«Paxtakor» futbol klubi atrofida anchadan buyon gap-so'zlar urchiyotgandi. O'tgan hafta nihoyat yangilik eshitdik: klub tomonidan rahbariyatda o'zgarishlar qilingani haqida rasman ma'lumot berildi. Unga ko'ra, «Paxtakor» vitse-prezidenti lavozimiga Bobur Kabulovich Shodiev tayinlandi, bosh direktorlik esa Umid Mahamadjonovich Ahmadjonov zimmasiga topshirildi. Xo'sh, bu yangilik nimadan dalolat? ESKI DAVR «Paxtakor»da butun boshli davr ortda qoldi. Kimlarningdir ta'biri bilan aytganda, «Babayan davri». Bu davrga «oltin era» nisbatini berishni ma'qul ko'radiganlar ham bor, albatta. Umuman, har kim o'ziga yoqqan ta'rifni qo'llash huquqiga ega. Muhimi, ikki nisbatni ilgari suruvchilar ham haq bo'lib chiqishadi. Zero, bu davr darhaqiqat, Samvel Babayan boshqaruvida o'tdi. U 2001 yildan e'tiboran avvaliga vitse-prezident, keyin menejer va yakunda, ya'ni O'zbekiston terma jamoasi boshqaruvini qo'lga olishi oldidan bosh murabbiy sifatida ishladi. «Paxtakor» bu vaqt davomida qator g'alabalarga erishdi, 2008 yilga qadar chempionlikni qo'ldan boy bermay keldi va OChLda ham dastlabki 2 mavsumda yarim final raundiga chiqdi. Bu g'alabalarning kimgadir yoqqani-yu, ayrimlarga yoqmagani bosh-qa masala. Zotan, 2001 yildan so'ng «Paxtakor» butun mamlakat bo'ylab «ov»ga chiqib, eng kuchli futbolchilarni o'z tarkibiga jamlashni boshladi. Aynan shunisi tabiiyki, ko'pchilikka yoqmadi. Axir raqiblarni kuchsizlantirish evaziga chempionlikka erishish bilan muxlis orttirib bo'larmidi? Shu tariqa «Paxtakor» bir vaqtlar haqli ravishda olgan «xalq jamoasi» maqomini yo'qota boshladi. Harqalay, 15 yil muqaddam ham bu e'tirofga e'tiroz bildiradiganlar ko'p topilmasdi, endi esa «Paxtakor»ga nisbatan «xalq jamoasi» maqomini ishlatish kulguli. Zero, jamoani suymaydigan muxlislarni nafaqat viloyatlar, balki poytaxtning o'zida ham uchratish mumkin. 25 yil muqaddam bunaqasi tasavvurga ham sig'masdi. Hozir esa yurtimizda «Paxtakor»ning antimuxlislari ko'proqdek, bir qarashda. Mana, g'alabalarga boy shu davr ortda qolib, «Paxtakor» yangilanish sari yuz tutdi. Tub islohotlar qanday manzara kasb etadi? Endi shu haqda... YaNGI DAVR Hozir yangi «Paxtakor»ga bog'liq tasdiqlangan ma'lumotlardan ko'ra, tasdiqlanmagani ko'proq. Albatta, ular orasida haqiqatga mos keladigani qatori mutlaqo aqlga sig'maydiganlari ham bor. Ba'zilari hattoki, afsona misoli. Yo'q, «Paxtakor»ni kim sotib olganini muhokama qilmoqchi emasmiz, zero, bu haqda faqat rasmiy xabar berilsagina bilib olamiz. Ammo shuning barobarida klubni katta o'zgarishlar kutib turganini bemalol taxmin qilish mumkin. Asosiysi, ko'zda tutilgan islohotlar barcha jabhalarni qamrab oladi. Xullas, yaqin orada murabbiylar shtabi, tarkib va hattoki, stadion masalasida ham yangiliklar ketma-ketligi uzilmasa kerak. Mana, ilk o'zgarish  avvalo, murabbiylar shtabidan boshlandi. MURABBIY Har qancha og'ir bo'lsada, tan olish lozim, oxirgi yillarga qarasak, «Paxtakor»da 3-4 nafar murabbiyning almashib ish yuritishi odat tusiga kirgandi. Xususan, yaqindagina bosh murabbiy roliga taklif etilgan va ko'p o'tmay iste'foga chiqarilgan Ravshan Haydarovning «sherlar» boshqaruvini qayta-qayta qo'lga olganini bilamiz. Shuningdek, uzoq vaqt Viktor Jalilov murabbiylar shtabining doimiy a'zosi bo'lib kelgani ham ma'lum. Klub muxlislari o'zgarishlar shamoli esa boshlagach, avvalo, shu tizimga barham berilishini istagandilar. Mana, yangi rahbariyat birinchi navbatda, Ravshan Haydarovni iste'foga chiqarishni ma'qul ko'rdi. Uning o'rnida vaqtincha bosh murabbiy maqomi ostida Jasur Abduraimov ishlaydi. Ta'kidlash joiz, ayni vaqtdagi sharoitdan kelib chiqib, ushbu qarorni eng optimal tanlov sifatida tilga olish mumkin. Chunonchi, hozir darrov yaxshi saviyali murabbiy topish amri-mahol. Shunday ekan, klub ichki zaxiralaridan foydalangan holda, og'ir vaziyatdan chiqib ketishi lozim. Unutmang, «Paxtakor» oliy liga turnir jadvalida sira o'ziga yarashmaydigan joyda bormoqda. Bunday holatda xorijdan talab darajasidagi mutaxassis olib kelish qiyin. Zero, taklif etiladigan murabbiy oldiga jiddiy vazifalar qo'yilishi shart. O'zini hurmat qiladigan mutaxassis esa jadvalning ikkinchi yarmida borayotgan jamoani chempionlik sari etaklash uchun qabul qilib olmasligi turgan gap. Agar kimdir shunday va'da bilan ishlashga kirishsa, bilingki, uning maqsadi boshqa - moliyaviy manfaat. Axir hozirda «Paxtakor» uchun bu ishni bajarish deyarli imkonsiz bo'lib ulgurdi-ku. Shunday ekan, bosh murabbiy vakolatini vaqtincha jamoani yaqindan biladigan kishiga topshirish to'g'ridir. Jasur Abduraimov esa bu ishga eng munosiblardan biri edi. Har holda, u «Paxtakor» o'rinbosarlari bilan ancha vaqt birga ishladi. Og'ir vaziyatda qolgan jamoani o'rinbosarlar ustozi yoki yordamchi murabbiyga topshirish Evropa va jahon futboli amaliyotida ham uchraydigan voqea sanaladi. Masalan, «Chelsi» rahbariyati Andre Villash-Boashni iste'foga chiqarib, Roberto di Matteoga ishonch bildirgan va bu bilan adashmagandi. Axir londonliklar o'sha mavsum EChLda g'olib chiqishdi. Yana bir misol o'rnida «Lester»da ro'y bergan oxirgi  o'zgarishlarni olaylik - Klaudio Raneri o'rnini egallagan Kreyg Shekspir og'ir vaziyatni birdaniga bartaraf etishni uddaladi. Demakki, Jasur Abduraimovdan ham nimadir kutishga haqlimiz. Vaziyat taqozosiga ko'ra, yosh murabbiy oldida katta futbolda yaxshigina imkoniyat tug'ilgan ekan, u bundan maksimal darajada foydalanishga urinib ko'rishi tayin. Ehtimol, vaqti kelib, «Paxtakor» bosh murabbiyi rolida xorijlik nomdor mutaxassisni ham ko'rarmiz... Abduraimov esa shunga qadar nimalarga qodirligini ko'rsatishi kerak. TARKIB «Paxtakor» yaqin 15 yil davomida katta g'alabalarni qo'lga kiritdi va bunda 2001 yili jamlangan tarkibning roli salmoqli. O'sha yili ko'zga ko'ringan eng kuchli futbolchilar «Paxtakor» qanoti ostida birlashtirildi. Qolaversa, klub O'zbekiston milliy jamoasi bazasiga aylantirildi va bu siyosat 5-6 yil davom etdi. Faqat «Quruvchi» nomi bilan sahnaga kirib kelgan «Bunyodkor» tufayli bunday yondashuvga chek qo'yildi. To'g'ri, bu klub ham avvaliga eng kuchlilarni o'z safiga chorlash yo'lidan bordi. Ya'ni, «Paxtakor»da chempionlikka erishgan yigitlar «Bunyodkor»ga yo'l olishdi. Qarangki, ular keyinchalik «Lokomotiv» tarkibini to'ldirishdi. Xo'p, mayli, yangicha rivojlanish yo'lini tanlagan «sherlar» rahbariyati endi qanday uslubda ish olib boradi?
Hozircha bilganimiz shuki, «Paxtakor» Osiyo darajasida kuchli klub maqomini olishni maqsad qilgan. Bu vazifaning kuchli ijrochilarsiz bajarib bo'lmasligi o'z-o'zidan tushunarli. Shundan kelib chiqqan holda, taxmin qilsak, klub milliy chempionatdagi ko'zga ko'ringan futbolchilarni o'z safiga qo'shib olishni istaydi. Biroq «Lokomotiv», «Bunyodkor», «Nasaf» va boshqa jamoalar rahbarlari endilikda etakchi yigitlarni osongina qo'yib yubormasalar kerak. Har holda, bu ish xuddi 2001 yildagi kabi silliq kechmasligi ayni haqiqat. Zero, o'shanda hamma chora-tadbirlar O'zbekiston milliy jamoasi manfaati yo'lida amalga oshirilgandi. Biroq tajriba shuni ko'rsatdiki, termaga nomzod futbolchilarni bitta klubda o'ynatish samara keltirmas ekan.
Demak, «Paxtakor»ning endi boshqa yo'ldan borishiga to'g'ri keladi. Istardikki, klub avvalgidek raqobatchilarni kuchsizlantirish emas, balki o'z tarkibini kuchaytirish orqali maqsad sari intilsin... Ayni shu sababga ko'ra, bizni mahalliy futbolchilardan ko'ra, legionerlar masalasi ko'proq qiziqtiradi. Bordi-yu, ilgari kuzatilganidek, Qozog'iston chempionatidan o'ziga klub topolmagan va boshqa mamlakatlar quyi ligalarida to'p surgan legionerlarga e'tibor qaratilaversa, «Paxtakor»ning yuqoriga ko'tarilishi qiyin masala. Bunday xorijliklar yangicha qarashlarga ega klubga mos kelmaydilar. Har holda, nomiga legioner sanalgan futbolchilar bilan OChLda g'olib chiqadigan jamoa tuzish imkonsizdir.
Shunday ekan, buyog'iga deylik, Serbiya, Ukraina yoki Moldovadan keladigan har qanday futbolchi etakchi jamoalarimizda to'p surib ketavermasligi kerak. Balki «Paxtakor» Rivaldo darajasidagi yulduzni chaqirmas, biroq o'z ixtiyoridagi iste'dodlarga nimadir berishga qodir va mahalliy futbolchilardan darhaqiqat, bir bosh ustun turadigan legioner kutishga haqlimiz. Aks holda, shuncha o'zgarishdan davomiy naf chiqishiga ishonish qiyin. Muhimi, muxlislar kimningdir o'yinini tomosha qilish uchun stadionga talpinishsin!
Magarki 35 ming kishilik arenaga 3,5 ming muxlis ham kirmayotgan ekan, bilingki, hozir «Paxtakor»da bunday «ohanrabo» futbolchi yo'q. Jamoada chin etakchi ko'zga tashlanmayotgan ekan, yana nima deyish mumkin? Xulosa shuki, yangi rahbariyat birinchi navbatda, o'z o'yini va xatti-harakatlari bilan jamoani olg'a boshlaydigan, muxlislarni stadionga chorlaydigan etakchi topishi zarur. Mayli, «Oltin to'p» sohibi kelmasin, ammo o'z nomiga ega futbolchini ko'raylik.
STADION
«Paxtakor»ning yaqin o'tmishi davomida infratuzilma uchun ko'p ishlar amalga oshirildi, maydon maysasi to'liq yangilandi. Biroq tan olish lozim, o'tgan asrning o'rtalarida hashar yo'li bilan qurilgan stadionning umumiy holatini yanada yaxshilashga ehtiyoj bor, baribir. Zamonaviy arenalar bugungi kunda nafaqat sport nuqtai nazaridan, balki shahar ko'rinishini ochadigan interer sifatida ham muhim ahamiyatga egadir. DAVOMI InterFutbol.uz ning Telegram dagi sahifasiga ulaning – eng so'nggi yangiliklar, qiziqarli bloglar va tahliliy materiallar endi bir to'plamda.
— deya xabar beradi uff.uz nashri.