O'zbekiston Milliy olimpiya qo'mitasi huzuridagi O'zbekiston olimpiyachilarni qo'llab-quvvatlash jamoat fondining faoliyati O'zbekiston Respublikasi Prezidentining 2013 yil 25 fevraldagi “O'zbekiston sportchilarining 2016 yilda Rio-de-Janeyro shahrida (Braziliya) bo'lib o'tadigan XXXI yozgi Olimpiya va XV Paralimpiya o'yinlarida ishtirok etishga tayyorgarligi to'g'risida”gi PQ-1923 son va O'zbekiston Respublikasi Vazirlar Mahkamasining 2013 yil 2 apreldagi “O'zbekiston Milliy olimpiya qo'mitasi huzuridagi O'zbekiston olimpiyachilarini qo'llab-quvvatlash jamg'armasi faoliyatini tashkil etish to'g'risida”gi 92-son qarorlari asosida tashkil etilgan.  
O'zbekiston Milliy olimpiya qo'mitasi huzuridagi O'zbekiston olimpiyachilarni qo'llab-quvvatlash jamoat fondi (keyingi o'rinlarda - Fond) o'rnatilgan tartibda nodavlat, notijorat tashkiloti – Jamoat fondi sifatida O'zbekiston Respublikasi adliya vazirligidan va O'zbekiston Respublikasi soliq qo'mitasi ro'yxatidan o'tgan. Nodavlat, notijorat tashkilotini davlat ro'yxatiga olinganligi haqida guvohnoma raqami №755, 2013 yil 17 aprel; Soliq to'lovchining identifikatsiya raqami berilganligi to'g'risidagi guvohnoma raqami № 207181192.
O'zbekiston Respublikasi Vazirlar Mahkamasining 2013 yil 2 apreldagi “O'zbekiston Milliy olimpiya qo'mitasi huzuridagi O'zbekiston olimpiyachilarini qo'llab-quvvatlash jamg'armasi faoliyatini tashkil etish to'g'risida”gi 92-son qaroriga muvofiq Fond faoliyati xayriya xususiyatiga ega. Fond mablag'lari tushish manbalaridan qat'i nazar, Fondga yuklangan maqsadlar va vazifalarga erishish uchun sarflanadi.
Fond O'zbekiston sportchilarini Olimpiya va Paralimpiya o'yinlariga sifatli tayyorlash va ularning muvaffaqiyatli ishtirok etishini ta'minlash maqsadida tashkil etilgan. Fond mablag'larining shakllanish manbalari va ulardan foydalanish maqsad va yo'nalishlari O'zbekiston Respublikasi Vazirlar Mahkamasining 2013 yil 2 apreldagi 92-son qarori bilan tasdiqlangan “O'zbekiston olimpiyachilarini qo'llab-quvvatlash Fondi mablag'larini shakllantirish va ulardan foydalanish tartibi to'g'risida” nizom bilan belgilangan.
Hisobot davri – 2016 yilda Fondning faoliyati belgilangan maqsad va vazifalarga qat'iy rioya qilgan holda amalga oshirildi. 2016 yil Fond daromadlari yuridik shaxslarning beg'araz yordamlari va homiylik mablag'lari hisobiga shakllantirildi. 2016 yilda Fond tomonidan tadbirkorlik faoliyati yuritilmadi va shunga ko'ra tadbirkorlik daromadlari olinmadi. 2016 yilda Fondning jami harajatlar summasi 16,599 mlrd.so'mni tashkil qilib, ular belgilangan maqsad va vazifalarni bajarishga yo'naltirildi.
Fondning 2016 yil harajatlari asosiy moddalari quyidagilardan tashkil topgan:
1. Sport bazalari va markazlarini rekonstruktsiya qilish va jihozlanganligini oshirishni moliyalashtirishga 2016 yilda 1,561 mlrd.so'm yo'naltirildi. Mazkur mablag'lar Toshkent shahrida Universal sport saroyini qurilishiga; suv sport turlari bo'yicha Respublika oliy maxorati maktabining suv sport bazasini rekonstruktsiya qilish va jihozlashga; Respublika o'quv-mashq velotrek markazini rekonstruktsiya qilish va jihozlashga maqsadli sarflandi.
2. O'rnak ko'rsatgan, iqtidorli sportchilar va murabbiylarni moddiy rag'batlantirishga 2016 yilda jami 11,851 mlrd.sum saraflanib, mazkur mablag'lar evaziga Rio-de-Janeyro - 2016 yozgi Olimpiya va Paralimpiya o'yinlarida ishtirok etishga huquq beruvchi yo'llanmalarni qo'lga kiritgan 81 nafar sportchi va 120 nafar murabbiylar pul mukofotlari bilan, Rio-de-Janeyro - 2016 yozgi Olimpiya o'yinlari g'olib va sovrindorlari va Paralimpiya o'yinlari ishtirokchilari jami 46 nafar sportchilar “Malibu” rusumli avtomobillar bilan taqdirlandilar.
3. O'zbekiston sportchilarini ijtimoiy qo'llab-quvvatlash maqsadlariga 2016 yilda Fond tomonidan 117,708 mln.so'm ajratildi.
4. O'zbekiston milliy olimpiya harakatini qo'llab-quvvatlash yo'nalishi doirasida 146,521 mln.so'm sarflangan bo'lib, ular O'zbekiston milliy olimpiya qo'mitasi hududiy vakillari faoliyatini tashkil etilishiga yo'naltirilgan. Fondning 2015 yildagi ma'muriy xarajatlari 152,092 so'mni yoki Fond umumiy harajatlarining 0,91 foizini tashkil qildi.
Jamoat fondlari to'g'risidagi qonunchilikka muvofiq, O'zbekiston olimpiyachilarni qo'llab-quvvatlash jamoat fondining 2016 yildagi faoliyati bo'yicha Fond nazorat-taftish Komissiyasi hamda auditorlik tashkiloti tomonidan tekshiruvlar amalga oshirildi. O'tkazilgan tekshiruvlar natijasida: - 2016 yildagi Fond faoliyati bo'yicha ijobiy baho bilan nazorat-taftish Komissiyasining hisoboti Fondning vasiylik Kengashiga taqdim qilindi; - 2016 yildagi Fondning moliya-xo'jalik faoliyati bo'yicha ijobiy auditorlik xulosasi taqdim qilindi. 2016 yil davomida O'zbekiston olimpiyachilarni qo'llab-quvvatlash jamoat fondining Nizomiga, boshqaruv va boshqa organlari tarkibiga o'zgarishlar va qo'shimchalar kiritilmadi.
O'zbekiston Milliy olimpiya qo'mitasi
matbuot xizmati
— deya xabar beradi uff.uz nashri.