch kun o'tib, Malla Mark vafot etdi.
Davomi InterFUTBOL gazetasi blogida.
— deya xabar beradi uff.uz nashri.