1news.uz — Joriy yilning 29 aprel kuni O'zbekiston kasaba uyushmalari Federatsiyasi tashabbusi bilan Qoraqalpog'iston Respublikasi, viloyatlar va Toshkent shahrida “Salomatlik sari” respublika ommaviy yugurish tadbiri o'tkazildi. Haqiqiy sport bayrami tusini olgan mazkur ommaviy yugurish tadbirlarida mamlakat miqyosida 30 ming 300 nafardan ortiq  ortiq ishchi-xodimlar va yoshlar ishtirok etdilar. Tadbirdan ko'zlangan asosiy maqsad – aholi o'rtasida sportning ommaviyligini oshirish, oilalarda va mehnat jamoalarida sog'lom turmush tarzini targ'ib etish, bu orqali xodimlar va ularning oila a'zolari salomatligini mustahkamlashdir. Kasaba uyushmalarining salomatlik aktsiyasi sifatida joriy yildan boshlab ilk marotaba tashkil etilgan mazkur ommaviy yugurish tadbirining Toshkent shahri miqyosidagi musobaqalariga poytaxtimizning Mirobod tumanidagi Oybek va Nukus ko'chalari chorrahasidan start berildi va ishtirokchilar Afrosiyob, Sharof Rashidov, Islom Karimov ko'chalari bo'ylab Alisher Navoiy nomidagi Davlat akademik katta teatrigacha bo'lgan masofani bosib o'tdilar. Qizg'in va do'stona bellashuvlar ostida o'tgan ommaviy yugurish tadbiriga turli soha xodimlari, ularning oila a'zolari, el ardoqlagan taniqli san'atkorlar, kino va teatr aktyorlari, aholi vakillari, mahalla faollari, faxriylar hamda yoshlar ishtirok etdi. Marafon ishtirokchilari bo'lgan xotin-qizlar va erkaklar 18 yoshdan 30 yoshgacha, 30 yoshdan 45 yoshgacha hamda 45 yosh va undan yuqori yoshdagi toifalarda guruhlarga bo'lingan holda belgilangan yo'nalishni bosib o'tdilar. Musobaqa ishtirokchilarining harakatlanishi davomida marafon masofasi oralig'ida taniqli sportchilar, san'atkorlar, yosh ijrochilar va badiiy havaskorlik dastalari, madaniyat xodimlari ishtirokida sog'lom turmush tarzini targ'ib etishga qaratilgan madaniy tadbirlar ham uyushtirildi. Musobaqalar oralig'ida professional  sport ustalarining ko'rgazmali chiqishlari ham tashkil etildi. Nufuzli hakamlar hay'ati tomonidan g'oliblar aniqlangunga qadar sport bayrami ishtirokchilari e'tiboriga taniqli san'atkorlar va yosh ijrochilar, badiiy jamoalar ishtirokidagi kontsert dasturlari namoyish etildi. Ommaviy yugurish tadbirlarining erkaklar va ayollar o'rtasida o'tkazilgan musobaqalarida g'olib bo'lib, yosh toifalari bo'yicha 1-, 2- va 3-o'rinlarni egallagan ishtirokchilar O'zbekiston kasaba uyushmalari Federatsiyasining maxsus diplom va sovg'alari bilan taqdirlandi. Xabarning tafsilotlari bilan 1news.uz saytida ushbu havola orqali tanishishingiz mumkin.
— deya xabar beradi uff.uz nashri.