FootballHD.ru sayti blogeri Yuriy Usinin ko'hna qit'aning «kuchli beshlik» chempionatlarida o'ynaydigan yosh futbolchilarning o'yinlaridan xulosa qilib, o'ziga xos tarzda ulardan mamlakat chempionatining yaqin yillarda katta ehtimol bilan yulduz darajasida bemalol to'p sura oladigan futbolchilarni kashf qilishga kirishdi. Bloger o'z nuqtai nazarini dastlab Italiya A Seriyasiga qaratdi. Italiya futboli anchadan buyon tajribali futbolchilarga suyanib kelmoqda. 2006 yil Germaniya mezbonlik qilgan mundialda chempion bo'lgan yigitlarning ayrimlari hali-hamon terma jamoa bilan birga faoliyatini davom ettirmoqda. «Skuadra Adzurra»ning bu printsipga asosan ish ko'rishi, so'nggi ikki mundialda o'zini oqlamadi. Ehtimol, jamoa 2012-yili bo'lib o'tgan Evropa chempionati finaliga chiqqan va o'sha musoboqada o'zidan yorqin taasurot qoldirgan bo'lishi mumkin, lekin «moviy gvardiya»ning o'sha tarkibida yosh futbolchilarga kam imkon berilgani, termaning bugungi kundagi mazmunli o'ynashiga biroz to'sqinlik qilmoqda. Buni terma jamoaning sobiq bosh murabbiyi Antonio Konte ham tan olgan. Terma jamoa osmonini qoplayotgan bulutlar sekin-astalik bilan ularni tark etayotgani, albatta quvonarli holat. Bunga esa mamlakat chempionatida o'ynayotgan italiyalik hamda boshqa millat vakillarining issasi sabab bo'layabdi» Janluiji Donnarumma, «Milan», 18 yosh Janluiji Buffonning vorisi, deb qaralayotgan darvozabon yaqinda voyaga etdi, biroq kundan-kunga fantastik o'yinlari bilan katta o'sishga erishmoqda. Go'yoki, «rossonerlar» posbonining harakatlarini ko'rib, Italiyada «Yangi Buffon» paydo bo'layotganiga ishonasan kishi. Ko'z oldingizga keltirish uchun, Donnarummaning «Yuventus»ga qarshi Italiya Superkubogi hamda Italiya chempionatidagi so'nggi baxslarini eslashingizni so'raymiz. Uning aqlbovar qilib bo'lmas seyvlari, o'ziga bo'lgan ishonchlilikni sovuqqonlik bilan ko'rsatishi, u qo'riqlayotgan darvozaga penalti belgilanganda, zarba berilayotgan nuqtani aniq topishi va o'sha nuqtaga bor jon-jahdi bilan tashlanishi ko'rib, jahon futbolida «beqiyos topilma» paydo bo'layotganiga amin bo'lasiz. Aynan uning «Yuventus»ga qarshi bahsda penaltini qaytarishi tufayli, «Milan» 6 yillik tanaffusdan keyin ilk sovrinni qo'lga kiritdi. Uning «San-Siro»da qolishini xohlaguvchilar ko'plab topiladi, lekin bu ko'p jihatdan Li Xanga bog'liq. Ammo nima bo'lishidan qat'iy  nazar, Donnarumma ikki yildan keyin terma jamoaning asosiy kiperiga aylanadi. Federiko Bernardeski, «Fiorentina», 23 yosh Federiko ushbu mavsumning eng ulkan kashfiyotlaridan biri bo'lmoqda. Oldinroq Bernardeski o'ng qanot yarim himoyasida o'ynadi, o'zi uchun noqulay bo'lgan hududda. Biroq keyinchalik Nikola Kalinich bilan joyni almashdi hamda maydon markazida erkin harakatlanadigan futbolchiga aylandi. Zarba berish, to'pni kerakli vaqtda uzatishni his qilish, standartlardan maksimum darajada foydalanishga urinish Federikoning katta o'sishga erishishiga zamin yaratmoqda. Agar u shu tempda «binafshalar» safida o'ynashda davom etadigan bo'lsa, yaqin vaqtlar ichida nafaqat klubi bilan yuqori marralarga erishishi, balki grand jamoalardan biri safini to'ldirishi ham mumkin. Mattia Kaldara, «Atalanta», 22 yosh So'nggi mavsumlarda to'xtovsiz gollar kiritib kelayotgan Gonsalo Iguain, Paulo Dibala, Dris Mertens, Marek Gamshik kabi forvardlar bu yilga kelib juda katta to'siqqa duch kelishmoqda - «Atalanta» jamoasini nafaqat mag'lub etish, balki ularning darvozasiga gol kiritish ham qiyinchilik bilan amalga oshmoqda. Himoyadagi ishonchli o'yinlar bergamoliklarning ushbu mavsumdagi topilmasi Mattia Kaldaraning yakkama-yakka va havodagi kurashlarda yutib chiqayotgani, tezlik bobida hujumchilardan qolishmasligi sabab, «Atalanta» keyingi mavsumda Evropa Ligasida ishtirok etishida eng muhim omildir. Chempionatda 6 ta gol kiritib, (hali hech qaysi markaziy himoyachi ushbu mavsumda buncha gol kiritmagan) o'zi uchun «Yuventus»dan joy hozirlab qo'ydi. «Keksa sinora» vakillari uning transferi uchun 15 million evro to'lashdi. Lekin shunga qaramay, kelajagi porloq sifatida qaralayotgan himoyachini zahiraga mixlamaslik uchun 2018 yilgacha Bergamoda qoldirishga qaror qildi. Ehtimol, u Jorjio Kellini yoki Andrea Bartsali jamoadan ketganidan keyin turinliklarning asosiy himoyachisi bo'lar... Balde Keyta, «Latsio», 22 yosh Senegallik forvard mana bir necha yildirki «Latsio» safida muntazam o'yin amaliyotiga ega bo'lmoqda. Lekin bu yilgi harakatlari oldingilaridan ham muvaffaqiyatli chiqmoqda: o'zining faoliyatida ushbu mavsum eng ko'p golli pas va gol kiritmoqda. Keytaning maydondagi eng bebaho fazilatlaridan biri, uning tezligi va universal futbolchi ekanligida. «Barselona» nonini egan Balbde, maydonda «barsachi»lar kabi o'ynashga intilmoqda. Frank Kessi, «Atalanta», 20 yosh «Atalanta» Italiya chempionatining kashfiyot jamoasi bo'layotgan bo'lsa, uning tarkibidagi Frank Kessi ushbu mavsumda eng ko'p tilga olinayotgan futbolchidir. Ivuarlik vunderkind kamtarona jamoada asosiy rolni bajarmoqda hamda yosh bo'lishiga qaramay, jismoniy jihatdan kuchli bo'lganligi sabab, o'z jamoasi hujumini boshlash, raqib hujumini buzishda juda ham faol harakat qilmoqda. Kessi to'p bilan nozik muomalada bo'ladi, darvoza hamda o'zining o'rtasidagi masofaga qarab, darvoza tomon zarba beradi yoki sheriklariga qulay vaziyat yaratadi. Uning kamchiliklaridan biri, to'p uchun kurashlarda ko'pincha qoida buzadi. Ammo buni bartaraf etsa bo'ladi. Manuel Lokatelli, «Milan», 19 yosh Yosh markaziy yarim himoyachi milanliklarning barcha yosh toifalardagi jamoalarida o'ynab chiqqan. 11 yoshidayoq «rossonerlar»ning asosiy futbolchisi bo'lishga da'vogarlik qiladi degan fikrda bo'lishgan aksar italiyalik mutaxassislar. Manuel ko'pincha hujumlarga qo'shilishni xush ko'radi hamda o'zi vaziyat yaratishga urinadi. U ushbu mavsum A Seriyada ikkita gol kiritgan, ikkalasidan biri Buffon qo'riqlayotgan darvoza to'riga borib tushgan. U Buffonni dog'da qoldirishning uddasidan chiqibdimi, demak, unda qandaydir sir-sinoat bor... Sergey Milinkovich-Savich, «Latsio», 22 yosh Serb yarim himoyachisi Rimdagi dastlabki mavsumida atigi 1 ta gol urishiga qaramay, murabbiyning ishonchiga kira oldi. Shtab uning birinchi mavsumini jamoa va chempionatga moslashish uchun ketgan, degan fikrga kelishdi. Savich ham bu fikr xato emasligini isbotladi. Uning pressingda yuqori darajada harakatlanishi, jamoaning asosiy tarkibiga kirishiga etarli bo'ldi. Roberto Galyardini, «Inter», 23 yosh Galyardini hozircha birinchi davrada «Atalanta» safida namoyish etganini «Inter»da ko'rsata olmayabdi. Terma jamoa bosh murabbiyi Jampiero Ventura esa Galyardining harakatlarini imkon qadar ko'proq kuzatib bormoqda. Uning maydondagi vazifasi raqibga hujum qilishga imkon bermaslik. Marko Benassi, «Torino», 22 yosh Turinning ikkinchi raqamli jamoasi «Torino» kamdan-kam hollarda mayda «shovqin» ko'tarib turishi bilan nom qozongan. Ushbu mavsumda jamoada har bir o'yiniga qadar kurash olib boradigan ahil bir jamoa jam bo'lgan. «Buqalar»ning eng ishongan futbolchilaridan biri aynan Benassidir. U asosan hujumning markazida harakat qiladi. Shu sababdan butun jamoa unga o'ynashga intiladi. Nodirbek Mamatqulov tayyorladi
— deya xabar beradi uff.uz nashri.