Mana, OChL guruh bosqichi finishiga 1ta qoldi. «Pley-off» yo'llanmasidan hali umid uzmagan klublar orasida «Lokomotiv» ham bor. «Temiryo'lchilar» 5-turda S.Arabistonining ««Al-Tavon»» klubini qabul qilib, hakam tomonidan qo'shib berilgan daqiqalarda g'alabani qo'ldan chiqarishdi - 4:4. Ushbu natija «Loko»ga qimmatga tushishi mumkin. Umuman, Mirko Yelichich jamoasi 5-turdan keyinoq kurashni davom ettirish imkoniyatini yo'qotishi hech gap emasdi. Xayriyatki, Eronning «Istiqlol» klubi «Al-Ahli»- (BAA)ga yutqazmadi. Ammo hozir ham O'zbekiston chempionining taqdiri o'z qo'lida emas. 6-turda «Al-Tavon»» zafar quchgan taqdirda «Al-Ahli» ustidan qozoniladigan g'alaba ham «Lokomotiv»ga yordam bermaydi. Boisi, o'zaro o'yinlar hisob-kitobida saudlar «temiryo'lchilar»dan ustun. Xullas, biz Toshkentdagi o'yinda «xet-trik»ka erishgan Marat Bikmaevdan OChLdagi ishtirok xususida intervyu oldik. - Marat, «xet-trik» qayd etganingiz - yaxshi. Nihoyat, bir necha yil avvalgi Bikmaevni qayta kashf etgandekmiz. Lekin yakunda qimmatli 2 ochkodan mahrum bo'lganinglar - yomon. Umuman, «Al-Tavon»» bilan o'yinda ikki xil bo'lim guvohiga aylandik. Buning sababi nima? - Ha, ochig'i, gollarim tatimadi. G'alabani saqlab qolganimizda edi. Afsuski, yana qo'shib berilgan daqiqalarda gol qo'yib yuborganimiz pand berdi. Darhaqiqat, birinchi bo'limda juda yaxshi harakatlandik. Hattoki, hisobni raqiblar ochgan bo'lsalarda, tushkunlikka berilmadik va tezda javob golini urdik. Xullas, ilk 45 daqiqalikda murabbiylar ko'rsatmalarini to'liq bajardik. Shaxsan men gol qo'yib yuborganimizdan keyin ham ««Al-Tavon»ni engishimizga shubhalanmagandim. Afsuski, turli faktorlar bir bo'lib, g'alabani qo'ldan chiqardik. Havoning birdan isib ketgani, ayrim futbolchilar jarohatdan endi qutulib, safga qaytishgani ham ta'sir qildi, menimcha. Eng katta kamchiligimiz - gol qo'yib yuborishdan cho'chib to'p surayotganimiz. Negadir hisobda oldinga chiqib olgach, ustunlikni saqlab qolishga ko'proq e'tibor qaratyapmiz. Menimcha, bu psixologiya bilan bog'liq holat. O'zimga kelsak, o'yindan oldin maydonni golsiz tark etmasligimga ishongandim. Bu - ichki tuyg'u. Birinchi gol urilgan vaziyatni alohida ta'kidlashim kerak. Mashg'ulotlarda bunday kombinatsiya ustida ishlagandik: Masharipov to'p uzatdi, men darvozani ishg'ol qildim. Jalol penalti ham ishladi. O'zi so'nggi paytlar ikkimiz maydonda bir-birimizni tushunib o'ynayapmiz. Uchinchi golda esa menga Diyor Turopov yordam berdi. Afsuski, bu gollar jamoamga g'alaba keltirmadi. Eng alam qiladigani ham shu... - Tanaffus chog'i murabbiylar qanday ko'rsatmalar berishdi? - Birinchi bo'limdagi kabi harakatlanishda davom etishimiz zarurligini uqtirishdi. Aslida ikkinchi bo'limni ham yomon boshlamadik. Lekin o'ta oddiy holatlarda 2ta gol qo'yib yubordik. O'sha vaziyatlarda mehmonlarga shunchaki, omad kulib boqdi. Menimcha, bizga biroz xotirjamlik pand berdi. Shunga qaramay, to'rtinchi golni ham nishonladik. Ammo yana qo'shimcha daqiqalar va yana alamli gol... Yuqorida aytdim, bu ruhiy holatga bog'liq kamchilik. - Ha, «Istiqlol»ga qarshi kechgan o'yinda ham xuddi shunga o'xshash holat kuzatilgandi. Ya'ni hakam qo'shib bergan daqiqalarda g'alabani qo'ldan chiqargandinglar... - Buni qanday tushuntirib berishni ham bilmayman. Faqat bitta farqi bor, «Istiqlol» bilan o'yinda natijani saqlab qolishga urinmagandik. Ya'ni hisobni ochganimizdan keyin ham hujumga zo'r bergandik. O'shanda gol qo'yib yuborilgan vaziyatni olaylik: jarima maydonimizda atigi 3 nafar futbolchimiz qolgandi. Chunki deyarli butun jamoa bo'lib hujumga chiqib ketgandik. «Al-Tavon»» bilan o'yin biroz boshqacharoq kechdi. Eh, guruhdagi nisbatan kuchsizroq raqib bilan o'yinlarda ochko yo'qotish va 4ta gol urgancha g'alaba qozonolmaslik alam qilar ekan. - «Loko» baxtiga «Istiqlol» ham durang o'ynadi. Agar «Al-Ahli» Tehronda g'alaba qozonganida, oxirgi o'yin sizlar uchun rasmiyatchilikka aylanardi... DAVOMI InterFutbol.uz ning Telegram dagi sahifasiga ulaning – eng so'nggi yangiliklar, qiziqarli bloglar va tahliliy materiallar endi bir to'plamda.
— deya xabar beradi uff.uz nashri.