Aslida, muxlisning – professional futbolchilarga baho berishi mutaxassislarga erish tuyulishi mumkin...  Shunday bo'lsada, yurtimizninng turli burchaklarida yashovchi - zukko futbol muxlislari tomonidan  berilgan ballarni e'tiboringizga havola etmoqchimiz.  
Baholar 10 balli tizimda:
Aleksandr Lobanov – 6 ball
Muxlislar fikricha, g'olib jamoamizning eng ojiz nuqtasi - darvozabon. O'yin boshidayoq o'tkazib yuborilgan golda darvozabonimizning deyarli aybi yo'qdir, ammo Aleksandr ilk xatodan so'ng to'pni unga yaqinlashtirmaslikka uringan barcha himoyachilarga alohida tashakkur bildirib qo'yishi kerak. Yarim himoya va himoya chizig'i ortida kuchli golkiper turganini his etib o'ynasa yaxshi bo'lar edi. O'zi, bizning darvozamiz tomonga to'p nari borsa to'rt-besh bora mehmon bo'lgandir, lekin barcha xavfli vaziyatlarda yurak hovuchlab o'tirdik.
 
Egor Krimets – 7,5 ball
Yaratgan bo'y-bastdan etarlicha in'om etgan Egor bundanda yaxshi o'ynashi mumkin. Osiyo termalari ichida eng kuchlilaridan biri bo'lgan o'rta bo'g'inning himoyachilarga deyarli kam ish qoldirayotgani, bor gap. G'alaba egalarini tanqid qilishdan yiroq holda aytamiz - “himoya chizig'imiz hali mukammal emas”. Jumladan, Egorning o'yini ham.
Anzur Ismoilov – 7 ball
Asosiy himoyachilardan biri bo'lgan Anzur maydonda katta mehnat qilgani aniq.  O'yining ma'suliyati bosdi, chog'i himoya chizig'imiz nazarimda biroz cho'chib o'ynadi. Darvozamizga kiritilgan birinchi golda Anzurni aybi bor.
 
Islom To'xtaxo'jaev – 7,5 ball
O'ng qanotda ancha ishonchli o'ynadi. Biz bu ampluada Akmal Shorahmedovni ko'rishni o'rganib qolgandik.  Islom o'z qanotini ishonchli tarzda yopishni uddalagani rost.
Vitaliy Denisov – 9,5 ball
Denisov – jangchi! Unga baho berishni o'zi qiyin. O'zini hech qachon ayamaydigan va himoyani boshqara oladigan futbolchimizni borligi biz uchun baxt.  Oddiygina qilib aytganda – “molodets”.
Aziz Haydarov – 8,5 ball
“Qora mehnat” qiladigan o'yinchi. G'alabaga katta  hissa qo'shganini hech kim inkor qila olmaydi. Unga chiroyli o'yin emas, natija kerak. Qisqasi, terma uchun kerakli shaxs.
Odil Ahmedov – 9,5 ball
Maydonda ozgina kenglik paydo bo'lsa, bemalol ijod qilib “reyd” uyushtirishni uddalaydigan Odilning o'yini maqtovga loyiq.  Jamoada tashabbus ko'rsatib, sheriklarini ruhlantirish kabi sifatlarga o'yinchi doim kerak.   Odil ana shu sifatlar  unda borligini bugungi o'yinda ko'rsatib berdi.  
Sardor Rashidov – 9,5 ball
Qatar “Yulduzlar ligasi” vakili muxlislarni esdan chiqarmasdan, chiroyli o'yin ko'rsatishga urinadigan futbolchiga aylanibdi.  Raqibni ikkita o'yinchisi u bilan ovvora bo'ldi. Odilga uzatgan goli pasi esa tahsinga loyiq. U haqda ko'p gapirishning keragi yo'q. To'qson daqiqa davomida  qancha xavfli vaziyatlarni yuzaga keltirganini sanab o'tishning o'zi qiyin. U borgan sari sifatli o'yin ko'rsatmoqda.
Server Jeparov – 9 ball
Ijodkorsan – Server! Sergeevga bergan aniq pasi o'yin taqdirini o'zgartirib yubordi.  Ishoning! Jeparov hali bizga ko'p kerak bo'ladi.
Marat Bikmaev – 7, 5 ball
Jismoniy tayyorgarligi zo'r. Tezligi haminqadar. Qanotda o'ynash uchun tezligi baland vinger bo'lish kerak. Marat  - ma'suliyatni his qiladigan o'yinchi. Uni tanqid qilsak insofdan bo'lmas.
Igor Sergeev – 9 ball
O'yinda burilish yasagan gol egasi. Ikki bo'limda ikki hil o'yin ko'rsatdi. Geynrix tushganidan so'ng orqaroqqa qaytdi va deyarli vaziyatlar yaratmadi. Baribir, unga katta rahmat aytamiz.
Aleksandr Geynrix – 9 ball
Zahiradan tushib, murabbiy va muxlislar ishonchini oqlagan – “maestro”. Avstriyani Evro-2016ga chiqishiga  “Bazel”ning fahriy 34 yoshli o'yinchisi  Marko Yanko   9 o'yinda 7 gol kiritib, katta hissa qo'shdi. Ana ko'ring, bizda ham ana shunday futbolchi bor! Geynrix maydonda o'z tajribasini doim ko'rsata oladi. Muxlislar yoqimtoyi bu –“Sashaqizg'aldoq”. Hali unga atab ko'p she'rlar yozamiz, shekilli...
Zahiradan tushgan futbolchilar o'yiniga to'xtalmadik. Elmurod ERMATOV tayyorladi
— deya xabar beradi uff.uz nashri.