O'zbekiston milliy terma jamoasi kecha KXDR termasiga qarshi o'yinda 3:1 hisobida irodali g'alaba qozonib, ko'pchilik muxlislarga cheksiz quvonch ulashdi. Ushbu g'alaba terma jamoamizning guruhdagi holatini yanada yaxshiladi, deb bemalol aytishimiz mumkin. Endilikda Samvel Babayan shogirdlari safarda Yamanni mag'lub etishsa (hattoki, durang o'ynashsa ham) guruhda yaqqol peshqadamga aylanib olishadi. Ammo Yamanga qarshi o'yin oldidan bir noxush xabar tarqaldi. Ko'pchilik ommaviy axborot vositalari sariq kartochklari ikkitaga etgani uchun Yamanga qarshi o'yinni terma jamoamizning eng faol futbolchilaridan biri Sardor Rashidov o'tkazib yuboradi degan mazmunda xabar tarqatishdi. Kecha KXDRga qarshi o'yinning 89-daqiqasida Sardor Rashidov sariq kartochka olgandi va shu zahotiyoq Samvel Babayan tomonidan zaxiraga olingandi. Ammo JCh-2018 2-saralash bosqichining rasmiy protokollariga nazar tashlaydigan bo'lsak, Sardor Rashidovning sariq kartochkalari ikkitaga etmaganiga guvoh bo'lishimiz mumkin. KXDRga qarshi kechgan 2-saralashning birinchi o'yinida terma jamoamiz tarkibida Aziz Haydarov ikkita sariq kartochka olgan va maydonni erta tark etgan. Dastlab, u 44-daqiqada ogohlantirilgan. Keyin esa 83-daqiqada ikkinchi kartochkasini olib, maydondan chiqib ketgandi. Yamanga qarshi kechgan o'z maydonimizdagi o'yinda esa Javohir Sohibov 45-daqiqada va Odil Ahmedov 90+1 daqiqada ogohlantirilgan. Filippinga qarshi kechgan safardagi o'yinda yana o'sha Aziz Haydarov 71-daqiqada ogohlantirish olgan. Bahraynga qarshi kechgan o'yinda esa Egor Krimets uchrashuvning 88-daqiqasida hakam tomonidan sariq kartochkaga loyiq topilgan. Kecha KXDRga qarshi o'yinda esa Islom To'xtaxo'jaev 20-daqiqada va Sardor Rashidov 89-daqiqada ogohlantirish oldi. Ko'rib turganingizdek, kechagi o'yindagi sariq kartochka Sardor Rashidov uchun 2-saralash bosqichidagi ilk kartochka bo'ldi. Bu esa u Yamanga qarshi kechdigan o'yinda maydonga tushishi mumkinligini anglatadi. Ayni paytda O'zbekiston milliy terma jamoasi tarkibida Javohir Sohibov, Odil Ahmedov, Aziz Haydarov, Islom To'xtaxo'jev  va Sardor Rashidovlarda bittadan sariq kartochka bor. 
— deya xabar beradi uff.uz nashri.