Farg'ona va Buxoro shaharlarida oliy va birinchi liga klublarining tayyorlov guruhlari turniri Respublika bosqich bahslari o'tkazildi.
Vodiydagi bahslarda 1999-2000 yillarda tavallud o'smirlar kuch sinashishdi. Musobaqaning guruh bosqichi haqida avvalgi xabarlarimizda ma'lumot berib o'tgandik. Dilmurod Abdullaev ustozligidagi “Bunyodkor-99” futbolchilari yarim finalda “Neftchi” vakillari bilan final yo'llanmasi uchun kurashishdi. Uchrashuvning asosiy vaqtida hisob ochilmadi. Shundan so'ng, g'olib penaltilar seriyasida aniqlandi. “Lotoreyalar bahsi”da “qaldirg'ochlar” omadliroq chiqishdi va farg'onaliklardan 5:4 hisobida ustun kelishdi. Qashqadaryov derbisi nomi ostida kechgan ikkinchi yarim finalda “Nasaf” 6:4 hisobida “Alanga”ni mag'lubiyatga uchratdi.
Bugun o'tgan “Bunyodkor” – “Nasaf” uchrashuvida musobaqa g'olibi nomi ma'lum bo'ldi. Qiziqarli kechgan bahsda “Bunyodkor-99” hujumchichisi Abbosbek Jumaqulov tomonidan kiritilgan yagona gol “qaldirg'ochlar”ga g'alaba keltirdi. Shu tariqa, 1999-2000 yillar o'rtasidagi 2015 yilgi tayyorlov guruhlari turnirida “Bunyodkor-99” birinchi o'rinni qo'lga kiritdi.
— deya xabar beradi uff.uz nashri.