Oliy liganing 8-turida “Obod”ga qarshi bahs olib borgan “Lokomotiv” o'yinni 7:0 hisobidagi g'alaba bilan yakunladi. Shu tariqa “temiryo'lchilar” ikkinchi bor ushbu hisob bilan raqibni mag'lub etishdi.
2015 yilgi mavsumda ham “Loko” 7:0 hisobida zafar quchgan, faqat o'shanda raqib Jizzaxning “So'g'diyona” klubi bo'lgandi. TTYMI stadionida kechgan o'yinda Islom To'xtaxo'jaev va Sanjar Shoahmedov ikki bor to'p kiritgan bo'lsa, Jasur Hasanov bilan Marat Bikmaev bittadan gol urishgan, shuningdek bir golni mehmonlar himoyachisi Elyor Oripov o'z darvozasiga kiritib qo'ygandi.
“Obod”ga qarshi bahsda esa Murod Bojonov bilan Jaloliddin Masharipov ikkitadan gol urib dubl qayd etishdi. Shuningdek, Marat Bikmaev, Sardor Mirzaev hamda Ikrom Aliboev o'z hisoblariga bittadan gol yozib qo'yishdi.
— deya xabar beradi uff.uz nashri.