Jahon futbolining bosh yulduzlaridan biri - Krishtianu Ronaldu oxirgi yillardagi eng shov-shuvli va faol media-haftani o'tkazdi. U avvaliga 2ta oshkora intervyu berdi - The Times (Buyuk Britaniya) gazetasi va Kicker (Germaniya) jurnaliga. Keyin ijtimoiy tarmoqlarda portugaliyalikning biografik asari (muallif - AS va Sky Sports muxbiri Gilem Balage)dan olingan parchalar «aylana» boshlandi. Seshanba kuni esa, Krishtianu o'zining yana «PSJ»ga o'tishi haqida gap tarqatganlar bilan «o'yin» qildi. Xo'sh, futbol ommasi oxirgi kunlarda «Real» yulduzi haqida nimalarni bilib oldi?
«Otam bilan aloqam yaxshi emasdi»
- Otam alkogol ichimliklariga to'be edi - buni ko'rganman. Harqalay, u mening tasavvurimdagi ota emasdi. Yo'q, otamni baribir, sevganman, albatta. Biroq o'rtamizda hech qachon hozir siz (The Times jurnalistiga) bilan bo'layotgandek samimiy suhbat bormagan. Hech qachon. Ehtimol, butun hayoti davomida bir marta samimiy gaplashgandirmiz... Otam 2005 yili vafot etdi. U Londondagi shifoxonada yotardi. O'shanda Aleks Fergyuson yoniga borib, «Kouch, ketishim kerak», - dedim. Mavsumning eng muhim pallasi borayotganiga qaramay, Fergyuson qarshilik qilmadi: «Futbol sen uchun otang oldida hech narsa emas. Agar xohlasang, xotirjam ketaver». Men murabbiyning bunday munosabatini doimo qadrlayman va hech qachon unutmayman.
«O'g'limga iPhone 6 shart emas»
- Doimo yosh ota bo'lishni orzu qilganman. Deylik, 25 yoshda. Mana, xuddi shunday bo'ldi. Yolg'iz ota ekanligimga kelsak, buning hech qanday qo'rqinchli joyi yo'q. Hayotda ko'pchilikda na otasi va na onasi bor. Shunday ekan, o'g'lim uchun otaning o'zi etadi. Hech qachon farzandimning tug'ilishi, uning onasi haqida gapirgan emasman. Bunday qilish niyatim ham yo'q. O'g'lim ulg'aygach, hammasini o'ziga atroflicha tushuntiraman, nimalarni his qilganimni aytib beraman. U meni tushunadi, deb o'ylayman. Umuman, farzand meni jiddiy o'zgartirdi. U doimo o'zgacha kuch bag'ishlaydi, mudom kulib, charchog'imni oladi. Uning mening yo'limdan borib, hujumchi bo'lishi va ko'p gol urishini xohlardim. Biroq o'ziga darvozada turish ko'proq yoqadi.
Ha, ulkan yotoqxonada uxlab, nonushtaga yogurt va mevalar esang, garajda qimmatbaho mashinalar turganida, taltayib ketishing oson. Mana, o'g'lim yaqinda iPhone 6 telefoni olib berishimni so'radi. Tabiiyki, unga «Yo'q», - deya javob berdim. To'g'ri, kimga qo'ng'iroq qilishni xohlashini ham so'radim. «Senga, ota», - deya javob berdi o'g'lim. Shunda buvasiga murojaat etishi va uning telefonidan foydalanishi mumkinligini aytdim. Umuman, har bir jihatni nazorat qilish mumkin emas. Ammo ta'lim va to'g'ri tarbiya - bular sen o'g'lingga beradigan eng katta sovg'a. Deylik, biz har yakshanba kuni qat'iy kun tartibidan chetga chiqib, burger tanovul qilish, «Koka-kola» ichish uchun boramiz. Zero, muvozanatni ushlash ham juda muhim.
«Eng yaxshisi - o'zim»
- Messi bilan raqobat xususida umuman tashvish chekmayman. Shunchaki, o'zim eng yuqori saviyamni ko'rsatishga harakat qilaman. Mana, oxirgi 8 yildan buyon barqarorlikni saqlab kelyapman. Menga yana biror shunday futbolchini aytingchi? Jahonning eng yaxshi va ikkinchi raqamli futbolchisi o'rtasidagi farq mayda jihatlarda ko'rinadi. Misol uchun, sovrinlarni yuta olishing yoki yutolmasligingda. Ehtimol, siz uchun eng yaxshisi Messidir, yana kimdir Inestani tilga oladi. Men bunday fikrlarni hurmat qilaman. Lekin baribir, o'zimni eng kuchli futbolchi, deb bilaman. Umuman, bu dunyoda eng kamtarin odam emasman, buni tan olaman. Lekin o'sish, rivojlanish masalalarida etarli darajada kamtarona fikrlayman. Chunonchi, o'rganishdan hech qachon or qilmayman. Mudom boshqa sport turlarini ham kuzataman, sportchilarning harakatlaridan nimalarnidir o'zlashtirishni o'ylayman. Harqalay, boshqa sportchilarga qarab ham yangilik kashf etishing va o'yiningni kuchaytirishing mumkin. Bu menga yoqadi.
Davomi InterFUTBOL gazetasi blogida.
— deya xabar beradi uff.uz nashri.