O'zbekiston va KXDR terma jamoalari o'rtasida kechgan JCh saralashi uchrashuvidan so'ng matbuot anjumani boshlanish arafasida. Anjumanlar zaliga avvalo KXDR terma jamoasi bosh murabbiyi kelishi kutilmoqda. Ammo murabbiyning tashrifi ancha cho'zilmoqda. Odatda o'yin tugagach, murabbiy kelguniga qadar ko'p vaqt o'tmas edi. Ammo Kim Chang Bok biroz kechikdi, avzoyidan kayfiyati ham yaxshi emas.
Avvalo murabbiydan o'yin haqidagi fikrlari so'raldi. Murabbiy uzoq gapirdi, bizga tarjima qilishlaricha u shunday degan.
- Bugungi o'yinda O'zbekiston juda yaxshi o'ynadi. Ayniqsa 9 va 11 raqamli futbolchilarni alohida ta'kidlagan bo'lardi. Bugun biz tezkor gol urdik, ammo shundan so'ng hujumga o'tishda va raqibni jarima maydonchasiga qamash o'rniga ortga qaytdik. Buning imkoni bo'lmadi va biz himoyalanishga majbur bo'lganimiz uchun mag'lubiyatga uchradik.
Shundan so'ng savol javob boshlandi va ilk savol quyidagicha bo'ldi.
- O'zbekiston avvalgi o'yinga nisbatan qay darajada kuchaygan deb o'ylaysiz?
- Agar ikki o'yin, yozdagi va bugungini solishtirsak, o'tgan gal O'zbekiston terma jamoasi eng avvalo tarkibni o'zgartirgan. Ammo asosiysi bu emas, hozirgi jamoa to'qson daqiqa o'ynamoqda va to'liq hujum qila olish iqtidoriga ega. Bu hislatlar avvalgi uchrashuvda ko'rinmagan edi. To'g'ri, oldingi o'yinda ham O'zbekiston ikkinchi bo'limda yaxshi o'ynadi va gollar urdi, ammo hozirgi jamoa jismonan ancha kuchaygan.

- Jamoangiz maydon markazidan to'pni o'tkazib yuborib, gol urdirdi. Buni qanday to'g'rilamoqchisiz?
- Darhaqiqat bu o'yinga avval boshdan tuzib qo'ygan rejamiz boshqacha edi. Biz uch nafar futbolchini maydonga tushira olmadik. Shu sababli avvaldan ko'zlagan maqsadga erisha olmadik.

- Kecha muxlislarga alohida e'tibor berib, ularni ham engish lozimligini aytgan edingiz. Bu borada qanday fikr bildira olasiz?
- Stadionga kelgan ishqibozlar bugungi natijada muhim ta'sir o'tkazdi. Ammo muxlislar bosimi bizga ta'sir o'tkazgani yo'q. O'zimizga kelsak. bizda hali guruhda vaziyatni yaxshilash uchun imkoniyat bor va biz bundan foydalanishga harakat qilamiz.
Shu bilan KXDR terma jamoasi bosh murabbiyi bilan o'tkazilgan matbuot anjumani yakuniga etdi. Endi hamma Samvel Babayanni kutmoqda.
-G'olib murabbiy olqishlar ostida zalga kirib keldi. Samvel Babayan ham o'z navbatida matbuot anjumanini o'yin haqidagi fikri bilan boshladi.
-O'yin boshida juda og'ir vaziyatga tushib qolgan edik. Yigitlarga rahmat, ular vaziyatni o'nglashi lozim edi. O'yindan oldin raqibni juda yaxshi o'rgangan edik. Aytish mumkinki, tibbiy tilda aytganda, pataloganatom darajasida o'rgandik. Eng avvalo raqibning iroda kuchiga e'tibor qaratish kerak edi. Men yigitlarga aytdim, biz ularga o'zbekcha iroda qanday ekanini ko'rsataylik degan edim. Bu ishning uddasidan chiqa olganimizdan xursandman.
-Bugun nimani uddalay olmadingiz?
-Biz etarlicha e'tiborli bo'lishni uddalay olmadik. Bu esa ilk daqiqalarda pand berdi. Shunga qaramay oxiriga qadar o'ynadik. Biz raqibni yaxshi o'rgangan edik, ular ancha oddiy o'ynaydilar. Boz ustiga 9 raqamli futbolchisi zaxiraga chiqarilgani ham biz uchun kutilmagan sovg'a bo'ldi.
-Oldingi matbuot anjumanida sirli qurol haqida aytgan edingiz. Buni oshkor eta olasizmi?
-Sirli qurol haqida nima deyish mumkin? Men hozir hamma sirlarimizni ochib tashlashni istamagan bo'lardim. Hozir biz o'z uslubimizni joriy etmoqdamiz. O'yinga qadar albatta vertikal oshirma va kurashlarga tayyorlangan edik, ammo men futbolchilarga o'z uslubimizni raqibga o'tkazish kerakligini aytdim. Futbolda shundayki, o'zi shuni istagan jamoa raqibga bosim o'tkaza oladi.
-Islom To'xtaxo'jaev chapda o'ynaganiga nima deysiz? U bugun raqibning ortidan ulgura olmadi, bunga nima deysiz?
-U faqat bir marta raqibga eta olmadi va ular gol urdilar. Ammo boshqa vaziyatlarda u o'z ishini etarlicha uddalay oldi. Islom bugungi kunda jamoa saviyasida, shu sababli o'ynamoqda.
-Bugungi muxlislar tashrifi haqida nima deya olasiz? O'tkazilgan gol ham hayajon tufayli emasmi?
-Men avvalo bugungi g'alabani muxlislarga bag'ishlaymiz. Ular har qanday ob havoga qaramay. stadionga keldilar. Eng muhimi. muxlislar og'ir vaziyatda ham bizni qo'lladilar va buning uchun ularga katta rahmat.
-Markaziy himoya haqida nima deya olasiz? Ular gol o'tkazib yuborilgan vaziyatda va so'nggi daqiqalarda qo'pol xatolarga yo'l qo'ydilar.
-Markazda yurtimizning eng kuchli himoyachilari o'ynamoqdalar. Anzur anchadan buyon o'ynamoqda, Krimets esa yaqinda safga qo'shildi. Biz bu borada ish olib bormoqdamiz.
-To'rtta o'yin o'ynadingiz, uchtasida birinchi bo'lib gol urdingiz, bugun esa gol o'tkazib yuborib, vaziyatni o'ngladingiz. Bu o'yinlardan qay biri sizga yoqdi?
-Bahreyn va KXDR Osiyoning etakchilaridan hisoblanadi. Biz bu o'yinlarni hali yana tahlil qliib chiqamiz. Bahreynda raqibga o'z o'yinimizni joriy eta oldik. Bugun esa hisobni tenglashtirish uchun kurashishga majbur bo'ldik. Ko'ramiz, bu o'yinlarning tahlilini qilib chiqqach, yana nimalar qilish kerakligini aniqlab olamiz. Keyingi o'yinlarga ham bee'tibor bo'lish niyatimiz yo'q.
Matbuot anjumani yakuniga etgach, Babayan odatiy tarzda yana o'z fikrlarini bildirib o'tdi.
- Meni endi terma jamoa boshqaruviga tayinlashganda men hamma bilan uchrashdim, jurnalistlar, murabbiylar va mutasaddilar. Men bu ishni birdamlikka erishish uchun qilgan edim. O'zingiz ham ko'rib turibsiz, hozirgi terma jamoada eng kuchli futbolchilar o'ynamoqdalar. Albatta sizning safingizda bu ishlar yoqmayotganlar bor. Albatta ular juda kam, balki 0,1 foizni tashkil etar. Ular juda kam, ammo bor. Nima keragi bor terma jamoaga u futbolchi chaqirildi, bu futbolchi chaqirilmadi, deyish. Agar tanqid to'g'ri bo'lsa, buni qabul qilaman. Ammo reyting uchun turli gaplarni yozish nimaga kerak? Shuning uchun sizdan bir narsani iltimos qilaman, terma jamoani qo'llab-quvvatlang.
Samvel Babayan so'zini tugatgach, zaldan shitob bilan chiqib keta boshladi. Uning so'nggi fikrlariga qarshi e'tiroz bildirish uchun hech kim ulgurmadi ham. Faqat murabbiy chiqib ketishi oldidan Uff.uz xodimlari Samvel Babayanga e'tiroz bildirdilar:
- Samvel Vyachaslavovich, maqtov - har doim ham qo'llab-quvvatlash degani emas. Ba'zan u juda zararli ham bo'lishi mumkin. Tanqid ham kerak.
- Agar u o'rinli tanqid bo'lsa, mayli.
- Tanqid qay darajada o'rinli yoki o'rinsiz ekanini jurnalistlar hal qiladi...
Shu bilan matbuot anjumani yakuniga etdi.

— deya xabar beradi uff.uz nashri.